We appreciate that you have taken the time to write us. We will get back to you very soon. Please come back and see us often.
Authored by : Fr. George Panamthottam CMI On 03-Nov-2022
വിശ്വാസപ്രമാണത്തിൽ “വിശുദ്ധ കത്തോലിക്കാ സഭയിലും പുണ്യവാന്മാരുടെ ഐക്യത്തിലും ഞങ്ങൾ വിശ്വസിക്കുന്നു"എന്നാണ് ഏറ്റുപറയുന്നത്. ഒരർത്ഥത്തിൽ എല്ലാ പുണ്യവാന്മാരുടെയും വിശുദ്ധരുടെയും സമ്മേളനമാണ് തിരുസഭ. പുണ്യവാന്മാരുടെ ഐക്യം എന്ന് എടുത്തു പറഞ്ഞത് തിരുസഭയ്ക്ക് ഒരു വിശദീകരണം നൽകുന്നതിനാണ്. എല്ലാ വിശ്വാസികളും കൂടി ഒറ്റശരീരമാകുന്നതുകൊണ്ട് ഓരോരുത്തരുടെയും നന്മ മറ്റുള്ളവർക്ക്പകർന്ന് നൽകപ്പെടുന്നു. ക്രിസ്തുവിന്റെ ശരീരത്തിലെ അംഗങ്ങൾ എന്ന നിലയ്ക്ക് വിശ്വാസികൾ പരസ്പരം ഐക്യപ്പെട്ടിരിക്കുന്നു. ഈ ഐക്യം വിശ്വാസത്തിലും, കൂദാശയിലും, സിദ്ധികളിലും, കരുതലിലും, സ്നേഹത്തിലുമുള്ള ഐക്യമാണ്.
വിശ്വാസികളുടെ വിശ്വാസം അപ്പസ്തോലന്മാരിൽ നിന്ന് സ്വീകരിച്ച സഭയുടെ വിശ്വാസമാണ്. പങ്കുവയ്ക്കുന്നതിലൂടെ സമ്പന്നമായി തീരുന്ന ജീവിതത്തിന്റെ നിധിയാണ് വിശ്വാസം. വിശ്വാസികളെ തമ്മിലും അവരെ ക്രിസ്തുവുമായും കൂട്ടിയിണക്കുന്ന വിശുദ്ധ കണ്ണികളാണ് എല്ലാ കൂദാശകളും. സഭയെ പടുത്തുയർത്തുന്നതിനായി പരിശുദ്ധാത്മാവ് എല്ലാ തലങ്ങളിലുമുള്ള വിശ്വാസികളുടെയിടയിൽ സവിശേഷ വരങ്ങൾ വിതരണം ചെയ്യുന്നു. ഈ സിദ്ധിയിലൂടെ പൊതുനന്മയ്ക്കായി ഓരോരുത്തരും ആത്മാവിന്റെ ആവിഷ്കരണം നൽകപ്പെടുന്നു. ആദ്യകാലം മുതലേ ക്രിസ്ത്യാനിക്ക് ഉള്ളതെല്ലാം പൊതുവായിട്ടുള്ള ഒരു നന്മയായി കരുതപ്പെട്ടിരുന്നു. ക്രൈസ്തവർ കർത്താവിന്റെ വസ്തുവകകളുടെ കാര്യസ്ഥനാണ് (ലൂക്കാ 16:1-3). വിശുദ്ധ പൗലോസ് അപ്പസ്തോലൻ പറയുന്നു: “നമ്മിലാരും തനിക്കുവേണ്ടി മാത്രം ജീവിക്കുന്നില്ല. തനിക്കുവേണ്ടി മാത്രം മരിക്കുന്നില്ല” (റോമാ 14:7). “ഒരു അവയവം വേദനയനുഭവിക്കുമ്പോൾ എല്ലാ അവയവങ്ങളും വേദനയനുഭവിക്കുന്നു. ഒരു അവയവം പ്രസംഗിക്കപ്പെടുമ്പോൾ എല്ലാ അവയവങ്ങളും സന്തോഷിക്കുന്നു. നിങ്ങൾ ക്രിസ്തുവിന്റെ ശരീരവും അതിലെ അവയവങ്ങളുമാണ്” (1 കോറി. 12: 26, 27). ഈ സ്നേഹത്തിന്റെ ഐക്യം വിശ്വാസികളുടെ ഐക്യത്തിന് നിദാനമാകുന്നു. ഇത്തരത്തിൽ ജീവിച്ചിരിക്കുന്നവരോ, മരിച്ചവരോ ആയ എല്ലാവരോടുമുള്ള ഈ ദൃഢബന്ധം പുണ്യവാന്മാരുടെ ഐക്യത്തിൽ അധിഷ്ഠിതമാണ്. ഓരോ പാപവും ഈ ഐക്യത്തിന് ക്ഷതമേല്ക്കുന്നവയുമാണ്.
തിരുസഭയ്ക്ക് മൂന്ന് അവസ്ഥകളുണ്ട്. ഭൂമിയിൽ ജീവിച്ച് തീർത്ഥാടനം ചെയ്യുന്ന വിശ്വാസികളുടെ സമൂഹം, മരണം പ്രാപിച്ചു ശുദ്ധീകരിക്കപ്പെട്ടുകൊണ്ടിരിക്കുന്ന വിശ്വാസ സമൂഹം, ദൈവത്തെ മുഖാമുഖം കണ്ട് സ്വർഗ്ഗത്തിലായിരുന്ന വിശ്വാസ സമൂഹം (മത്തായി 25:31; 1 കോറി 15:26, 27). ഈ മൂന്ന് അവസ്ഥകളിലുള്ള വിശ്വാസസമൂഹവും പരസ്പരം ബന്ധപ്പെട്ടിരിക്കുന്നു. ക്രിസ്തുവിന്റെ സ്വന്തമായിട്ടുള്ളവരും അവിടുത്തെ ആത്മാവുള്ളവരുമായ ഇവർ ഒറ്റസഭയായി രൂപം പ്രാപിക്കുകയും അവിടുന്നിൽ പരസ്പരം കൂടിച്ചേരുകയും ചെയ്യുന്നു (എഫേ. 4:16). പുണ്യവാന്മാർ സ്വർഗ്ഗത്തിൽ ക്രിസ്തുവിനോട് കൂടുതൽ ഐക്യപ്പെട്ടിരിക്കുന്നതിനാൽ ദൈവത്തിനും മനുഷ്യർക്കും ഇടയിലുള്ള ഏക മധ്യസ്ഥനായ ക്രിസ്തു വഴി അവർ നേടിയ യോഗ്യതയാൽ പിതാവിന്റെ പക്കൽ അവർ നമുക്കായി മാധ്യസ്ഥ്യം വഹിച്ചു പ്രാർത്ഥിക്കുന്നു (1 തിമോ. 2:5). തിരുസഭ പുണ്യവാന്മാരോടും വിശുദ്ധരോടും പ്രാർത്ഥനകൾ അപേക്ഷിക്കുന്നതിന്റെ കാരണമിതാണ്.
“പുണ്യവാന്മാരുടെ ഐക്യം” എന്ന പ്രയോഗത്തിലൂടെ അർത്ഥമാക്കുന്നത് ക്രിസ്തുവിൽ ഒരു ശരീരമായിത്തീർന്ന വിശ്വാസികളുടെ ഐക്യം എന്നാണ്. സ്വർഗ്ഗത്തിലും ശുദ്ധീകരണ സ്ഥലത്തും ഭൂമിയിലുമായിരുന്ന വിശ്വാസികളുടെ കൂട്ടായ്മയിൽ നിന്നാണ് ഈ ഐക്യം രൂപപ്പെടുന്നത്. എല്ലാ ക്രൈസ്തവ വിശ്വാസികളും അതായത് ഭൂമിയിൽ തീർത്ഥാടകരായിരിക്കുന്നവരും മരണം പ്രാപിച്ച് ശുദ്ധീകരണ സ്ഥലത്തായിരിക്കുന്നവരും സ്വർഗ്ഗത്തിൽ ഭാഗ്യമനുഭവിക്കുന്നവരുമായ എല്ലാവരും ഒറ്റ സഭയിൽ കൂട്ടിച്ചേർക്കപ്പെടുന്നു എന്നു നാം വിശ്വസിക്കുന്നു. കൂട്ടായ്മയിൽ ദൈവത്തിന്റെയും നമ്മുടെ പ്രാർത്ഥനാ സദാ ശ്രവിക്കുന്ന അവിടുത്തെ വിശുദ്ധരുടെയും സ്വർഗ്ഗീയ മാധ്യസ്ഥ്യം നമുക്കു ലഭിക്കുമെന്നും നാം വിശ്വസിക്കുന്നു. തിരുസഭ വിശുദ്ധരോട് മാധ്യസ്ഥം അപേക്ഷിക്കുന്നതും മരിച്ചവർക്കുവേണ്ടി പ്രാർത്ഥിക്കുന്നതിന്റെയുമൊക്കെ അടിസ്ഥാനം ഈ വിശ്വാസമാണ്.
Living faith series : 9 (ചോദ്യം:4) റോമാ 14:7 1 കോറി. 12: 26 മത്തായി 25:31; 1 കോറി 15:26 എഫേ. 4:16 1 തിമോ. 2:5 Fr. George Panamthottam CMI എന്താണ് “പുണ്യവാന്മാരുടെ ഐക്യം? Bible Theology Church Teachings
place 3rd Floor, Room No.704, Olive Arcade, Near St. Joseph’s Hospital, Mananthavady – 670645
call
Call For More Information
04935 293101, 97446 67206
mail
Mail us on
info@fedarfoundation.com
FEDAR FOUNDATION
3rd Floor, Room No.704, Olive Arcade, Near St. Joseph’s Hospital, Mananthavady – 670645
Email : info@fedarfoundation.com
Phone : 04935 293101, 97446 67206