കത്തോലിക്കാസഭ സ്ത്രീ പൗരോഹിത്യം നിഷേധിക്കുന്നത് എന്തുകൊണ്ട്?

Authored by : Fr. George Panamthottam CMI On 18-Oct-2022

സ്ത്രീകൾക്ക് പൗരോഹിത്യം നല്കണമെന്ന ചിന്ത അടുത്ത കാലത്ത് ഉയർന്നുവരികയും അത് പ്രബലപ്പെടുകയും ചെയ്തതിന്റെ വെളിച്ചത്തിൽ പരിശുദ്ധ പിതാവ് പോൾ ആറാമൻ മാർപാപ്പ കത്തോലിക്കാ സഭയുടെ നിലപാട് വ്യക്തമാക്കി. മാർപ്പാപ്പ പറഞ്ഞു: “സ്ത്രീകളെ പൗരോഹിത്യത്തിലേക്ക് സ്വീകരിക്കാൻ പാടില്ലാത്തതാണ്. മൗലിക കാരണങ്ങളുടെ അടിസ്ഥാനത്തിൽ കത്തോലിക്കാസഭ സ്വീകരിച്ചിരിക്കുന്ന നിലപാട് വിശുദ്ധ ഗ്രന്ഥത്തിന്റെ അടിസ്ഥാനത്തിലാണ്. വിശുദ്ധ ഗ്രന്ഥത്തിൽ രേഖപ്പെടുത്തിയിട്ടുള്ള ക്രിസ്തുവിന്റെ മാതൃക അവിടുന്നു പുരുഷന്മാരിൽ നിന്ന് മാത്രം തന്റെ ശിഷ്യരെ തിരഞ്ഞെടുത്തു എന്നതാണ്. പുരുഷന്മാരെ മാത്രം തിരഞ്ഞെടുക്കുന്ന ക്രിസ്തുവിന്റെ മാതൃകയെ ആദ്യകാലം മുതൽ സഭ അനുഗമിക്കുന്നു. ക്രിസ്തുവിന്റെ പ്രവൃത്തി ആ കാലയളവിലെ പ്രത്യേകമായ സാമൂഹികമോ സാംസ്കാരികമോ ആയ ലക്ഷ്യങ്ങളാൽ പ്രചോദിപ്പിക്കപ്പെട്ടതല്ലെന്ന് വചനം വ്യക്തമാക്കുന്നുണ്ട്. ദൈവത്തിന്റെ പ്രത്യേക പദ്ധതി പ്രകാരമാണ് ക്രിസ്തു ഈ തിരഞ്ഞടുപ്പ് നടത്തുന്നത്.

താൻ ആഗ്രഹിക്കുന്നവരെ ക്രിസ്തു തിരഞ്ഞെടുത്തു (മത്തായി 3 : 13-14, യോഹ. 6:70). പ്രാർത്ഥനയിൽ രാത്രികാലം ചെലവഴിച്ച് നന്നായി ഒരുങ്ങിയാണു ക്രിസ്തു ഈ ദൗത്യം നിർവഹിച്ചത് (ലൂക്കാ 6:12). പിതാവിനോടുള്ള ഐക്യത്തിൽ പരിശുദ്ധാത്മാവിലൂടെയാണ് അപ്രകാരം ചെയ്തത് (അപ്പ. 1:12). ഒന്നാമതായി, ക്രിസ്തു താൻ സ്ഥാപിച്ച സഭയുടെ അടിസ്ഥാനമായ പന്ത്രണ്ട് ശ്ലീഹന്മാരെ തിരഞ്ഞെടുക്കാൻ ഒരു രീതി സ്വീകരിച്ചു. അതേ രീതിയാണു തിരുസഭ പിൻതുടരുന്നത്. അതൊരു ശാശ്വതനിയമമായി സഭ അംഗീകരിക്കുന്നു. അപ്പസ്തോലന്മാർ പിൻഗാമികളെ തിരഞ്ഞടുത്തപ്പോഴും ഈ നിയമം സൂക്ഷിച്ചു.

രണ്ടാമതായി, ദൈവത്തിന്റെ അമ്മയും സഭയുടെ അമ്മയുമായി പരിശുദ്ധ കന്യകാമറിയത്തെ ക്രിസ്തു സമ്മാനിച്ചെങ്കിലും അപ്പസ്തോലന്മാർക്ക് നല്കിയ സവിശേഷ ദൗത്യമോ ശുശ്രൂഷാ പൗരോഹിത്യമോ അവിടുന്നു അമ്മയ്ക്ക് നല്കിയില്ല. അതിനാൽ, സ്ത്രീകളെ പൗരോഹിത്യത്തിലേക്ക് സ്വീകരിക്കുന്നില്ല എന്നതുകൊണ്ട് അവർ മഹത്വം കുറഞ്ഞവരാണെന്ന് അർത്ഥമാക്കുന്നില്ല. അത് അവർക്ക് എതിരെയുള്ള വിവേചനമാണെന്ന് വ്യാഖ്യാനിക്കാൻ പാടില്ലെന്നും, എന്നാൽ പ്രപഞ്ച കർത്താവിന്റെ ജ്ഞാനത്തിന്റേതായ പദ്ധതിയുടെ വിശ്വസ്തതാപൂർവമായ കാത്തുസൂക്ഷിക്കലായിട്ടാണ് അതിനെ കണക്കാക്കേണ്ടതെന്നും കത്തോലിക്കാസഭ പഠിപ്പിക്കുന്നു.

Living faith series : 7 (ചോദ്യം:5)

Fr. George Panamthottam CMI കത്തോലിക്കാസഭ സ്ത്രീ പൗരോഹിത്യം നിഷേധിക്കുന്നത് എന്തുകൊണ്ട്? മത്തായി 3 : 13-14 യോഹ. 6:70 ലൂക്കാ 6:12 അപ്പ. 1:12 Living faith series : 7 (ചോദ്യം:5) Bible Theology Church Teachings