വിശുദ്ധരുടെ ഓർമ്മയ്ക്കായി തിരുനാളുകൾ ആചരിക്കുന്നത് വചനവിരുദ്ധമാണോ?

Authored by : Fr. George Panamthottam CMI On 03-Nov-2022

തങ്ങളുടെ ജീവിതത്തിലൂടെ ദൈവത്തെ മഹത്വപ്പെടുത്തിയ വിശുദ്ധരെ പ്രകീർത്തിക്കുന്നു. അവരുടെ ഓർമ്മ ആചരിക്കുന്നതും വചനവിരുദ്ധമാണെന്നു പഠിപ്പിക്കുന്നവരുണ്ട്. എന്നാൽ, വിശുദ്ധർ സാഘോഷം സ്മരിക്കപ്പെടാൻ ദൈവം ആഗ്രഹിക്കുന്നതായി തിരുവചനത്തിൽ പലേടത്തും കാണാം. ചില വചനഭാഗങ്ങൾ ശ്രദ്ധിക്കാം.

പ്രഭാഷകന്റെ പുസ്തകത്തിൽ പറയുന്നു: "നമുക്കിപ്പോൾ മഹത്തുക്കളെയും നമ്മുടെ പൂർവ്വപിതാക്കന്മാരെയും തലമുറകളത്തിൽ പ്രകീർത്തിക്കാം. കർത്താവ് ആദിമുതൽ തന്നെ തന്റെ പ്രതാപവും മഹത്വവും അവർക്ക് ഓഹരിയായി നൽകി" (പ്രഭാ, 44: 1,2). “അവർ കാരുണ്യമുള്ളവരായിരുന്നു. അവരുടെ സൽപ്രവർത്തികൾ വിസ്മമിക്കപ്പെട്ടിട്ടുമില്ല (പ്രഭാ. 44:16). “അവരുടെ പ്രതാപം മാഞ്ഞുപോവുകയില്ല. അവർ സമാധാനത്തിൽ സംസ്കരിക്കപ്പെട്ടു. അവരുടെ പേര് തലമുറകൾ തോറും നിലനിൽക്കും, അവരുടെ വിജ്ഞാനം ജനതകൾ പ്രഘോഷിക്കും; സമൂഹം അവരെ പ്രകീർത്തിക്കുകയും ചെയ്യും (പ്രഭാ. 44: 13-15).

വിശ്വാസം മൂലം ദൈവത്തെ പ്രീതിപ്പെടുത്തിയ പൂർവ്വപിതാക്കന്മാരെ പൗലോസ് അപ്പസ്തോലൻ പ്രകീർത്തിക്കുന്നുണ്ട്. (ഹെബ്രാ. 11: 4,5). ഹെനോക്, നോഹ, അബ്രാഹം, സാറ, യാക്കോബ്, മോശ, ദാവീദ് തുടങ്ങിയവരെയും വിശുദ്ധ പൗലോസ് അപ്പ്സ്തോലൻ പ്രകീർത്തിക്കുന്നു. “നമുക്കു ചുറ്റും സാക്ഷികളുടെ വലിയ സമൂഹമുള്ളതിനാൽ നമ്മെ വിഷമിപ്പിക്കുന്ന പാപവും ഭാരവും നമുക്കു നീക്കിക്കളയാം. അപ്പസ്തോലൻ വിശുദ്ധരുടെ ജീവിത മാതൃകകൾ ചൂണ്ടിക്കാണിക്കുന്നതുപോലെ ഇന്ന് തിരുസഭ വിശ്വാസത്തിലൂടെ ദൈവത്തോടു വിശ്വസ്തത പുലർത്തിയ അനേകം വിശുദ്ധരെ മാതൃകയായി നൽകുന്നു. ദൈവം ബഹുമാനിക്കുന്ന അവിടുത്തെ ദാസരെ മഹത്വപ്പെടുത്താൻ വിശ്വാസികൾ ശ്രമിക്കുന്നതിന്റെ ബാഹ്യപ്രകടനമാണ് അവരുടെ ബഹുമാനത്തിനായി തിരുനാൾ ആഘോഷിക്കുന്നത്. ഇത് തികച്ചും വചനാധിഷ്ഠിതവും വിശ്വാസത്തിന്റെ സജീവ പ്രകടനവുമാണ്.

 Living faith series : 9 (ചോദ്യം:3)

Fr. George Panamthottam CMI  Living faith series : 9 (ചോദ്യം:3) പ്രഭാ 44: 1 പ്രഭാ. 44:16 പ്രഭാ. 44: 13-15 ഹെബ്രാ. 11: 4 Bible Theology Church Teachings