കുർബാനയിൽ അപ്പവും വീഞ്ഞും എങ്ങനെയാണ് ക്രിസ്തുവിന്റെ ശരീരവും രക്തവുമായി മാറുന്നത്? ഇത് വചനാധിഷ്ഠിതമാണോ?

Authored by : Fr. George Panamthottam CMI On 28-Oct-2022

സെഹിയോൻ മാളികയിൽ വച്ചാണു ക്രിസ്തു അപ്പം മുറിയ്ക്കൽ ശുശ്രൂഷ നടത്തിയത്. ഇതുസംബന്ധിച്ചു വിശുദ്ധ പൗലോസ് പറയുന്നത് പ്രകാരമാണ്. "കർത്താവിൽ നിന്ന് എനിക്കു ലഭിച്ചതും ഞാൻ നിങ്ങളെ ഭരമേല്പ്പിച്ചതുമായ കാര്യമിതാണ്. കർത്താവായ യേശു, താൻ ഒറ്റിക്കൊടുക്കപ്പെട്ട രാത്രിയിൽ, അപ്പമെടുത്തു കൃതജ്ഞതയർപ്പിച്ചതിനു ശേഷം അത് മുറിച്ചുകൊണ്ട് അരുളിച്ചെയ്തു: ഇത് നിങ്ങൾക്കുവേണ്ടിയുള്ള എന്റെ ശരീരമാണ്. എന്റെ ഓർമ്മയ്ക്കായി നിങ്ങൾ ഇതു ചെയ്യുവിൻ. അപ്രകാരം തന്നെ അത്താഴത്തിനുശേഷം പാനപാത്രമെടുത്ത് അരുളിച്ചെയ്തു: ഇത് എന്റെ രക്തത്തിലുള്ള പുതിയ ഉടമ്പടിയാണ്; നിങ്ങൾ ഇത് പാനം ചെയ്യുമ്പോഴെല്ലാം എന്റെ ഓർമ്മയ്ക്കായി ചെയ്യുവിൻ. നിങ്ങൾ ഈ അപ്പം ഭക്ഷിക്കുകയും ഈ പാത്രത്തിൽ നിന്നു പാനം ചെയ്യുകയും ചെയ്യുമ്പോഴെല്ലാം കർത്താവിന്റെ മരണം, അവന്റെ പ്രത്യാഗമനംവരെ പ്രഖ്യാപിക്കുകയാണു ചെയ്യുന്നത്” (1 കോറി 11:23-26). വിശുദ്ധ മത്തായി സുവിശേഷകൻ പറയുന്നു: “അവർ ഭക്ഷിച്ചു കൊണ്ടിരിക്കുമ്പോൾ യേശു അപ്പമെടുത്ത് ആശീർവദിച്ച് മുറിച്ച് ശിഷ്യന്മാർക്ക് കൊടുത്തുകൊണ്ട് അരുളിച്ചെയ്തു: വാങ്ങി ഭഷിക്കുവിൻ ഇത് എന്റെ ശരീരമാണ്. അനന്തരം പാനപാത്രമെടുത്ത് കൃതജ്ഞതാ സ്തോത്രം ചെയ്ത് അവർക്ക് കൊടുത്തുകൊണ്ടു പറഞ്ഞു: നിങ്ങളെല്ലാവരും ഇതിൽ നിന്ന് പാനം ചെയ്യുവിൻ. ഇത് പാപമോചനത്തിനായി അനേകർക്കുവേണ്ടി ചിന്തപ്പെടുന്നതും ഉടമ്പടിയുടേതുമായ എന്റെ രക്തമാണ്” (മത്തായി 26 : 26-28).

ക്രിസ്തു വചനത്തിലൂടെ അപ്പത്തെ തന്റെ ശരീരമായും പാനീയത്തെ തന്റെ രക്തമായും രൂപാന്തപ്പെടുത്തുന്നു. “എന്റെ ഓർമ്മയ്ക്കായി ഇതു ചെയ്യുവിൻ” (ലൂക്കാ 22:19) എന്ന തിരുവചനപ്രകാരം തിരുസഭ അൾത്താരയിൽ ഇത് അനുസ്മരിക്കുമ്പോൾ ക്രിസ്തു അപ്പത്തെ തന്റെ ജീവനുള്ള ശരീരമായും വീഞ്ഞിനെ ജീവനുള്ള തന്റെ രക്തമായും രൂപാന്തരപ്പെടുത്തുന്നു. സെഹിയോൻ മാളികയിൽ സംഭവിച്ച അത്ഭുതം ഇന്നും ഓരോ വിശുദ്ധ കുർബാനയിലും ക്രിസ്തു പ്രവർത്തിക്കുന്നു.

ക്രിസ്തുവിന്റെ കല്പനപ്രകാരം തിരുസഭയുടെ ആരംഭം മുതൽ വിശുദ്ധ കുർബാനയ്ക്ക് വലിയ പ്രാധാന്യം നൽകിയിരുന്നു. “അവർ അപ്പസ്തോലന്മാരുടെ പ്രബോധനം, കൂട്ടായ്മ, അപ്പം മുറിക്കൽ, പ്രാർത്ഥന എന്നിവയിൽ സാദാ താല്പര്യപൂർവം പങ്കുചേർന്നു" (അപ്പ. 2:42). ഈ നാല് സംഭവങ്ങളാണു വിശുദ്ധ കുർബാനയിൽ ഉൾചേർത്തിരിക്കുന്നത്. അപ്പവും വീഞ്ഞും ക്രിസ്തുവിന്റെ തിരുശരിരവും തിരുക്തവുമായി രൂപാന്തരപ്പെടുന്നു എന്നത് കത്തോലിക്ക സഭയുടെ സ്വന്തമായ കണ്ടെത്തലല്ല. തിരുവചനം ആവർത്തിച്ച് ഉറപ്പിക്കുന്നതാണ്. “നാം ആശീർവദിക്കുന്ന അനുഗ്രഹത്തിന്റെ പാനപാത്രം ക്രിസ്തുവിന്റെ രക്തത്തിലുള്ള ഭാഗഭാഗിത്വമല്ലേ? നാം മുറിക്കുന്ന അപ്പം ക്രിസ്തുവിന്റെ ശരീരത്തിലുള്ള ഭാഗഭാഗിത്വമല്ലേ?” (1 കോറി 10:16). ക്രിസ്തുവിന്റെ ശരീരത്തിലുള്ള ഭാഗഭാഗിത്വമായ അപ്പവും അവിടുത്തെ രക്തത്തിലുള്ള ഭാഗഭാഗിത്വമായ വീഞ്ഞും അൾത്താരയിൽ നിന്നു ക്രിസ്തുവിന്റെ ശരീരരക്തങ്ങളായി സ്വീകരിക്കുമ്പോഴാണ് എല്ലാവരും പലരായിരുന്നാലും, ക്രിസ്തുവിൽ ഏകശരീരത്തിന്റെ ഭാഗമാകുന്നത്. “അപ്പം ഒന്നേയുള്ളൂ. അതിനാൽ, പലരായിരിക്കുന്ന നാം ഒരു ശരീരമാണ്. എന്തെന്നാൽ, ഒരേ അപ്പത്തിൽ നാം ഭാഗഭാക്കുകളാണ് (1 കോറി 10: 16,17). ക്രിസ്തുവിന്റെ ശരീരരക്തങ്ങൾ സ്വീകരിക്കുമ്പോൾ വിശ്വാസികൾ അവിടുത്തെ മൗതിക ശരീരത്തിന്റെ അംഗങ്ങളാകുന്നു. ഈ ഐക്യത്തിനുവേണ്ടിയാണ് അവിടുന്നു വിശുദ്ധ കുർബാന സ്ഥാപിച്ചത്. ഇത് തികച്ചും തിരുവചനാധിഷ്ഠിതമാണ്.

Living faith series : 8 (ചോദ്യം:2)

Living faith series : 8 (ചോദ്യം:2) Fr. George Panamthottam CMI വിശുദ്ധ കുർബാന 1 കോറി 11:23-26 മത്തായി 26 : 26-28 ലൂക്കാ 22:19 അപ്പ. 2:42 1 കോറി 10:16 1 കോറി 10: 16 നിങ്ങൾക്കുവേണ്ടിയുള്ള എന്റെ ശരീരമാണ്. എന്റെ ഓർമ്മയ്ക്കായി നിങ്ങൾ ഇതു ചെയ്യുവിൻ ഇത് എന്റെ രക്തത്തിലുള്ള പുതിയ ഉടമ്പടിയാണ് പ്രബോധനം കൂട്ടായ്മ അപ്പം മുറിക്കൽ പ്രാർത്ഥന Bible Theology Church Teachings