കമ്പസാരരഹസ്യം വചനപ്രഘോഷണവേദികളിൽ പറയാൻ അനുവാദമുണ്ടോ ?

Authored by : Syro Malabar catechetical commission On 02-Jun-2021

സഭയുടെ നിയമമനുസരിച്ച് വളരെ ഗൗരവപൂർവം പരിഗണിക്കുന്ന ഒന്നാണ് കുമ്പസാര രഹസ്യം . പാപി പാപമോചനത്തിനുവേണ്ടി വൈദികനോട് എന്തെല്ലാം കാര്യങ്ങൾ പറയുന്നുണ്ടോ അതെല്ലാം കുമ്പസാരരഹസ്യത്തിന്റെ ഭാഗമാണ് . അത് പാപമോ പാപസാഹചര്യമോ പാപത്തിൽ ഉൾപ്പെട്ടവരോ ആകാം . കുമ്പസാരക്കാരൻ തന്റെ മരണം വരെയും , പാപമേറ്റുപറഞ്ഞയാൾ മരിച്ചുപോയാലും , അത് രഹസ്യമായി സൂക്ഷിക്കേണ്ടതാണ്. കുമ്പസാരരഹസ്യലംഘനങ്ങൾ രണ്ടുതരത്തിൽ സംഭവിക്കാം.
1. കമ്പസാരരഹസ്യം നേരിട്ട് വെളിപ്പെടുത്തുക,പാപിയേയും പാപത്തേയും കൃത്യമായി പറയുന്നതാണ് നേരിട്ടുള്ള വെളിപ്പെടുത്തൽ ( direct violation 
2. നേരിട്ടല്ലാതെ വെളിപ്പെടുത്തുന്ന രീതി,പ്രഘോഷണവേളകളിലും പ്രസംഗം പറയുമ്പോഴും , ബൈബിൾ കൺവെൻഷന്റെ അവസരങ്ങളിലും കുമ്പസാരത്തിൽ കേട്ട കാര്യങ്ങൾ കുദാശകളും പറയുന്നത് നേരിട്ടല്ലാതെയുള്ള കുമ്പസാരരഹസ്യം വെളിപ്പെടുത്തൽ ആണ് ( indirect violation ) .
ഇവരണ്ടും സഭ അനുവദിച്ചിട്ടുള്ളതല്ല . ആദ്യത്തേത് വളരെ ഗൗരവമുള്ള പാപമാണ് . അതിനാൽ കുമ്പസാരഹസ്യം നേരിട്ട് വെളിപ്പെടുത്തുന്ന വൈദികന്റെ പാപം മോചിക്കാൻ മാർപാപ്പായ്ക്ക് മാത്രമേ അനുവാദമുള്ളു . രണ്ടാമത്തേത് വൈദികൻ മനഃപൂർവം അല്ലാതെ വെളിപ്പെടുത്തുന്നതാണ് ഉദാഹരണത്തിന് " ഒരിക്കൽ ഞാൻ ഒരിടത്ത് കുമ്പസാരിപ്പിച്ചു കൊണ്ടിരുന്നപ്പോൾ ഒരു വ്യക്തി എന്നോട് കുമ്പസാരത്തിൽ പറഞ്ഞു " എന്നുപറയുമ്പോൾ കുമ്പസാരത്തിൽ പറഞ്ഞകാര്യമാണെന്ന് അവിടെ വെളിപ്പെടുത്തുകയാണുചെയ്യുന്നത് . പാപിയെ വെളിപ്പെടുത്തുന്നില്ലെങ്കിലും , പാപം വെളിപ്പെടുത്തി . അപ്രകാരം നേരിട്ടല്ലാതെയും പാപം വെളിപ്പെടുത്താൻ പാടില്ലെന്ന് സഭ നിഷ്കർഷിക്കുന്നു . കുമ്പസാരരഹസ്യം ഏതെങ്കിലും തരത്തിൽ വെളിപ്പെടുത്തപ്പെടും എന്നറിഞ്ഞാൽ പാപികൾ കുമ്പസാരിക്കാൻ വൈമുഖ്യം കാണിക്കും . അതുകൊണ്ട് കുമ്പസാരരഹസ്യം പരമപരിശുദ്ധമായി വൈദികൻ മരണംവരെ സൂക്ഷിക്കേണ്ട ഒരു രഹസ്യമാണ് . ഒരാൾ ഏറ്റുപറഞ്ഞ പാപം പറയുന്നതുവഴി അനേകരുടെ മാനസാന്തരത്തിനു കാരണമാകും , അതൊരു സാക്ഷ്യമാകും എന്നൊക്കെ കരുതുന്നതും അപ്രകാരം ചെയ്യുന്നതും ശരിയായ മനോഭാവം അല്ല.

(സീറോ മലബാർ മതബോധന കമ്മീഷൻ പുറത്തിറക്കിയ വിശ്വാസവഴിയിലെ സംശങ്ങൾ എന്ന പുസ്തകത്തിൽനിന്നും)

confession confession secrets Bible Theology Church Teachings