പുരുഷന്മാർ മാത്രമേ തിരുപ്പട്ടകൂദാശ സ്വീകരിക്കാവു എന്നത് സ്ത്രീകളെ തരംതാഴ്ത്തുന്നുണ്ടോ?

Authored by : Congregation for Doctrine of Faith On 30-Jul-2022

പുരുഷന്മാർ മാത്രമേ തിരുപ്പട്ടം സ്വീകരിക്കാവൂ എന്ന നിയമം സ്ത്രീകളെ ഒരുവിധത്തിലും തരം താഴ്ത്തുന്നില്ല. ദൈവദൃഷ്ടിയിൽ സ്ത്രീക്കും പുരുഷനും ഒരേ മഹത്ത്വമാണുള്ളത്. എന്നാൽ അവർക്ക് വ്യത്യസ്ത കടമകളും - സിദ്ധികളുമാണുള്ളത്. പൗരോഹിത്യം സ്ഥാപിക്കുന്നതിനുള്ള അന്തിമാത്താഴത്തിൽ സന്നിഹിതരാകാൻ യേശു പുരുഷന്മാരെ മാത്രമേ തിരഞ്ഞെടുത്തിരുന്നുള്ളൂ എന്ന വസ്തുതയിൽ താൻ നിയന്ത്രിക്കപ്പെടുന്നതായി സഭ കരുതുന്നു. ജോൺ പോൾ രണ്ടാമൻ മാർപാപ്പാ 1994-ൽ ഇങ്ങനെ പ്രസ്താവിച്ചു: “സ്ത്രീകൾക്ക് പൗരോഹിത്യപട്ടം നല്കാൻ സഭയ്ക്ക് ഒരു അധികാരവുമില്ല. സഭയുടെ സകലവിശ്വാസികളും ഈ വിധിതീർപ്പ് അന്തിമമായി കരുതണം".

പൗരാണിക കാലത്ത് മറ്റാരും ചെയ്യാത്തതുപോലെ ചിന്തോദ്ദീപകമായ വിധത്തിൽ യേശു സ്ത്രീകളുടെ മൂല്യം ഉറപ്പിച്ചു പറഞ്ഞിട്ടുണ്ട്. അവരെ സുഹൃത്തുക്കളായി കരുതി. അവരെ സംരക്ഷിച്ചു. അവിടത്തെ അനുയായികളിൽ സ്ത്രീകളുണ്ടായിരുന്നു. അവരുടെ വിശ്വാസം അവിടന്ന് വളരെയേറെ വിലമതിച്ചു. കൂടാതെ, അവിടത്തെ ഉത്ഥാനത്തിൻ്റെ ആദ്യത്തെ സാക്ഷി ഒരു സ്ത്രീ ആയിരുന്നു. അതുകൊണ്ടാണ് മറിയം മഗ്ദലേന“അപ്പസ്തോലന്മാരുടെ അപ്പസ്തോലൻ' എന്നു വിളിക്കപ്പെടുന്നത്. എന്നാലും പട്ടാഭിഷേകം വഴിയുള്ള പൗരോഹിത്യം (തത്ഫലമായി അജപാലന ശുശ്രൂഷയും) എപ്പോഴും പുരുഷന്മാർക്കാണു നല്കിയിരുന്നത്. പുരുഷന്മാരായ പുരോഹിതരിൽ, ക്രൈസ്തവസമൂഹം യേശുക്രിസ്തുവിൻ്റെ പ്രാതിനിധ്യം കാണണമെന്ന് ഉദ്ദേശിക്കപ്പെട്ടിരുന്നു. പുരുഷനും പിതാവുമെന്ന നിലയിലുള്ള ലിംഗാധിഷ്ഠിത സവിശേഷ ധർമ്മം നിർവഹിക്കണമെന്ന് ആവശ്യപ്പെടുകകൂടി ചെയ്യുന്ന സവിശേഷമായ സേവനമാണ് പുരോഹിതനായിരിക്കുകയെന്ന അവസ്ഥ. എന്നാലും അത് സ്ത്രീകളുടെ മേലുള്ള പുരുഷമേധാവിത്വത്തിൻ്റെ ഒരു രൂപമല്ല. മറിയത്തിൽ നാം കാണുന്നതുപോലെ സ്ത്രീകൾ സഭയിൽ ഒരു ധർമ്മം നിർവഹിക്കുന്നുണ്ട്. അത് പുരുഷന്മാരുടെതിനെക്കാൾ ഒട്ടും കുറഞ്ഞ കേന്ദ്രീയ ധർമ്മമല്ല. പക്ഷേ, അത് ധർമ്മമാണ്. ഹവ്വ ജീവനുള്ള എല്ലാവരുടെയും അമ്മയായി (ഉത്പ 3:20). “ജീവനുള്ള സകലരുടെയും അമ്മമാ"രെന്ന നിലയിൽ സ്ത്രീകൾക്ക് പ്രത്യേക ദാനങ്ങളും കഴിവുകളുമുണ്ട്. അവർ ചെയ്യുന്ന തരത്തിലുള്ള പഠിപ്പിക്കലും മതപ്രഭാഷണവും ജീവകാരുണ്യ പ്രവർത്തനങ്ങളും ആധ്യാത്മികതയും മാർഗ നിർദ്ദേശവും ഇല്ലാതിരുന്നാൽ സഭ “ഒരു വശം തളർന്നതാകും". പുരുഷന്മാർ സഭയിൽ തങ്ങളുടെ പൗരോഹിത്യശുശ്രൂഷ ശക്തിയുടെ ഉപകരണമായി ഉപയോഗിക്കുമ്പോൾ അല്ലെങ്കിൽ സ്ത്രീകൾക്ക് അവസരം നിഷേധിക്കുമ്പോൾ അവർ പരസ്പരസ്നേഹത്തിനും യേശുവിൻ്റെ പരിശുദ്ധാത്മാവിനും എതിരായി ദ്രോഹം ചെയ്യുന്നു.

കത്തോലിക്കാസഭയുടെ യുവജന മതബോധനഗ്രന്ഥം(ചോദ്യം:257)

sacrament holy orders holy orders and women കത്തോലിക്കാസഭയുടെ മതബോധനഗ്രന്ഥം മതബോധനഗ്രന്ഥം തിരുപ്പട്ടകൂദാശ youcat 257 Bible Theology Church Teachings