ക്രിസ്ത്യാനികളെ സംബന്ധിച്ചിടത്തോളം പുതിയ നിയമത്തിന് എന്തു പ്രാധാന്യമാണുള്ളത്?

Authored by : Congregation for Doctrine of Faith On 17-Aug-2022

പുതിയനിയമത്തിൽ ദൈവത്തിൻ്റെ വെളിപാട് പൂർണമാകുന്നു. മത്തായി, മർക്കോസ്, ലൂക്കാ, യോഹന്നാൻ എന്നിവരുടെ നാലു സുവിശേഷങ്ങൾ വിശുദ്ധ ലിഖിതങ്ങളുടെ കേന്ദ്രമാണ്. സഭയുടെ ഏറ്റവും വിലപ്പെട്ട നിധിയുമാണ്. അവയിൽ ദൈവപുത്രൻ, താൻ ആയിരിക്കുന്നതുപോലെ സ്വയം വെളിപ്പെടുത്തുകയും നമ്മെ കണ്ടുമുട്ടുകയും ചെയ്യുന്നു. അപ്പസ്തോലന്മാരുടെ പ്രവർത്തനങ്ങളിൽ സഭയുടെ ആരംഭത്തെയും പരിശുദ്ധാത്മാവിൻ്റെ പ്രവർത്തനങ്ങളെയും കുറിച്ച് നാം പഠിക്കുന്നു. അപ്പസ്തോലന്മാർ എഴുതിയ ലേഖനങ്ങളിൽ മനുഷ്യജീവിതത്തിൻ്റെ എല്ലാ മുഖങ്ങളും ക്രിസ്തുവിൻ്റെ പ്രകാശത്തിൽ സ്ഥാപിച്ചിരിക്കുന്നു. വെളിപാടിൻ്റെ പുസ്തകത്തിൽ യുഗങ്ങളുടെ അവസാനം നാം മുൻകൂട്ടി കാണുന്നു.

ദൈവം നമ്മോടു പറയാൻ ആഗ്രഹിച്ചതെല്ലാം യേശു ആണ്. പഴയനിയമം മുഴുവനും ദൈവപുത്രൻ്റെ മനുഷ്യാവതാരത്തിനുള്ള തയ്യാറെടുപ്പാണ്. ദൈവത്തിൻ്റെ എല്ലാ വാഗ്ദാനങ്ങളും യേശുവിൽ പൂർത്തിയാകുന്നു. ഒരു ക്രിസ്ത്യാനിയായിരിക്കുക എന്നതിൻ്റെ അർത്ഥം ക്രിസ്തുവിൻ്റെ ജീവിതത്തോട് കൂടുതൽ കൂടുതൽ ആഴത്തിൽ ഐക്യപ്പെട്ടിരിക്കുകയെന്നതാണ്. അങ്ങനെ ചെയ്യാൻ സുവിശേഷം വായിക്കുകയും അതനുസരിച്ചു ജീവിക്കുകയും വേണം. മഡേലിൻ ഡെൽബ്രെൽ ഇപ്രകാരം പറയുന്നു: “താൻ ആരാണെന്നും താൻ എന്താണ് ആവശ്യപ്പെടുന്നതെന്നും ദൈവം തൻ്റെ ദിവ്യവചനത്തിലൂടെ പറയുന്നു; അവിടന്ന് അതു സുനിശ്ചിതമായി പറയുന്നു. ഓരോ ദിവസവും പറയുന്നു. പുതിയ സ്ഥലത്തും പുതിയ കാലത്തിലും പുതിയ മാനുഷിക പശ്ചാത്തലത്തിലും തൻ്റെ ജീവിതം പുതുതായി തുടങ്ങുന്നതിന് നമ്മിൽ ശരീരം ധരിക്കുകയും നമ്മെ സ്വന്തമാക്കുകയും ചെയ്യാൻ ആഗ്രഹിക്കുന്ന ദിവ്യവചനം സുവിശേഷത്തിലുണ്ടെന്ന് സുവിശേഷം കൈയിലെടുക്കുമ്പോൾ നാം ചിന്തിക്കണം".

കത്തോലിക്കാസഭയുടെ യുവജന മതബോധനഗ്രന്ഥം(ചോദ്യം:18)

bible new testament ബൈബിൾ youcat 18 significance of new testament കത്തോലിക്കാസഭയുടെ യുവജന മതബോധനഗ്രന്ഥം ക്രിസ്ത്യാനികളെ സംബന്ധിച്ചിടത്തോളം പുതിയ നിയമത്തിന് എന്തു പ്രാധാന്യമാണുള്ളത്? Bible Theology Church Teachings