കത്തോലിക്കാ വൈദികരോ ദേവാലയങ്ങളോ ഇല്ലാത്ത സ്ഥലങ്ങളിൽ ജീവിക്കുന്ന കത്തോലിക്കാ വിശ്വാസികൾക്ക് അകത്തോലിക്കാ സഭകളിൽ നിന്ന് വിശുദ്ധ കുർബാനയോ മറ്റുകൂദാശകളോ സ്വീകരിക്കാൻ അനുവാദമുണ്ടോ ?

Authored by : Syro-Malabar Catechetical Commission On 02-Jun-2021

കത്തോലിക്കാ സഭാസമൂഹങ്ങളുടെ അഭാവമുള്ള സ്ഥലങ്ങളിൽ ചില അകത്തോലിക്കാ സഭകളുടെ വിശുദ്ധകർമ്മങ്ങളിൽ പങ്കെടുക്കുന്നതിന് അനുവാദമുണ്ട് . വിവിധ അകത്തോലിക്കാസഭകളെ അവയുടെ ദൈവശാസ്ത്രവും കൂദാശകളുടെ വാസ്തവികതയും പരിഗണിച്ച് പല തലങ്ങളായി ( grades ) തിരിച്ചിരിക്കുന്നു . അവയിൽ ഒരു വിഭാഗത്തെ സഹോദരി സഭകൾ ( Sister churchs ) എന്നുവിളിക്കുന്നു . ഏഴു കൂദാശകളും കത്തോലിക്കാ സഭയിലെ കൂദാശകൾ പോലെ തന്നെ അംഗീകരിക്കപ്പെടുന്ന സഭകളാണവ ( ഉദാ : കേരളത്തിലെ യാക്കോബായ സഭ ) . ഇപ്രകാരം കത്തോലിക്കാസഭ അംഗീകരിക്കുന്ന് ഏഴുകൂദാശകൾ കത്തോലിക്കാ സഭയിലേതുപോലെ കണക്കാക്കപ്പെടുന്ന സഭകളാണെങ്കിൽ ആ സഭകളിൽനിന്ന് മൂന്നുകൂദാശകൾ സ്വീകരിക്കാൻ കത്തോലിക്കർക്കും കത്തോലിക്കാസഭയിൽനിന്ന് ആ മൂന്ന് കൂദാശകൾ സ്വീകരിക്കാൻ അകത്തോലിക്കർക്കും അനുവാദമുണ്ട് . പ്രൊട്ടസ്റ്റന്റ് സമൂഹങ്ങളിൽനിന്നും ആംഗ്ലിക്കൻ സഭയിൽനിന്നും സി . എസ് . ഐ സഭയിൽനിന്നും സാധാരണരീതിയിൽ ഈ കൂദാശകൾ സ്വീകരിക്കാൻ പാടില്ല . ആ സഭകളിലെ ഏഴുകൂദാശകളും കത്തോലിക്കാസഭ വാസ്തവമായി അംഗീകരിക്കുന്നില്ല എന്നതാണ് കാരണം , എന്നാൽ യാക്കോബായ സഭയിൽനിന്ന് കൂദാശകൾ സ്വീകരിക്കാൻ സഭ അനുവദിച്ചിട്ടുണ്ട് . കാരണം അവരുടെ ഏഴുദാശകളും സ്വീകാര്യമാണ് . അതുപോലെ കത്തോലിക്കാസഭയുടെ ഏഴ് കൂദാശകളും അവർക്കും സ്വീകാര്യമാണ് . അങ്ങനെയുള്ള സഭകളിൽനിന്ന് മൂന്ന് കൂദാശകൾ - കുമ്പസാരം , രോഗീലേപനം , വിശുദ്ധ കുർബാന സ്വീകരിക്കാൻ അനുവാദമുണ്ട് ( യാക്കോബായക്കാർ നടത്തുന്ന ഒരു ഹോസ്റ്റലിൽ താമസിക്കുന്ന ഒരു കത്തോലിക്കാകുട്ടിക്ക് കത്തോലിക്കാപള്ളിയോ കത്തോലിക്കാ വൈദികരോ അടുത്തില്ലാത്ത സാഹചര്യത്തിൽ ഞായറാഴ്ചകളിൽ യാക്കോബായ കുർബ്ബാനയിൽ പങ്കെടുത്ത് കുർബാനസ്വീകരിക്കാനും കുമ്പസാരിക്കാനും അനുവാദമുണ്ട് ) . കത്തോലിക്കാപള്ളിയോ കത്തോലിക്കാ വൈദികനോ ലഭ്യമല്ലെങ്കിൽ മാത്രമേ ഈ അനുവാദം ഉപയോഗിക്കാവു . അതുപോലെതന്നെ ഒരു കത്തോലിക്കാ സ്ഥാപനത്തിൽ അല്ലെങ്കിൽ ഹോസ്റ്റലിൽ താമസിക്കുന്ന ഒരു യാക്കോബായ സമൂഹാംഗത്തിന് ഞായറാഴ്ച അവരുടെ കുർബ്ബാനയിൽ സംബന്ധിക്കാൻ അവസരം ഇല്ലെങ്കിൽ ആ വ്യക്തിക്ക് കത്തോലിക്കാപള്ളിയിൽ കുർബ്ബാന് സ്വീകരിക്കുന്നതിനും , മരണകരമായ സാഹചര്യത്തിൽ രോഗീലേപനം സ്വീകരിക്കുന്നതിനും പാപാവസ്ഥയിൽ കുമ്പസാരിക്കുന്നതിനും അനുവാദമുണ്ട് . ഭാരതത്തിലെ കത്തോലിക്കരെ സംബന്ധിച്ച് ഇക്കാര്യങ്ങൾക്ക് ഔദ്യോഗികമായി അനുവദിച്ചിട്ടുള്ള സഭ യാക്കോബായ സഭയാണ് .

(സീറോ മലബാർ മതബോധന കമ്മീഷൻ പുറത്തിറക്കിയ വിശ്വാസ വഴിയിലെ സംശയങ്ങൾ എന്ന പുസ്തകത്തിൽ നിന്നും)

catholic priests catholic church holy mass sacraments Bible Theology Church Teachings