ഒരുവന്റെ വിശ്വാസം മറ്റൊരുവന് ബാധകമാകുമോ?

Authored by : Fr. George Panamthottam CMI On 26-Aug-2022

ഒരാളിന്റെ വിശ്വാസം നിമിത്തം മറ്റൊരാൾ രക്ഷിക്കപ്പെടുന്ന സംഭവങ്ങൾ ബൈബിളിൽ നിരവധിയുണ്ട്. വിശുദ്ധ മർക്കോസ് 5: 21-43ൽ സിനഗോഗ് അധികാരികളിൽ ഒരാളായ ജായ്റോസ് യേശുവിന്റെ അടുക്കൽ വന്ന് തന്റെ കുഞ്ഞുമകൾ അത്യാസന്ന നിലയിലാണെന്നും അവൾ സുഖം പ്രാപിക്കാൻ അവിടുന്നു അവളുടെമേൽ കൈവയ്ക്കണമെന്നും ആവശ്യപ്പെടുന്നുണ്ട്. ഇടയ്ക്കുവച്ച് ചിലർ വന്ന് കുഞ്ഞുമകൾ മരിച്ചു പോയെന്നും ഗുരുവിനെ ബുദ്ധിമുട്ടിക്കേണ്ട എന്നും അറിയിച്ചു. (5: 35,36) യേശു ആ വാക്ക് കാര്യമാക്കാതെ ജായ്റോസിനോട് “ഭയപ്പെടേണ്ട വിശ്വസിക്കുക മാത്രം ചെയ്യുക” എന്നു പറഞ്ഞു. തുടർന്ന് ആ വീട്ടിൽ എത്തി "തലീഥാ, കാേമി" (ബാലികേ, എഴുന്നേല്ക്കുക) എന്നു പറഞ്ഞ് അവളെ മരണത്തിൽനിന്നു ജീവനിലേക്ക് തിരികെ കൊണ്ടുവന്നു. ഇവിടെ കർത്താവ് വന്നതും തന്നെ ജീവിപ്പിച്ചതും ബാലിക അറിഞ്ഞതാണോ? അവളുടെ വിശ്വാസം മൂലമാണോ? അല്ല. അവളുടെ അപ്പൻ മാത്രമാണു വിശ്വസിച്ചത്. അതിനാൽ മകൾ രക്ഷ പ്രാപിക്കുന്നു.

“അവർ ഒരു തളർവാതരോഗിയെ ശയ്യയോടെ അവന്റെ അടുക്കൽ കൊണ്ടുവന്നു അവരുടെ വിശ്വാസം കണ്ട് അവൻ തളർവാത രോഗിയോട് അരുളിചെയ്തു: “മകനെ ധൈര്യമായിരിക്കുക; നിന്റെ പാപങ്ങൾ ക്ഷമിക്കപ്പെട്ടിരിക്കുന്നു" (മത്തായി 9: 2). “നാലുപേർ ഒരു തളർവാതരോഗിയെ എടുത്തുകൊണ്ടുവന്നു. ജനക്കൂട്ടം നിമിത്തം അവന്റെ അടുത്തെത്താൻ അവർക്ക് കഴിഞ്ഞില്ല. അതിനാൽ, അവൻ ഇരുന്ന സ്ഥലത്തിന്റെ മേൽക്കൂര പൊളിച്ച്, തളർവാതരോഗിയെ അവർ കിടക്കയോടെ താഴോട്ടിറക്കി. അവരുടെ വിശ്വാസം കണ്ട് തളർവാതരോഗിയോട് പറഞ്ഞു, “മകനേ, നിന്റെ പാപങ്ങൾ ക്ഷമിക്കപ്പെട്ടിരിക്കുന്നു (മർക്കോസ് 2 : 3). കൂടെ വന്നവരുടെ വിശ്വാസം നിമിത്തം തളർവാതരോഗികളും സുഖപ്പെടുന്നു.

“ഉടനെ കൂട്ടിയുടെ പിതാവ് വിളിച്ചു പറഞ്ഞു. ഞാൻ വിശ്വസിക്കുന്നു (മർക്കോസ് 9 :24). പിതാവിന്റെ വിശ്വാസം നിമിത്തം മൂകനും ബധിരനുമായ മകൻ സുഖം പ്രാപിക്കുന്നു. വിശുദ്ധ മത്തായി 8: 5-13 ൽ ശതാധിപന്റെ വിശ്വാസം നിമിത്തം ഭൃത്യൻ സുഖം പ്രാപിക്കുന്നു. തുടർന്ന്, മത്തായി 15: 21-ൽ അമ്മയുടെ വിശ്വാസം നിമിത്തം മകൾ സുഖം പ്രാപിക്കുന്നു. മാതാപിതാക്കളുടെ വിശ്വാസം നിമിത്തം മക്കൾ രക്ഷിക്കപ്പെടുന്നു. ശിശു മാമ്മോദീസായിൽ ശിശുവിനുവേണ്ടി ജ്ഞാനസ്നാന മാതാപിതാക്കൾ വിശ്വാസം ഏറ്റു പറയുന്നു. ഒരാൾക്കുവേണ്ടി മറ്റൊരാൾ വിശ്വാസം ഏറ്റുപറയുന്നത് രക്ഷാകരമാണെന്നു തിരുവചനം സംശയലേശമന്യേ സാക്ഷ്യപ്പെടുത്തിയിട്ടുണ്ട്.

Living faith series : 6 (ചോദ്യം:5)

Fr. George Panamthottam CMI ഒരുവന്റെ വിശ്വാസം മറ്റൊരുവന് ബാധകമാകുമോ? Living faith series : 6 (ചോദ്യം:5) Bible Theology Church Teachings