ആദിമ സഭയിൽ ശിശുക്കളെ സ്നാനപ്പെടുത്തിയിരുന്നോ?

Authored by : Fr. George Panamthottam CMI On 26-Aug-2022

ആദിമ സഭയിൽ ശിശുക്കൾക്ക് ജ്ഞാനസ്നാനം നിഷേധിക്കപ്പെട്ടിരുന്നില്ല. മാതാപിതാക്കളും കുഞ്ഞുങ്ങളും ഉൾപ്പെടുന്ന കുടുംബം മുഴുവനുമാണ് ജ്ഞാനസ്നാനം സ്വീകരിച്ചിരുന്നത്. ഇതിനു തിരുവചനം സാക്ഷ്യം നൽകുന്നുണ്ട്. “ഞങ്ങളുടെ വാക്കുകൾ കേട്ടവരുടെ കൂട്ടത്തിൽ തിയത്തീറാ പട്ടണത്തിൽനിന്നു വന്ന പട്ടുവിൽപ്പനക്കാരിയും ദൈവഭക്തയുമായ ലീദിയാ എന്ന സ്ത്രീയുമുണ്ടായിരുന്നു. പൗലോസ് പറഞ്ഞ കാര്യങ്ങൾ സ്വീകരിക്കാൻ കർത്താവ് അവളുടെ ഹൃദയം തുറന്നു. കുടുംബസമേതം ജ്ഞാനസ്നാനം സ്വീകരിച്ച് അവൾ ഞങ്ങളോട് പറഞ്ഞു...” (അപ്പ. 16 : 14,15). ഇവിടെ ലീദിയാ മാത്രം പ്രസംഗം കേട്ടു വിശ്വസിച്ചു. എന്നാൽ അവളുടെ കുടുംബം മുഴുവൻ സ്നാനം സ്വീകരിച്ചു. അവളുടെ കുഞ്ഞുങ്ങളെ അപ്പസ്തോലന്മാർ മാറ്റിനിർത്തുന്നില്ല. “യജമാനന്മാരേ, രക്ഷപ്രാപിക്കാൻ ഞാൻ എന്തു ചെയ്യണം? അവർ പറഞ്ഞു: കർത്താവായ യേശുവിൽ വിശ്വസിക്കുക. നീയും നിന്റെ കൂടുംബവും രക്ഷപ്രാപിക്കും. അപ്പോൾ അവനും കുടുംബവും ജ്ഞാനസ്നാനം സ്വീകരിക്കുകയും ചെയ്തു" (അപ്പ. 6 : 31-33). പൗലോസും സീലാസും തടവറക്കാരനു ജ്ഞാനസ്നാനം നൽകുന്ന സംഭവമാണിത്. ഒരുവൻ വിശ്വസിച്ചാൽ അവന്റെ കുടുംബം മുഴുവനും രക്ഷനേടുമെന്നു തിരുവചനം പറയുന്നു. ഇവിടെയും കുഞ്ഞുങ്ങൾക്ക് സ്നാനം നൽകിയിട്ടുണ്ട്. സ്വയം വിശ്വാസം ഏറ്റുപറയാൻ കഴിയാത്ത ശിശുക്കൾക്ക് രക്ഷയുടെ കവാടം തുറന്നുകൊടുക്കുന്ന രീതി ആദിമ ക്രൈസ്തവ സഭയിൽ തന്നെ പ്രകടമായിരുന്നു. ഒരിക്കലും ശിശുക്കളെ ജ്ഞാനസ്നാനത്തിൽ നിന്നു മാറ്റി നിർത്തുന്നതായി ആദിമസഭയിൽ കാണാൻ കഴിയുന്നില്ല.

Living faith series: 6 (ചോദ്യം:3)

Living faith series: 6 (ചോദ്യം:3) ആദിമ സഭയിൽ ശിശുക്കളെ സ്നാനപ്പെടുത്തിയിരുന്നോ? Bible Theology Church Teachings