സീറോമലബാർ രൂപതകളിലെ കുദാശാനുഷ്ഠാനക്രമങ്ങളിലുള്ള വ്യത്യസ്തത ഏകോപിപ്പിക്കാൻ സാധിക്കുമോ ?

Authored by : Syro Malabar catechetical commission On 02-Jun-2021

ഈ ചോദ്യം മാമ്മോദീസ ,  സ്ഥൈര്യലേപനം , കുർബ്ബാന ( ദിവ്യകാരുണ്യം ) എന്നിവ കേരളത്തിലെ ചില സീറോമലബാർ രൂപതകളിൽ ഒരുമിച്ചും , മറ്റുചില രൂപതകളിൽ മുൻപതിവുപോലെ മാമ്മോദീസ , കുമ്പസാരം , ദിവ്യകാരുണ്യം ,  സ്ഥൈര്യലേപനം എന്നിങ്ങനെ ഒരു കുട്ടിയുടെ വളർച്ചയുടെ വിവിധഘട്ടങ്ങളിൽ നല്കുന്ന പതിവും നിലനില്ക്കുന്നതിന്റെ അടിസ്ഥാനത്തിൽ ആയിരിക്കാം . ഭാരതത്തിലെ ലത്തീൻ രൂപതകളിൽ രണ്ടാമതു സൂചിപ്പിച്ച പതിവാണുള്ളത് . വിശുദ്ധ കുർബ്ബാന അർപ്പിക്കുന്ന രീതിയിലും ചില അനുഷ്ഠാനക്രമങ്ങളിലും സീറോമലബാർ സഭയിൽപ്പെട്ട ചില രൂപതകളിൽ വ്യത്യസ്തതകൾ ഉണ്ടെന്നതു ശരിയാണ് . ആദ്യം സൂചിപ്പിച്ച മാമ്മോദീസ , ദിവ്യകാരുണ്യം ,  സ്ഥൈര്യലേപനം എന്നിവ ഒരുമിച്ചുകൊടുക്കുന്ന പതിവ് ആദിമസഭാപാരമ്പര്യത്തിന്റെ ഭാഗമായിരുന്നു

പ്രായപൂർത്തിയായവർ പഠിച്ച് , ഒരുങ്ങി , വിശ്വാസസത്യങ്ങൾ ഏറ്റുപറഞ്ഞ് മാമ്മോദീസ സ്വീകരിക്കുമ്പോൾ അവരെ ഔദ്യോഗികമായി സഭാ സമൂഹത്തിൽ ഭാഗമാക്കുന്നതിന്റെ പ്രഥമപടിയായി അവർക്ക് മാമ്മോദീസയോടൊപ്പം  സ്ഥൈര്യലേപനം ദിവ്യകാരുണ്യവും നല്കിയിരുന്നു . പിന്നീട് പ്രായപൂർത്തിയായവരുടെ മാമ്മോദീസയോടൊപ്പം ശൈശവമാമ്മോദീസയും നടപ്പിൽ വന്നു . ദിവ്യകാരുണ്യസ്വീകരണം കുമ്പസാരത്തോടനുബന്ധിച്ചും സ്ഥൈര്യലേപനം അതിനുശേഷവും എന്ന രീതിയിൽ തിരിച്ചറിവായതിനുശേഷം നല്കുക എന്ന ചിന്ത സഭയിൽ ഉടലെടുക്കുകയും പാശ്ചാത്യസഭ അപ്രകാരം തീരുമാനിക്കുകയും ചെയ്തു . എന്നാൽ പൗരസ്ത്യസഭകളിൽ ആദിമസഭാശൈലി തുടർന്നു പോന്നു . സീറോമലബാർ സഭയിൽ പാശ്ചാത്യ സഭയുടെ സ്വാധീനതയിൽ മാമ്മോദീസയും സ്ഥൈര്യലേപനം ദിവ്യകാരുണ്യവും വ്യത്യസ്ത സമയങ്ങളിൽ നല്കാൻ ഇടയായി . എന്നാൽ പൗരസ്ത്യ സഭാപാരമ്പര്യത്തിന്റെ പശ്ചാത്തലത്തിൽ ഈ മൂന്നു കൂദാശകളും ഒരുമിച്ചു നല്കാൻ സീറോമലബാർ സിനഡ് തീരുമാനിച്ചു . സാവകാശം ഈ രീതി എല്ലായിടത്തും നടപ്പിലാകുമെന്നു കരുതാം . വിശുദ്ധ കുർബാന അർപ്പിക്കുന്ന രീതികളെ സംബന്ധിച്ചും ഈ ചോദ്യം പ്രസക്തമാണ് . ഇംഗ്ലീഷിൽ " യുണിഫോമിറ്റി എന്നൊരു വാക്കുണ്ട് . അതുപോലെ മറ്റൊരു വാക്കാണ് ' ഡൈവേഴ്സിറ്റി ' ( ഐകരൂപ്യവും വൈവിധ്യവും ) .

സീറോമലബാർ സഭയിലെ വിവിധ രൂപതകളിൽ വ്യത്യസ്തമായ അനുഷ്ഠാനകമങ്ങളിലാണ് കുർബ്ബാന അർപ്പിക്കുന്നത് . നിയമപരമായി സഭ അനുവദിച്ചിട്ടുള്ള കാര്യമാണിതെങ്കിലും ഏകോപനം സാദ്ധ്യമായാൽ നന്നായിരിക്കും എന്നതിൽ സംശയമില്ല . ചിലകാര്യങ്ങളിൽ ഇതെളുപ്പമാണെങ്കിലും മറ്റുചിലകാര്യങ്ങളിൽ ഇത് അത്രയെളുപ്പം സാധിക്കില്ല . നമുക്കറിയാവുന്നതുപോലെ , മനുഷ്യരുടെ വസ്ത്രധാരണത്തിൽ ഏകോപനത്തിനു ശ്രമിച്ചാൽ അത് ബുദ്ധിമുട്ടാകുമെന്നു മാത്രമല്ല , നടപ്പിലായില്ല എന്നും വന്നേക്കാം . ഇതുപോലെ ഭക്ഷണകാര്യത്തിലും വൈവിധ്യങ്ങളുണ്ട് ; പ്രാർത്ഥനാരീതികളിലും വൈവിധ്യങ്ങളുണ്ട് . അതുകൊണ്ട് വൈവിധ്യങ്ങൾ അതിൽതന്നെ തെറ്റാണെന്ന് പറയാൻ സാധിക്കില്ല . എന്നാൽ , ചിലകാര്യങ്ങളിൽ ഏകോപനം വളരെ ഉപകാരപ്രദമായിരിക്കും . ഉദാഹരണത്തിന് , ഒരിടവകയിൽ വികാരിയച്ചൻ ഒരുരീതിയിലും അസിസ്റ്റന്റ് അച്ചൻ മറ്റൊരു രീതിയിലും തൊട്ടടുത്ത ഇടവകയിൽ വേറൊരുരീതിയിലും കുർബ്ബാനയർപ്പിക്കുന്നു എന്നു കരുതുക . ഇത് ജനങ്ങളുടെയിടയിൽ ചിന്താക്കുഴപ്പം ഉണ്ടാക്കാൻ സാധ്യതയുള്ളതുകൊണ്ട് ഒരുപരിധിവരെ ഐകരൂപ്യം ഉണ്ടാകുന്നത് നല്ലതാണ് .

rites differences in the rites syro malabar rite Bible Theology Church Teachings