ധൂപാർപണം ദൈവാരാധനയുടെ ഭാഗമാണ് ; അത് വിശുദ്ധരുടെ രൂപത്തിൽ അർപ്പിക്കുമ്പോൾ വിഗ്രഹാരാധനയാകാത്തത് എന്തുകൊണ്ട് ?

Authored by : Syro Malabar catechetical commission On 02-Jun-2021

ധൂപാർപണം ദൈവാരാധനയോ ദൈവാരാധനയുടെ ഭാഗമോ അല്ല, വിശുദ്ധരുടെ രൂപങ്ങൾ വിഗ്രഹങ്ങളുമല്ല . ധുപാർപ്പണം ഒരടയാളമാണ് . ധൂപത്തിന് മൂന്ന് പ്രതീകാത്മക അർത്ഥങ്ങളാണുള്ളത് . ഒന്നാമതായി , കുന്തുരുക്കം കനലിൽ എരിയുമ്പോൾ പുക മുകളിലേക്ക് ഉയരുന്നതുപോലെ  കർത്താവേ ഞങ്ങളുടെ പാപങ്ങൾ നിന്റെ അഗ്നിയിൽ ശുദ്ധീകരിച്ച് വിശുദ്ധീകരിക്കപ്പെട്ട ഞങ്ങളുടെ ആത്മാക്കളെ ഈ ധൂപം ഉയരുന്നതുപോലെ സ്വർഗത്തിലേക്ക് ഉയർത്തണമേ' എന്നതാണ് ഒരർത്ഥം. രണ്ടാമതായി, തീയിൽ കുന്തുരുക്കമിടുമ്പോൾ ധൂപം മുകളിലേക്ക് ഉയരുന്നതുപോലെ ഞങ്ങളുടെ പ്രാർത്ഥനകൾ നിന്റെ സന്നിധിയിലേക്ക് ഉയരട്ടെ എന്നചിന്തയാണ്. മൂന്നാമതായി , രാജാക്കൻമാരെയും ബഹുമാന്യരായ വ്യക്തികളെയും ആദരിക്കുന്നതിന് അവരുടെ മുമ്പിൽ ധൂപാർപ്പണം നടത്തുന്ന പതിവുണ്ടായിരുന്നു. അതിൽ നിന്നാണ് അൾത്താരയേയും പരിശുദ്ധ കുർബ്ബാനയേയും വിശുദ്ധരുടെ രൂപങ്ങളെയും മറ്റും ധൂപിക്കുന്ന പതിവുണ്ടായത്. ചുരുക്കത്തിൽ , പരിശുദ്ധ കുർബ്ബാനയോടുള്ള ബഹുമാനവും ആദരവും സ്നേഹവും കാണിക്കുന്നതിനും വിശുദ്ധരോടുള്ള വണക്കം സൂചിപ്പിക്കുന്നതിനും വേണ്ടിയാണ് ധുപാർപ്പണം നടത്തുന്നത്. വിശുദ്ധരുടെ രൂപവും വിഗ്രഹവും തമ്മിലുള്ള വ്യത്യാസം എന്താണ്? വിഗ്രഹം എന്നാൽ ഒരു ദേവന്റെയോ, ആരാധ്യ വ്യക്തിയുടെയോ, സാന്നിദ്ധ്യം ആവാഹിച്ചെടുക്കുന്നതാണ്. അമ്പലങ്ങളിലെ ചില പ്രതിഷ്ഠകൾ വിഗ്രഹങ്ങളാണ്. ആ പ്രതിഷ്ഠയിൽ ദേവന്റെയോ ദേവിയുടെയോ സാന്നിദ്ധ്യം ആവാഹിച്ചെടുക്കുന്നു. ക്രൈസ്തവ ദേവാലയങ്ങളിലെ രൂപങ്ങളിൽ വിശുദ്ധരുടെ സാന്നിദ്ധ്യം ഇല്ല. പ്രത്യുത, വിശുദ്ധരെ സ്മരിക്കുന്നതിന് ഉപയോഗിക്കുന്ന അടയാളമാണ് അവരുടെ രൂപങ്ങൾ. അങ്ങനെ നാം സ്നേഹിക്കുന്ന ,പ്രാർത്ഥിക്കുന്ന, മാദ്ധ്യസ്ഥ്യം യാചിക്കുന്ന വിശുദ്ധരോടുള്ള ബഹുമാനം കാണിക്കുന്നതിനു വേണ്ടിയാണ് അവരുടെ രൂപത്തിന്റെ മുമ്പിൽ ധൂപിക്കുന്നത്. സ്നേഹിക്കുന്ന വ്യക്തിയോടുള്ള ബഹുമാനം ദൃശ്യമായരീതിയിൽ കാണിക്കുന്നതിനുവേണ്ടി ഉപയോഗിക്കുന്ന ഒരു ആചാരമാണ് ധുപാർപ്പണം.

(സീറോ മലബാർ മതബോധന കമ്മീഷൻ പുറത്തിറക്കിയ വിശ്വാസവഴിയിലെ സംശങ്ങൾ എന്ന പുസ്തകത്തിൽനിന്നും)

incense incensing the saints Bible Theology Church Teachings