ദൈവത്തെ ഏകദൈവം എന്നു വിശേഷിപ്പിക്കാൻ കാരണമെന്ത്?

Authored by : Fr. George Panamthottam CMI On 27-Aug-2022

ദൈവാസ്തിത്വത്തിലുള്ള നമ്മുടെ വിശ്വാസ പ്രഖ്യാപനത്തിൽ നിന്നു ഒരിക്കലും മാറ്റി നിർത്താനാവാത്ത സത്യമാണു ദൈവത്തിന്റെ ഏകത്വം. ഇത് പഴയ ഉടമ്പടിയിലെ ദൈവാവിഷ്കരണത്തിൽ വേരുന്നിയ സത്യമാണ്. വിശുദ്ധ ലിഖിതങ്ങളുടെയും വിശുദ്ധ പാരമ്പര്യങ്ങളുടെയും അടിസ്ഥാനത്തിൽ തിരുസഭ പഠിപ്പിക്കുന്നത് ദൈവം ഏകനാണ്, അവിടുന്നല്ലാതെ മറ്റൊരു ദൈവമില്ല, “സ്വഭാവത്തിലും സാരാംശത്തിലും അന്തസത്തയിലും ദൈവം ഏകനാണ് എന്നതാകുന്നു".

തന്റെ തിരഞ്ഞെടുക്കപ്പെട്ട ഇസ്രായേൽ ജനത്തിന് ദൈവം വെളിപ്പെടുത്തിയത് ഇപ്രകാരമാണ്: “ഇസ്രായേലേ കേൾക്കുക. നമ്മുടെ കർത്താവായ ദൈവം ഏക കർത്താവാകുന്നു. നിന്റെ ദൈവമായ കർത്താവിനെ പൂർണ്ണ ഹൃദയത്തോടും പൂർണ്ണആത്മാവോടും പൂർണ്ണ ശക്തിയോടും കൂടെ സ്നേഹിക്കണം" (നിയ. 6:4-5). വീണ്ടും, ഏക ദൈവത്തിലേക്കു തിരിയാൻ പ്രവാചകന്മാരിലൂടെ ദൈവം ഇസ്രായേൽ ജനത്തെ ക്ഷണിക്കുന്നു. “ഭൂമിയുടെ അതിർത്തികളെ എന്നിലേക്കു തിരിഞ്ഞു രക്ഷപ്പെടുക, ഞാനാണു ദൈവം; ഞാനല്ലാതെ മറ്റൊരു ദൈവം ഇല്ല... എല്ലാവരും എന്റെ മുൻപിൽ മുട്ടു മടക്കും; എല്ലാ നാവും ശപഥം ചെയ്യും. നീതിയും ബലവും കർത്താവിൽ നിന്നു മാത്രം എന്ന് എന്നെക്കുറിച്ചു മനുഷ്യർ പറയും” (ഏശയ്യ 45: 22-24). ദൈവത്തിന്റെ ഏകത്വം വെളിപ്പെടുത്തിയതു ദൈവം തന്നെയാണ്. ഈ വെളിപ്പെടുത്തൽ തിരുസഭ വിശ്വാസപ്രമാണത്തിൽ ഏറ്റുപറയുന്നുവെന്നു മാത്രം. ദൈവത്താൽ വെളിപ്പെടുത്തപ്പെട്ട ഈ സത്യം ഉറച്ചുവിശ്വസിക്കാൻ ദൈവം തിരുസഭയിലൂടെ നമ്മെ ക്ഷണിക്കുന്നു.

Living Faith Series : 1 (ചോദ്യം:3)

ദൈവത്തെ ഏകദൈവം എന്നു വിശേഷിപ്പിക്കാൻ കാരണമെന്ത്? Living Faith Series : 1 (ചോദ്യം:3) നിയ. 6:4-5 ഏശയ്യ 45: 22-24 Bible Theology Church Teachings