വാടകമാതൃത്വത്തെയും കൃത്രിമ ബീജസങ്കലനത്തെയും കുറിച്ച് സഭയുടെ വിധിതീർപ്പ് എന്താണ്?

Authored by : Congregation for Doctrine of Faith On 08-Aug-2022

മൂന്നാമത് ഒരാൾ ഇടയ്ക്ക് കയറിവരുകയാൽ മാതൃത്വ പിതൃത്വത്തിൻ്റെ പൊതുബന്ധം ശിഥിലമാക്കുയോ നശിപ്പിക്കുയോ ചെയ്യുമ്പോൾ, അല്ലെങ്കിൽ ഗർഭധാരണം വിവാഹജീവിതത്തിലെ ലൈംഗികസംയോഗത്തിനു വെളിയിലുള്ള സാങ്കേതികവിദ്യാപരമായ ഒരു പ്രവൃത്തിയായിത്തീരുമ്പോൾ, ഗവേഷണവും ഔഷധവും വഴി ഒരു ശിശുവിനെ ഗർഭം ധരിക്കുന്നതിലുള്ള എല്ലാ സഹായവും നിറുത്തണം.

ഒരു ശിശുവിനെ പരകീയമോ സ്വകീയമോ ആയ ബീജമോ അണ്ഡമോ സ്വീകരിച്ച് സാങ്കേതികവിദ്യാപരമായി കൃത്രിമ ബീജസങ്കലനം വഴി ഗർഭധാരണം നടത്തുന്ന സമ്പ്രദായം മനുഷ്യമഹത്വത്തോടുള്ള ആദരംമൂലം സഭ അംഗീകരിക്കുന്നില്ല. ഓരോ ശിശുവിനും ദൈവത്തിൻ്റെ പദ്ധതി പ്രകാരം ഒരമ്മയും ഒരപ്പനുമുണ്ടായിരിക്കാനും അവൻ്റെ മാതാപിതാക്കളെ അറിയാനും ഏതെങ്കിലും വിധത്തിൽ സാധിക്കുമെങ്കിൽ അവരുടെ സ്നേഹത്താൽ ചുറ്റപ്പെട്ട് വളരാനും അവകാശമുണ്ട്. അന്യപുരുഷൻ്റെ ബീജം സ്വീകരിച്ച് ഗർഭം ധരിക്കുന്നത് (പരബീജസങ്കലനം) വിവാഹത്തിൻ്റെ ചൈതന്യം നശിപ്പിക്കുന്നു. വിവാഹജീവിതത്തിൽ ഭാര്യയ്ക്കും ഭർത്താവിനും ഒരവകാശമുണ്ട്. ജീവിതപങ്കാളിയിലൂടെ മാത്രം അമ്മയോ അപ്പനോ ആകാനുള്ള അവകാശം. എന്നാൽ ഭർത്താവിൽ നിന്നുതന്നെയുള്ള ബീജമെടുത്ത് ബീജസങ്കലനം (homologous insemination) നടത്തിയാലും ശിശുവിനെ സാങ്കേതിക വിദ്യയുടെ ഉത്പന്നമാക്കും. വ്യക്തിപരമായ ലൈംഗിക സംയോഗത്തിൻ്റെ സ്നേഹപൂർണമായ ഐക്യത്തിൽ നിന്നു ജനിക്കാൻ ശിശുവിനെ അനുവദിക്കാതിരിക്കും. ശിശു കേവലം ഒരു ഉത്പന്നമായാൽ ഉത്പന്നത്തിൻ്റെ ഗുണമേന്മയെയും ബാധ്യതയെയും കുറിച്ചുള്ള വിമർശനപരമായ ചോദ്യങ്ങളിലേക്ക് പെട്ടെന്ന് അതു നയിക്കുന്നു. വൈകല്യമുള്ള ഭ്രൂണങ്ങൾ നശിപ്പിക്കുകയെന്ന ലക്ഷ്യത്തോടെ നടത്തുന്ന വൈദ്യശാസ്ത്ര പരിശോധനകളെയും സഭ എതിർക്കുന്നു. കൃത്രിമബീജ സങ്കലനം നടത്തിയുണ്ടായ ഭൂണം അന്യസ്ത്രീയിൽ നിക്ഷേപിച്ചു വളർത്തുന്ന വാടക മാതൃത്വസമ്പ്രദായവും മനുഷ്യമഹത്ത്വത്തിനു വിരുദ്ധമാണ്.

കത്തോലിക്കാസഭയുടെ യുവജന മതബോധനഗ്രന്ഥം (ചോദ്യം: 423)

വാടകമാതൃത്വം കൃത്രിമ ബീജസങ്കലനം surrogate motherhood artificial fertilization കത്തോലിക്കാ സഭയുടെ മതബോധനഗ്രന്ഥം മതബോധനഗ്രന്ഥം youcat 423 വാടകമാതൃത്വത്തെയും കൃത്രിമ ബീജസങ്കലനത്തെയും കുറിച്ച് സഭയുടെ വിധിതീർപ്പ് എന്താണ്? Bible Theology Church Teachings