ആരാണു പ്രായശ്ചിത്തകൂദാശ സ്ഥാപിച്ചത്?

Authored by : Congregation for Doctrine of Faith On 19-Jul-2022

യേശു തന്നെയാണ് പ്രായശ്ചിത്തകൂദാശ സ്ഥാപിച്ചത്. ഈസ്റ്റർ ദിനത്തിൽ അവിടന്ന് തൻ്റെ അപ്പസ്തോലന്മാർക്ക് കാണപ്പെടുകയും “നിങ്ങൾ പരിശുദ്ധാത്മാവിനെ സ്വീകരിക്കുവിൻ. നിങ്ങൾ ആരുടെ പാപങ്ങൾ ക്ഷമിക്കുന്നുവോ അവ അവരോടു ക്ഷമിക്കപ്പെട്ടിരിക്കും. നിങ്ങൾ ആരുടെ പാപങ്ങൾ ബന്ധിക്കുന്നുവോ അവ ബന്ധിക്കപ്പെട്ടിരിക്കും” (യോഹ 20:22a-23) എന്നിങ്ങനെ കല്പിക്കുകയും ചെയ്തപ്പോൾ അതു സ്ഥാപിച്ചു. 

പ്രായശ്ചിത്തകൂദാശയിൽ എന്തു സംഭവിക്കുന്നുവെന്നത് ധൂർത്ത പുത്രൻ്റെ ഉപമയിൽ യേശു വളരെ മനോഹരമായി വിവരിച്ചിട്ടുണ്ട്. അതിലേറെ മനോഹരമായി മറ്റാെരിടത്തും വ്യക്തമാക്കിയിട്ടില്ല. നാം വഴിതെറ്റി അലയുന്നു. നാം നഷ്ടപ്പെടുന്നു. നമുക്ക് ചെറുത്തു നില്ക്കാൻ കഴിയുന്നില്ല. എന്നാലും നമ്മുടെ പിതാവ്, വലിയ യഥാർത്ഥത്തിൽ അനന്തമായ, ആഗ്രഹത്തോടെ നമ്മെ കാത്തിരിക്കുന്നു. നാം തിരിച്ചു വരുമ്പോൾ നമ്മോടു ക്ഷമിക്കുന്നു. അവിടന്ന് വീണ്ടും സ്വീകരിക്കുന്നു. പാപങ്ങൾ ക്ഷമിക്കുന്നു. യേശു തന്നെ അനേകം വ്യക്തികളുടെ പാപങ്ങൾ ക്ഷമിച്ചു. അദ്ഭുതകൃത്യങ്ങൾ പ്രവർത്തിക്കുന്നതിനെക്കാൾ പ്രാധാന്യമുള്ളതായി അതിനെ അവിടന്നു കരുതി. ദൈവരാജ്യത്തിൻ്റെ ഉദയത്തിൻ്റെ മഹത്തായ അടയാളമായി അവിടന്ന് അതിനെ പരിഗണിച്ചു. ദൈവരാജ്യോദയത്തിൽ എല്ലാ മുറിവുകളും സുഖമാക്കപ്പെടും, കണ്ണുനീർ മുഴുവനും തുടച്ചുമാറ്റപ്പെടും.യേശു പരിശുദ്ധാത്മാവിൻ്റെ അധികാരത്തിൽ പാപങ്ങൾ പൊറുത്തു. അവിടന്ന് ആ അധികാരം അപ്പസ്തോലന്മാർക്കു നല്കി. നാം വൈദികരെ സമീപിച്ചു കുമ്പസാരിക്കുമ്പോൾ നമ്മുടെ സ്വർഗീയ പിതാവിൻ്റെ തൃക്കരങ്ങളിലേക്കു നാം വീഴുകയാണ്.

കത്തോലിക്കാസഭയുടെ യുവജന മതബോധനഗ്രന്ഥം(ചോദ്യം:227)

sacrament confession sacrament of penance കത്തോലിക്കാ സഭയുടെ മതബോധനഗ്രന്ഥം മതബോധനഗ്രന്ഥം പ്രായശ്ചിത്തകൂദാശ youcat 227 ആരാണു പ്രായശ്ചിത്തകൂദാശ സ്ഥാപിച്ചത്? Bible Theology Church Teachings