എല്ലാ വിശ്വാസികളും ശുശ്രൂഷകരല്ലേ. പിന്നെയെന്താണ് കത്തോലിക്കാ പുരോഹിതർ ശുശ്രൂഷാ പുരോഹിതർ എന്ന് പ്രത്യേകം വിളിക്കപ്പെടുന്നത്?

Authored by : Fr. George Panamthottam CMI On 18-Oct-2022

കത്തോലിക്കാ സഭയിൽ പൊതു പൗരോഹിത്യത്തിലൂടെ മാമ്മോദീസാ സ്വീകരിക്കുന്ന എല്ലാ വിശ്വാസികളും ക്രിസ്തുവിന്റെ രാജകീയ പൗരോഹിത്യത്തിൽ പങ്കുചേരുന്നു. ഈ അർത്ഥത്തിലാണ് എല്ലാ വിശ്വാസികളും ശുശ്രൂഷകരാകുന്നത്. എന്നാൽ, പുരോഹിതൻ കർത്താവിന്റെ പ്രത്യേക ശുശ്രൂഷകനാണെന്ന് തിരുവചനം പറയുന്നു. “കർത്താവിന്റെ ശുശ്രൂഷകരായ പുരോഹിതന്മാർ പൂമുഖത്തിനും ബലിപീഠത്തിനും മധ്യേനിന്നു കരഞ്ഞുകൊണ്ട് പ്രാർത്ഥിക്കട്ടെ” (ജോയേ. 2:17). “അഹറോനെ നീ വിശുദ്ധ വസ്ത്രങ്ങളണിയിക്കുകയും അഭിഷേചിച്ചു ശുദ്ധീകരിക്കുകയും വേണം. അങ്ങനെ അവൻ പുരോഹിത പദവിയിൽ എന്നും ശുശ്രൂഷിക്കട്ടെ. അവന്റെ പുത്രന്മാരെ കൊണ്ടുവന്ന് അങ്കികളണിയിക്കണം. അവരുടെ പിതാവിനെ അഭിഷേചിച്ചതുപോലെ അവരെയും അഭിഷേകം ചെയ്യണം. പുരോഹിതരെന്ന നിലയിൽ അവരെനിക്കു ശുശ്രൂഷ ചെയ്യട്ടെ. അവരുടെ ഈ അഭിഷേകം അവരെ തലമുറകളിലൂടെ നിലനിൽക്കുന്ന നിത്യപൗരോഹിത്യത്തിന്റെ ഭാഗഭാക്കുകളാക്കും” (പുറ. 40 : 13-15).

പുതിയ നിയമത്തിലെ പുരോഹിതർ ശുശ്രൂഷയുടെ പുരോഹിതരാണ്. ക്രിസ്തു അരുളിച്ചെയ്തു: “എന്നെ ശുശ്രൂഷിക്കാൻ ആഗ്രഹിക്കുന്നവൻ എന്നെ അനുഗമിക്കട്ടെ. അപ്പോൾ, ഞാൻ ആയിരിക്കുന്നിടത്ത് എന്റെ ശുശ്രൂഷകനും ആയിരിക്കും” (യോഹ. 12:26). വിശുദ്ധ പൗലോസ് പറയുന്നു. “ദൈവത്തിന്റെ കൃപാവരത്താൽ ഞാൻ ഈ സുവിശേഷത്തിന്റെ ശുശ്രൂഷകനായി" (എഫേ. 3:7). “നിങ്ങൾക്കുവേണ്ടിയുള്ള ക്രിസ്തുവിന്റെ വിശ്വസ്തനായ ശുശ്രൂഷകനാണ് അവൻ" (കോളോ. 1:7). “എന്നെ ശക്തിപ്പെടുത്തുന്ന നമ്മുടെ കർത്താവായ യേശുക്രിസ്തുവിന് ഞാൻ നന്ദി പറയുന്നു. എന്തെന്നാൽ, തന്റെ ശുശ്രൂക്ഷയ്ക്കായി എന്നെ നിയമിച്ചുകൊണ്ടു അവൻ എന്നെ വിശ്വസ്തനായി കണക്കാക്കി” (1 തിമോ. 1-12). “അവിടുന്നു ഞങ്ങളെ എഴുതപ്പെട്ട നിയമത്താലല്ല, ആത്മാവിനാൽ പുതിയ ഉടമ്പടിയുടെ ശുശ്രൂഷകരാകാൻ യോഗ്യരാക്കിയിരിക്കുന്നു” (2 കോറി. 3:6). ക്രിസ്തു തന്റെ പൗരോഹിത്യത്തിലൂടെ ശുശ്രൂഷയുടെ പാഠങ്ങൾ പഠിപ്പിച്ചു. അതിനാൽ അവിടുത്തെ നിത്യപൗരോഹിത്യത്തിൽ പങ്കുചേരാൻ വിളിക്കപ്പെടുന്ന പുരോഹിതനെ ശുശ്രൂഷാ പുരോഹിതൽ എന്നാണു വിളിക്കുന്നത്.

Living faith series :7 (ചോദ്യം:2)

പുരോഹിതൻ കർത്താവിന്റെ പ്രത്യേക ശുശ്രൂഷകൻ Fr. George Panamthottam CMI എല്ലാ വിശ്വാസികളും ശുശ്രൂഷകർ Living faith series :7 (ചോദ്യം:2) ജോയേ. 2:17 പുറ. 40 : 13-15 യോഹ. 12:26 എഫേ. 3:7 കോളോ. 1:7 1 തിമോ. 1-12 2 കോറി. 3:6 Bible Theology Church Teachings