വിശുദ്ധലിഖിതങ്ങൾ സത്യമാണോ?

Authored by : Catechism of the Catholic church On 19-Jul-2022

"വിശുദ്ധലിഖിതങ്ങളിലെ ഗ്രന്ഥങ്ങൾ ദൃഢമായി വിശ്വസ്തതാപൂർവം തെറ്റുകൂടാതെ സത്യം പഠിപ്പിക്കുന്നു. പരിശുദ്ധാത്മാവിൻ്റെ നിവേശനത്തിൻ കീഴിൽ എഴുതപ്പെട്ട അവയുടെ കർത്താവ് ദൈവമാണ്" ( രണ്ടാം വത്തിക്കാൻ സൂനഹദോസ്, ദൈവാവിഷ്കരണം 11).

ബൈബിൾ അതിൻ്റെ അന്തിമരൂപത്തിൽ സ്വർഗത്തിൽ നിന്നു വീണുകിട്ടിയതല്ല. ദൈവം നേരിട്ടു പറഞ്ഞുകൊടുക്കുകയും മാനുഷിക എഴുത്തുകാർ യാന്ത്രികമായി പകർത്തിയെടുക്കുകയും ചെയ്തതല്ല. പിന്നെയോ "ദൈവം ചില മനുഷ്യരെ തിരഞ്ഞെടുത്തു. അവർ തങ്ങളുടെ മാനുഷിക കഴിവുകളും ബൗദ്ധികശക്തികളും പൂർണമായി ഉപയോഗിച്ചു. അങ്ങനെ അവർ അവയുടെ യഥാർത്ഥ നിർമ്മാതാക്കളായി. എന്നാൽ, ദൈവമാണ് അവരിലും അവർ വഴിയും പ്രവർത്തിച്ചത്. അതുകൊണ്ട് അവിടന്ന് ആവശ്യപ്പെട്ട എല്ലാകാര്യങ്ങളും - അവമാത്രം - അവർ എഴുതി" (രണ്ടാം വത്തിക്കാൻ കൗൺസിൽ, ദൈവാവിഷ്കരണം, നമ്പർ 11). ഏതെങ്കിലും പ്രത്യേക പാഠങ്ങൾ വിശുദ്ധ ലിഖിതമായി അംഗീകരിക്കുന്നതിൻ്റെ ഒരു കാരണം, സഭയിൽ അവ പൊതുവായി അംഗീകരിച്ചിരുന്നുവെന്ന വസ്തുതയാണ്. ക്രൈസ്തവസമൂഹങ്ങളിൽ പൊതുസമ്മതമുണ്ടാകേണ്ടിയിരുന്നു. “അതേ, ഈ പാഠത്തിലൂടെ ദൈവം തന്നെ നമ്മോടു സംസാരിക്കുന്നു. ഇത് പരിശുദ്ധാത്മാവാൽ പ്രചോദിപ്പിക്കപ്പെട്ടതാണ്". ആദിമ കാലത്തെ യഥാർത്ഥ ക്രൈസ്തവലിഖിതങ്ങൾ ധാരാളമുണ്ട്. അവയിൽ ഏതൊക്കെയാണ് യഥാർത്ഥത്തിൽ പരിശുദ്ധാത്മാവാൽ നിവേശിപ്പിക്കപ്പെട്ടതെന്ന് നാലാം നൂറ്റാണ്ടുമുതൽ നിർവചിക്കപ്പെട്ടിട്ടുണ്ട്. വിശുദ്ധ ലിഖിതങ്ങളുടെ കാനോൻ എന്ന പട്ടികയിലാണ് അങ്ങനെ ചെയ്തിട്ടുള്ളത്.

കത്തോലിക്കാസഭയുടെ യുവജന മതബോധനഗ്രന്ഥം (ചോദ്യം:14)

കത്തോലിക്ക സഭയുടെ മതബോധന ഗ്രന്ഥം മതബോധനഗ്രന്ഥം sacred scripture Second Vatican Council youcat 14 വിശുദ്ധലിഖിതങ്ങൾ സത്യമാണോ? Bible Theology Church Teachings