ദൈവത്തിലുള്ള ഒരാളുടെ വിശ്വാസം തികച്ചും വ്യക്തിപരമാണ്. ഒരാൾക്ക് നേരിട്ട് ദൈവത്തിൽ എത്താമെങ്കിൽ പിന്നെ എന്തിന് സഭയിലൂടെ ദൈവത്തെ തേടാൻ ശ്രമിക്കണം?

Authored by : Fr. George Panamthottam CMI On 22-Aug-2022

വിശ്വാസം വ്യക്തിപരമായ ഒരു പ്രവൃത്തിയാണെന്നു പറഞ്ഞതു ശരിതന്നെ. കാരണം, ദൈവം സ്വയം വെളിപ്പെടുത്താൻ തയ്യാറാകുമ്പോൾ മനുഷ്യൻ സ്വതന്ത്രമായി പ്രത്യുത്തരം നൽകുന്നതാണു വിശ്വാസം. എന്നിരുന്നാലും, വിശ്വാസം ഒരു ഒറ്റപ്പെട്ട പ്രവൃത്തിയല്ല. ആർക്കും ഈ ലോകത്തിൽ തനിയെ ജനിക്കാൻ കഴിയില്ല. ആരും തനിക്കു തന്നെ ജീവൻ നൽകുന്നില്ല. ഇതു പോലെ തന്നെ വിശ്വാസം ഒരാൾക്കു തനിക്കുതന്നെ നൽകാൻ കഴിയില്ല. ജീവൻ മറ്റൊരാളിൽ നിന്നു നാം സ്വീകരിക്കുന്നതു പോലെ വിശ്വാസവും നാം മറ്റുള്ളവരിൽ നിന്നു സ്വീകരിക്കുന്നു. നമ്മൾ അതു മറ്റുള്ളവർക്കു പകർന്നുകൊടുക്കുന്നു. വിശ്വാസികളുടെ ഒരു വലിയ ശൃംഖലയുടെ കണ്ണിയാണ് ഓരോ വിശ്വാസിയും. അതുകൊണ്ടാണു മാമോദീസാ വേളയിൽ ഒരാൾ “ഞാൻ വിശ്വസിക്കുന്നു" എന്നു വ്യക്തിപരമായി ഏറ്റുപറയുകയും പിന്നീട്, സഭയിൽ വിശ്വാസപ്രമാണം ഉച്ചരിക്കുമ്പോൾ “ഞങ്ങൾ വിശ്വസിക്കുന്നു” എന്ന് ഏറ്റുപറയുകയും ചെയ്യുന്നത്.

മാമോദീസയിലൂടെ വിശ്വാസവും ക്രിസ്തുവിൽ നവജീവനും നമ്മൾ സ്വീകരിക്കുന്നതു സഭ വഴിയാണ്. സഭയാണ് ആദ്യം വിശ്വസിക്കുന്നതും അങ്ങനെ നമ്മുടെ വിശ്വാസത്തെ നയിക്കുന്നതും പരിപോഷിപ്പിക്കുന്നതും നിലനിർത്തുന്നതും. ഇതിനാൽ, സഭയോടൊത്തു സഭയ്ക്കുള്ളിൽ “ഞാൻ വിശ്വസിക്കുന്നു", “ഞങ്ങൾ വിശ്വസിക്കുന്നു" എന്ന് പ്രഘോഷിക്കാൻ നാം നിർബന്ധിക്കപ്പെടുന്നു. സഭ കൂടാതെ ഒരു വിശ്വാസിക്കും ശരിയായ വിശ്വാസജീവിതം നയിക്കാൻ കഴിയില്ല. എല്ലാവർക്കും അവരവരുടെ മതങ്ങളിൽ നിന്നാണു വിശ്വാസം ലഭിക്കുന്നത്. തനിച്ച് ആർക്കും വിശ്വാസിയാകാനോ വിശ്വാസജീവിതം നയിക്കാനോ കഴിയില്ല. ഈ കാരണങ്ങളാൽ ഒരാൾ താൻ ദൈവവിശ്വാസിയാണെന്നും വിശ്വാസജീവിതം നയിക്കുന്ന വ്യക്തിയാണെന്നും എന്നാൽ സഭയോ മതമോ തനിക്ക് ആവശ്യമില്ലെന്നു പറയുകയും ചെയ്താൽ അത് പരസ്പര വിരുദ്ധമായ പ്രസ്താവനയായിരിക്കും.

Living faith series : 1 (ചോദ്യം:2)

Living faith series : 1 (ചോദ്യം:2) Fr. George Panamthottam CMI ദൈവത്തിലുള്ള ഒരാളുടെ വിശ്വാസം തികച്ചും വ്യക്തിപരമാണ്. ഒരാൾക്ക് നേരിട്ട് ദൈവത്തിൽ എത്താമെങ്കിൽ പിന്നെ എന്തിന് സഭയിലൂടെ ദൈവത്തെ തേടാൻ ശ്രമിക്കണം? പരിശുദ്ധ ത്രിത്വം Bible Theology Church Teachings