കടമുള്ള ദിവസങ്ങളിൽ വിശുദ്ധ കുർബ്ബാനയിൽ പങ്കെടുക്കുമ്പോൾ ദിവ്യകാരുണ്യം സ്വീകരിക്കാതിരുന്നാൽ പാപമാകുമോ ?

Authored by : Syro-Malabar Catechetical Commission On 02-Jun-2021

കടമുള്ള ദിവസങ്ങൾ മാത്രമല്ല ഏതുദിവസമാണെങ്കിലും വിശുദ്ധ കുർബ്ബാനയിൽ പങ്കെടുക്കുമ്പോൾ ദിവ്യകാരുണ്യം സ്വീകരിക്കേണ്ടത് ആവശ്യമാണ്. കാരണം, യേശു കുർബ്ബാന സ്ഥാപിച്ചപ്പോൾ (അന്ത്യത്താഴസമയത്ത്) നാല് കാര്യങ്ങൾ സംഭവിച്ചു : യേശു അപ്പമെടുത്തു , വാഴ്ത്തി , മുറിച്ചു , ശിഷ്യന്മാർക്കു നല്കി. യേശുവിന്റെ ഈ പ്രവൃത്തിയുടെ ഓർമ്മയാചരണമാണല്ലോ കുർബ്ബാന. യേശു പറഞ്ഞു : “ എന്നെകൂടാതെ നിങ്ങൾക്ക് ഒന്നും ചെയ്യാൻ സാധിക്കുകയില്ല;” “എന്റെ ശരീരം ഭക്ഷിക്കുകയും എന്റെ രക്തം പാനം ചെയ്യുകയും ചെയ്താൽ നിങ്ങൾക്ക് ജീവനുണ്ടാകും. ”യേശു അപ്പത്തിന്റെയും വീഞ്ഞിന്റെയും സാദൃശ്യത്തിൽ വിശുദ്ധ കുർബ്ബാന സ്ഥാപിച്ചത് അവിടുത്തെ തിരുശരീരരക്തങ്ങൾ ഭക്ഷണപാനീയങ്ങളായി നല്കാനാണ് . വിശുദ്ധ കുർബാനയിൽ പങ്കെടുക്കുന്ന വ്യക്തി ദിവ്യകാരുണ്യം സ്വീകരിക്കാതിരിക്കുന്നത് പാപമാണെന്നു പറയാൻ കഴിയില്ലെങ്കിലും, ഭാഗഭാഗിത്വം അപൂർണമായിരിക്കും. മലയാള ഭാഷയിൽ കുർബാനയിൽ “പങ്ക് എടുക്കണം" എന്നാണല്ലോ പറയുന്നത് . വിശുദ്ധ കുർബ്ബാനയിൽ പങ്ക് എടുക്കുക എന്നു പറഞ്ഞാൽ വിശുദ്ധ കുർബ്ബാന സ്വീകരിക്കുക എന്നു കൂടി അർത്ഥമുണ്ട്. ആ അർത്ഥത്തിൽ വിശുദ്ധ കുർബ്ബാനയിൽ സംബന്ധിക്കുമ്പോൾ ദിവ്യകാരുണ്യസ്വീകരണം ഒരു അവശ്യഘടകമാണ് .

(സിറോ മലബാർ മതബോധന കമ്മീഷൻ പുറത്തിറക്കിയ വിശ്വാസ വഴിയിലെ സംശയങ്ങൾ എന്ന പുസ്തകത്തിൽ നിന്നും)

holy mass holy eucharist Bible Theology Church Teachings