പത്രോസ് പൗലോസ് ശ്ലീഹന്മാരോടുള്ള നൊവേന

Authored by : Liturgical commission, Diocese of Mananthavady On 10-Jul-2024

പത്രോസ് പൗലോസ് ശ്ലീഹന്മാരോടുള്ള നൊവേന

സഭാചരിത്രത്തിലെ പ്രകാശഗോപുരങ്ങളാണ് വി. പത്രോസും പൗലോസും. ഈശോയുടെ സഭയെ ലോകത്തിൽ നയിക്കുകയും പരിപാലിക്കുകയും ചെയ്‌ത ശ്ലൈഹികതീക്ഷ്‌ണതയുടെ ഉത്തമ ഉദാഹരണങ്ങളാണ് ഇവർ. "പത്രോസേ നീ പാറയാകുന്നു, നിൻ്റെ മേൽ എൻ്റെ സഭ ഞാൻ സ്ഥാപിക്കും” എന്ന് അരുളിചെയ്‌ത മിശിഹാ സഭയുടെ ആദ്യത്തെ വലിയ ഇടയനായി പത്രോസിനെ നിയോഗിച്ചു. തീക്ഷ്‌ണത കൊണ്ട് സഭയെ പീഡിപ്പിച്ചിരുന്ന പൗലോസിൻ്റെ മാനസാന്തരവും മിശിഹായുടെ നേരിട്ടുള്ള ഇടപെടലിലൂടെയാണ് സാധ്യമാകുന്നത്. അതിശക്തമായ നേതൃത്വവും അതിതീക്ഷ്‌ണമായ വിശ്വാസപ്രഘോഷണവും ജീവിതസാക്ഷ്യവും വഴിയായി രക്തസാക്ഷിത്വം വരിച്ച ഈ ശ്ലീഹന്മാരോട് ചേർന്ന് നമുക്കും പ്രാർത്ഥിക്കാം.

തിരുനാൾ ദിനം : ജൂൺ 29

പ്രാരംഭഗാനം

(നിത്യസഹായമാതേ..... എന്ന രീതി)

വിശുദ്ധ പത്രോസ് പൗലോസ്
സഭയുടെ തേരാളികളെ
ദൈവത്തിൻ സവിധെയെന്നും
ഞങ്ങൾക്കായ് പ്രാർത്ഥിക്കണേ

വിശ്വാസതീക്ഷ്‌ണതയാൽ
സകലം പരിത്യജിച്ച്
സഭയെ വളർത്തുവാനായി
പ്രാണനർപ്പിച്ചു നിങ്ങൾ

സ്വർഗ്ഗീയഗേഹമതിൽ
നിത്യസമ്മാനിതരായി
വാണരുളീടും താതർ
ഞങ്ങൾക്കായ് പ്രാർത്ഥിക്കണേ

കാർമ്മി: കാരുണ്യവാനായ കർത്താവേ, നിൻ്റെ ശിഷ്യപ്രധാനരായ പത്രോസ് പൗലോസ് ശ്ലീഹന്മാരെ എപ്പോഴും സഹയമരുളുവാൻ സന്നദ്ധതയുള്ള മദ്ധ്യസ്ഥരായി അങ്ങു ഞങ്ങൾക്കു നല്‌കിയല്ലോ. ഈ വിശുദ്ധ ശ്ലീഹന്മാരുടെ സന്നിധിയിൽ പ്രത്യാശപൂർവ്വം ഓടിയണഞ്ഞ് അവരുടെ മാദ്ധ്യസ്ഥം അപേക്ഷിക്കുന്ന ഞങ്ങൾ നിൻ്റെ രക്ഷയുടെ ഫലം എന്നും അനുഭവിക്കുവാൻ അനുഗ്രഹിക്കണമെന്ന് ഞങ്ങൾ പ്രാർത്ഥിക്കുന്നു. സകലത്തിൻ്റെയും നാഥാ, എന്നേക്കും,

സമൂ: ആമ്മേൻ

കാർമ്മി: സത്യസഭയെ വിശ്വാസത്തിലുറപ്പിച്ചു വളർത്തിയ പത്രോസ് പൗലോസ് ശ്ലീഹന്മാരെ,

സമൂ: വിശ്വാസത്തിൽ ആഴപ്പെടുവാൻ ഞങ്ങൾക്കുവേണ്ടി പ്രാർത്ഥിക്കണമേ.

കാർമ്മി: ശ്ലീഹന്മാരിൽ പ്രധാനിയും (സമൂഹവും ചേർന്ന്)/ സത്യസഭാസംരക്ഷകനുമായി/ ദിവ്യരക്ഷകനാൽ നിയോഗിക്കപ്പെട്ട വി. പത്രോസ് ശ്ലീഹായേ/ അങ്ങയുടെ സഭാനേതൃത്വത്തെ ഞങ്ങൾ ഏറ്റു പറയുന്നു./ അങ്ങേ മദ്ധ്യസ്ഥശക്തിയിൽ ഞങ്ങൾ അഭയം തേടുന്നു./ ആയിരങ്ങളെ സത്യവിശ്വാസത്തിലേക്കാനയിച്ച വി. പത്രോസേ/ അങ്ങേ ജീവിതമാതൃകയിൽ നിന്ന്/ അചഞ്ചലമായ വിശ്വാസവും നിഷ്‌കളങ്കമായ ഗുരുഭക്തിയും/ അഗാധമായ എളിമയും തെറ്റുകളിന്മേലുള്ള പശ്ചാത്താപവും/ പാപികളായ ഞങ്ങൾക്കും പകർന്നു നല്‌കണമേ./ ബഞ്ചമിൻ ഗോത്രത്തിൽ ജനിച്ചു വളർന്ന്/ ദൈവാനുഗ്രഹത്തിൻ്റെ അത്ഭുതശക്തിയാൽ മാനസാന്തരപ്പെട്ട്/ ഈശോയുടെ ധീരപ്രേഷിതനായി ശിഷ്‌ടായുസ്സു സമർപ്പിച്ച വിശുദ്ധ പൗലോസ് ശ്ലീഹായേ,/ ഞങ്ങൾ അങ്ങയുടെ സഹായം തേടുന്നു./ അഗാധപണ്ഡിതനും മിശിഹായുടെ ധീരപ്രേഷിതനുമായ അങ്ങ്/ ഞങ്ങൾക്കു കാണിച്ചുതന്ന/ സ്നേഹത്തിൻ്റെയും ത്യാഗത്തിൻ്റെയും ജീവിതം അനുകരിക്കുവാൻ/ ഞങ്ങൾക്കുവേണ്ടി പ്രാർത്ഥിക്കണമേ./ ആമ്മേൻ.

സങ്കീർത്തനം (57)

കാർമ്മി: എന്നോടു കൃപയുണ്ടാകണമേ, ദൈവമേ, എന്നോടു കൃപതോന്നണമേ.

സമൂ: എന്നോടു കൃപയുണ്ടാകണമേ, ദൈവമേ, എന്നോടു കൃപ തോന്നണമേ.

കാർമ്മി: വിനാശത്തിൻ്റെ കൊടുങ്കാറ്റ് കടന്നുപോകുവോളം അങ്ങയുടെ ചിറകിൻകീഴിൽ ഞാൻ അഭയം തേടുന്നു.

സമൂ: എന്നോടു കൃപയുണ്ടാകണമേ, ദൈവമേ, എന്നോടു കൃപ തോന്നണമേ.

കാർമ്മി: അത്യുന്നതനായ ദൈവത്തെ ഞാൻ വിളിച്ചപേക്ഷിക്കുന്നു; എനിക്കു വേണ്ടി എല്ലാം ചെയ്‌തു തരുന്ന ദൈവത്തെത്തന്നെ.

സമൂ: എന്നോടു കൃപയുണ്ടാകണമേ, ദൈവമേ, എന്നോടു കൃപ തോന്നണമേ.

കാർമ്മി: പിതാവിനും പുത്രനും പരിശുദ്ധാത്മാവിനും സ്‌തുതി.

സമൂ: ആദിമുതൽ എന്നേക്കും ആമ്മേൻ.

കാറോസൂസ

കാർമ്മി: നമുക്കെല്ലാവർക്കും വിശ്വാസത്തോടും പ്രതീക്ഷയോടും കൂടെ ദൈവകൃപയിൽ ആശ്രയിച്ചുകൊണ്ട് വി. പത്രോസ് പൗലോസ് ശ്ലീഹന്മാരെ, ഈശോയോട് അപേക്ഷിക്കണമേ എന്ന് പ്രാർത്ഥിക്കാം.