(1 തിമോ. 3:2). ഈ വചനാടിസ്ഥാനത്തിൽ മെത്രാന്മാർക്ക് വിവാഹം കഴിക്കാൻ തിരുവചനം അനുവാദം നൽകുന്നുണ്ടോ?

Authored by : Fr. George Panamthottam CMI On 18-Oct-2022

വിശുദ്ധ പൗലോസ് പറയുന്നു: "മെത്രാൻ ആരോപണങ്ങൾക്കതീതനും ഏകഭാര്യയുടെ ഭർത്താവും സംയമിയും വിവേകിയും അച്ചടക്കമുള്ളവനും അതിഥി സൽകാരപ്രിയനും യോഗ്യനായ പ്രബോധകനുമായിരിക്കണം” (1 തിമോ. 3:2). ഈ വചനാടിസ്ഥാനത്തിൽ മെത്രാന്മാർക്ക് വിവാഹം കഴിക്കാൻ തിരുവചനം അനുവാദം നൽകുന്നുണ്ടോ?

വിശുദ്ധ പൗലോസ് മെത്രാന്മാരെയും ശ്രേഷ്ഠന്മാരെയും നിയമിക്കുന്നതിനെക്കുറിച്ചു നല്കിയ ഈ നിർദ്ദേശപ്രകാരം മെത്രാന്മാർ വിവാഹിതരാകണം എന്നർത്ഥമുണ്ടോ? എങ്കിൽപ്പിന്നെ വിശുദ്ധ പൗലോസ് എന്തുകൊണ്ട് ബ്രഹ്മചാരിയായിരുന്നു? “അവിവാഹിതരോടും വിധവകളോടും ഞാൻ പറയുന്നു. എന്നെപോലെ ആയിരിക്കുന്നതാണ് അവർക്ക് നല്ലത്” (1 കോറി 7:8). വിശുദ്ധ പൗലോസിന്റെ നേതൃത്വത്തിൽ ഓരോ പ്രദേശത്ത് സഭകൾ രൂപപ്പെടുത്തി ആ സഭയെ നയിക്കാൻ മെത്രാന്മാരെയും ശ്രേഷ്ഠരെയും നിയോഗിച്ചിരുന്നു. ബഹുഭാര്യാത്വം നിലവിലിരുന്ന കാലഘട്ടമായിരുന്നത്. അവിവാഹിതരിൽ നിന്നും മെത്രാൻ സ്ഥാനത്തേയ്ക്ക് യോഗ്യരായവരെ ലഭിക്കാതിരുന്നതിനാൽ വിവാഹിതരെ തിരഞ്ഞെടുക്കാമെന്നും തിരഞ്ഞെടുക്കുമ്പോൾ ഏകഭാര്യയുടെ ഭർത്താവായവരെ മാത്രമേ നിയോഗിക്കാവൂ എന്നുമാണു വിശുദ്ധ പൗലോസ് ഇവിടെ ഉദ്ദേശിക്കുന്നത്. അല്ലാതെ വിവാഹം ചെയ്തവർ മാത്രമേ മെത്രാന്മാരാവാൻ പാടുള്ളൂ എന്നോ മെത്രാന്മാർക്ക് ഏകഭാര്യത്വം ആകാമെന്നോ ഈ വചനംകൊണ്ട് അർത്ഥമില്ല.

പഴയ നിയമത്തിൽ പുരോഹിതൻ ബലിയർപ്പണത്തിനു മുമ്പ് ഭാര്യയിൽനിന്ന് അകന്നിരിക്കണമെന്ന നിയമമുണ്ടായിരുന്നു. “പുരോഹിതൻ ദാവീദിനോട് പറഞ്ഞു: വിശുദ്ധയപ്പമല്ലാതെ സാധാരണയപ്പം എന്റെ കൈവശമില്ല. നിന്റെ ഭൃത്യന്മാർ സ്ത്രീകളിൽ നിന്നകന്നുനിന്നവരാണെങ്കിൽ മാത്രമേ തരികയുള്ളൂ. ദാവീദ് പറഞ്ഞു: സത്യമായി ഞാൻ യാത്ര പോകുമ്പോഴൊക്കെ സ്ത്രീകളിൽ നിന്നകന്നിരിക്കും. സാധാരണ യാത്രയിൽപ്പോലും എന്റെ ഭൃത്യന്മാരുടെ പാത്രങ്ങൾ ശുദ്ധിയുള്ളവയായിരിക്കും. അതിലെത്രയോ അധികമായി ഇന്ന്. പുരോഹിതൻ അവനു വിശുദ്ധയപ്പം കൊടുത്തു" (1 സാമു 21: 4,5). പഴയനിയമത്തിൽ ഇത്രയധികം ശുദ്ധി പാലിച്ചിരുന്നെങ്കിൽ പുതിയ നിയമത്തിൽ ക്രിസ്തുവിന്റെ ശരീരരക്തങ്ങൾ അനുദിനം പരികർമ്മംചെയ്യുന്ന വൈദികർ ആത്മാവിലും ശരീരത്തിലും എത്രയധികമായി ശുദ്ധത പാലിക്കേണ്ടവരാണ്. ഈ ശുദ്ധത എന്ന പുണ്യമാണ് മെത്രാന്മാരും വൈദികരും ബ്രഹ്മചര്യത്തിലൂടെ അനുഷ്ഠിക്കുന്നത്.

Living faith series : 7 (ചോദ്യം:4)

1 കോറി. 7:38 Fr. George Panamthottam CMI 1 സാമു 21: 4 Living faith series : 7 (ചോദ്യം:4) Bible Theology Church Teachings