ദൈവാലയങ്ങളിലെ തിരുസ്വരൂപവണക്കം വിഗ്രഹാരാധനയല്ലാതാകുന്നത് എങ്ങനെ ? വിശുദ്ധരുടെ വണക്കത്തെപറ്റിയും ദൈവാരാധനയെപറ്റിയും ഉള്ള വ്യത്യാസങ്ങൾ എന്തെല്ലാം ?

Authored by : Syro-Malabar Catechetical Commission On 02-Jun-2021

പുരാതന ഗ്രീക്കുകാർക്ക് അനേകം ദേവീദേവന്മാരുണ്ടായിരുന്നു . ഏതാണ്ട് നമ്മുടെ ഹൈന്ദവമത പുരാണങ്ങളിൽ കാണുന്നതുപോലെതന്നെ . ഭൂമിക്കും , ആകാശത്തിനും , മരത്തിനും , മണ്ണിനും , കല്ലിനും, കടലിനും , പൂവിനും , പുൽച്ചാടിക്കും എല്ലാറ്റിനും ദൈവങ്ങൾ . പല ദൈവങ്ങളും ധീരയോധാക്കളും , ധാർമ്മികതയുടെ കാവൽക്കാരും , മനുഷ്യരെ ചില പ്രത്യേക സാഹചര്യങ്ങളിൽ രക്ഷപെടുത്തുകയും സംരക്ഷണം നല്കുകയും ചെയ്യുന്നവരും ആയിരുന്നു . ഒരിക്കൽ ഗ്രീസിലെ നഗരസഭാധികാരികൾ ഒരുമിച്ചു കൂടി പറഞ്ഞു , വരുംതലമുറകൾ ഒരുപക്ഷേ നമ്മുടെ വിശ്വാസരീതികളും , നമ്മുടെ ദൈവങ്ങളുടെ ധീരകൃത്യങ്ങളും മറന്നുപോയെന്നുവരാം . ഒരുപക്ഷേ അവരോടുള്ള ബഹുമാനവും ആദരവും നഷ്ടപ്പെടുകയും ചെയ്തേക്കാം . അതിനാൽ ഒരു ദേവാലയം നിർമ്മിച്ച് അവിടെ നമ്മുടെ അറിവിൽപ്പെട്ട എല്ലാ ദേവീ ദേവന്മാരുടേയും പ്രത്യേകതകൾ ഉൾക്കൊള്ളുന്ന ഓരോ പ്രതിമയും സ്ഥാപിക്കണം . നല്ലകാര്യമെന്നു തോന്നിയതിനാൽ എല്ലാവരും ഏകസ്വരത്തിൽ അതിനു തീരുമാനമെടുത്തു . മനോഹരമായൊരു ദേവാലയം നിർമ്മിച്ച് അതിന് “ പാൻതെയോൺ ” ( എല്ലാ ദൈവങ്ങൾക്കും വേണ്ടി ) എന്നു പേരിട്ട് അവിടെ പ്രതിമകൾ സ്ഥാപിച്ചു . ഏതൻസിലെ അമ്മമാർ തങ്ങളുടെ ഒഴിവു സമയങ്ങളിൽ ഈ സ്ഥലം സന്ദർശിക്കുകയും കുട്ടികൾക്ക് ദേവീദേവന്മാരെക്കുറിച്ചുള്ള കഥകൾ പറഞ്ഞുകൊടുക്കുകയും ചെയ്തിരുന്നു . ഇവരുടെ കഥകൾ , നന്മകൾ എന്നിവ കേട്ടറിഞ്ഞ് , രാജ്യസ്നേഹവും പൗരബോധവും ഉള്ളവരായി കുട്ടികൾ വളർന്നു . ഒരുതരത്തിൽ മതബോധനപരവും , പഠനാത്മകവുമായ ചിന്തയാണ് അവരെ അതിനു പ്രേരിപ്പിച്ചത് . വരും തലമുറയ്ക്ക് മനസ്സിലാക്കാനും പഠിക്കാനും അനുകരിക്കാനും വേണ്ടിയായിരുന്നു അത് . അത്ര മാത്രമെ അർത്ഥവും വിലയും അതിനുള്ളു . കത്തോലിക്കർ വിഗ്രഹാരാധന നടത്തുന്നവരാണെന്നും , ദൈവ കല്പനകൾക്കെതിരായി പ്രവർത്തിക്കുന്നവരാണെന്നും പറയുന്നത് ശരിയായ അർത്ഥത്തിൽ വിശുദ്ധഗ്രന്ഥം വ്യാഖ്യാനിക്കാത്തതിനാലും , പ്രതിമാവണക്കത്തിന്റെ പൊരുളെന്തെന്ന് അറിയില്ലായെന്ന് നടിക്കുന്നതിനാലുമാണ് . കത്തോലിക്കാ സഭയിൽ നിലവിലിരിക്കുന്ന പ്രതിമാവണക്കത്തിന്റെ താല്ക്കാലികതയെക്കുറിച്ച് ആർക്കും മനസ്സില കുന്നതാണ് . വിശുദ്ധരുടെ പ്രതിമകൾ നിർമ്മിച്ച് ദേവാലയങ്ങളിൽ സ്ഥാപിക്കുന്നത് വിഗ്രഹാരാധനയാണെന്ന വാദം അർത്ഥശൂന്യമാണ് . ഇവയുടെ താത്വികവും പ്രായോഗികവുമായ അടിത്തറകണ്ടത്തിയാൽ ഇക്കാര്യം മനസ്സിലാക്കാവുന്നതേയുള്ളു . ദൈവകല്പനകളെ പലപ്പോഴും അതിന്റെ വാച്യാർത്ഥത്തിൽ മാത്രം സ്വീകരിച്ച് വ്യാഖ്യാനിക്കുന്നതുകൊണ്ടാണ് ഇത്തരത്തിലുള്ള വാദഗതികൾ ഉണ്ടാകുന്നതുതന്നെ . ഏകദൈവവിശ്വാസത്തിന്റെ മതമാണ് യഹൂദമതം . ഇസ്രായേൽ ജനത്തെ തെരഞ്ഞെടുക്കുകയും , വളർത്തുകയും , പരിപാലിക്കുകയും ചെയ്തത് ദൈവമാണ് . ഈ വിശ്വാസം അസഹിഷ്ണുവായ ഒരു ദൈവത്തെക്കുറിച്ചുള്ള ചിന്തയ്ക്കു രൂപംകൊടുത്തു . അതിനാൽ ദൈവം തന്നെ പറയുന്നതായി സങ്കല്പിച്ച് കല്പനകൾ രൂപപ്പെടു ത്തി . അങ്ങനെ നിയമാവർത്തന പുസ്തകപ്രകാരം ആദ്യത്തെകൽപനയും അതിന്റെ വിശദീകരണവും ഇപ്രകാരം വായിക്കപ്പെടുന്നു : “ നിന്റെ ദൈവമായ കർത്താവ് ഞാനാകുന്നു , ഞാനല്ലാതെ മറ്റൊരു ദൈവം നിനക്കുണ്ടാകരുത് . നിനക്കായി ഒരുവിഗ്രഹവും ഉണ്ടാക്കരുത് ; മുകളിൽ ആകാശത്തോ താഴെ ഭൂമിയിലോ , ഭൂമിക്കടിയിലെ ജലത്തിലോ ഉള്ള ഒന്നിന്റെയും പ്രതിമയുണ്ടാക്കരുത് . നീ അവയെ കുമ്പിട്ടാരാധിക്കുകയോ , സേവിക്കുകയോ ചെയ്യരുത് ” ( നിയ 5 : 6-9 ) . എന്നാൽ ഇതേ കാര്യം തന്നെ മറ്റുസ്ഥലങ്ങളിലും വിവരിച്ചിട്ടുണ്ട് . “ അടിമത്തത്തിന്റെ ഭവനമായ ഈജിപ്തിൽനിന്നും നിന്നെ പുറത്തുകൊണ്ടു വന്ന ഞാനാണ് നിന്റെ ദൈവമായ കർത്താവ് . ഞാനല്ലാതെ വേറെ ദേവന്മാർ നിനക്കുണ്ടാകരുത് . മുകളിൽ ആകാശത്തിലോ , താഴെ ഭൂമിക്കടിയിലെ ജലത്തിലോ ഉള്ള ഒന്നിന്റെയും പ്രതിമയോ സ്വരുപമോ നീ നിർമ്മിക്കരുത് . അവയ്ക്കുമുമ്പിൽ പ്രണമിക്കുകയോ അവയെ ആരാധിക്കുകയോ അരുത് " ( പുറ 20 : 3-5 ) . പുറപ്പാടു പുസ്തകത്തിൽ പറഞ്ഞിരിക്കുന്ന കാര്യങ്ങളെ വിശദീകരിക്കുക മാത്രമാണ് നിയമാവർത്തന പുസ്തകം ചെയ്തിട്ടുള്ളത് . ഈജിപ്തിൽനിന്നും മോചിപ്പിച്ച ദൈവം മാത്രമാണ് നിങ്ങളുടെ ദൈവമെന്നും , ദൈവത്തിന്റെ സ്ഥാനത്ത് മറ്റൊന്നും പ്രതിഷ്ഠിക്കാൻ ഇടയാകരുതെന്നുമാണ് ഇതിന്റെ സാരം . നിങ്ങളുടെ കർത്താവായ ദൈവം ഞാനായതിനാൽ മറ്റുദേവന്മാരുടെ പ്രതിമകളൊ പ്രതിരൂപങ്ങളോ എനിക്കു പകരമായി നിർമ്മിക്കരുത് എന്നായിരുന്നു ദൈവത്തിന്റെ കല്പന . അതിനാലാണ് മരുഭൂമിയിൽ വച്ച് അഹറോന്റെ നേതൃത്വത്തിൽ ഇസ്രായേൽ ജനം കാളക്കുട്ടിയെ ഉണ്ടാക്കിയപ്പോൾ മോശയും ദൈവവും ജനത്തോട് കോപിച്ചത് . സ്വർണ്ണം കൊണ്ടുള്ള കാളക്കുട്ടിയെ ഉണ്ടാക്കിയപ്പോൾ ജനം വിളിച്ചുപറഞ്ഞു " ഇസ്രായേലേ , ഇതാ ഈജിപ്തിൽനിന്നും നിന്നെകൊണ്ടുവന്ന ദേവന്മാർ " ( പുറ 32 : 4 ) . ഇതാണ് ദൈവത്ത കോപാകുലനാക്കിയത് . ദൈവത്തിനുപകരം മറ്റു ദേവന്മാരുടെ പ്രതിമകൾ ഉണ്ടാക്കുന്നതാണ് കല്പനവഴി ദൈവം വിലക്കിയത് .

ആരാധിക്കപ്പെടാൻ വേണ്ടി ഉണ്ടാക്കുന്ന വിഗ്രഹങ്ങളെല്ലാം മറ്റു ദൈവങ്ങളുടെ ഗണത്തിൽപെടുന്നതാണ് . തന്റെ പേരിൽ അന്യദൈവങ്ങളെ നിർമ്മിച്ചു പ്രതിഷ്ഠിക്കരുതെന്നു മാത്രമാണ് ദൈവം പറഞ്ഞിട്ടുള്ളത് . രൂപങ്ങൾ നിർമ്മിക്കരുതെന്നും കൊത്തുപണികൾ ചെയ്യരുതെന്നും ദൈവം ഒരിക്കലും പറഞ്ഞിട്ടി ല്ല . പകരം അത് പ്രോത്സാഹിപ്പിക്കുകയാണ് ചെയ്തിട്ടുള്ളത് . പുറപ്പാടിന്റെ പുസ്തകം 31 : 5 പറയുന്നു : “ യൂദാഗോത്രത്തിൽ പെട്ട ഹൂറിന്റെ മകൻ ഉറിയായുടെ മകൻ ബസാലേലിനെ ബുദ്ധിശക്തിയും വിജ്ഞാനവും നല്കി സകല ശില്പവേലകളിലും വൈദഗ്ദ്ധ്യമുള്ളവനായി നിയോഗിച്ചു . സ്വർണ്ണം, വെള്ളി , ഓട് , എന്നിവകൊണ്ട് പണിയുക , രത്നങ്ങൾ പതിക്കാനുള്ളവ ചെത്തിമിനുക്കുക , തടിയിൽ കൊത്തു പണിചെയ്യുക എന്നിവയ്ക്കുവേണ്ടിയാണ് അവനെ നിയോഗിച്ചത് . വീണ്ടും , പുറപ്പാട് 25 : 18-22 പറയുന്നു : കൃപാസനത്തിന്റെ ഇരുവശങ്ങ ളിലുമായി അടിച്ചുപരത്തിയ സ്വർണ്ണം കൊണ്ട് രണ്ടു കെരൂബുകളെ നിർമ്മിക്കണമെന്ന് ദൈവംതന്നെ ആവശ്യപ്പെട്ടിരുന്നു . മാത്രമല്ല , അവയുടെ സ്ഥാനങ്ങൾ ഏതുരീതിയിലായിരിക്കണമെന്നും ദൈവംതന്നെ വിവരിച്ചുകൊടുക്കുന്നു . കൃപാസനത്തിനു മുകളിൽനിന്ന് സാക്ഷ്യപേടകത്തിനു മീതേയുള്ള കെരൂബുകളുടെ മദ്ധ്യേനിന്ന് ഞാൻ നിങ്ങളോടു സംസാരിക്കുമെന്നാണ് ദൈവം പറയുന്നത് . പ്രതിമകൾ നിർമ്മിക്കുന്നതു നിഷിധമാണെന്നു പറയുന്ന ദൈവം അവയുടെ നടുവിൽ നിന്നും സംസാരിക്കുമോ ? സംഖ്യയുടെ പുസ്തകം 21 : 8 - 9 കാണുക . ദൈവം പറയുന്നു : “ ഒരു പിച്ചളസർപ്പത്തെയുണ്ടാക്കിവടിയിൽ ഉയർത്തി നിറുത്തുക , ദംശനമേൽക്കുന്നവർ അതിനെ നോക്കിയാൽ മരിക്കുകയില്ല . മോശ അപ്രകാരം ചെയ്തു . പിച്ചളസർപ്പത്തിന്റെ പ്രതിമയെ നോക്കിയവർ ജീവിച്ചു എന്നാണ് പറയുന്നത് . ദൈവികനിയമങ്ങളുടെ അനുശാസനങ്ങളെ ഓർമ്മപ്പെടുത്താനുള്ള അടയാളങ്ങൾ കണ്ടവരെല്ലാം രക്ഷപ്പെട്ടു എന്നാണ് ജ്ഞാനത്തിന്റെ പുസ്തകം 16 : 6-7 ൽ പറയുന്നത് . പുറപ്പാട് പുസ്തകത്തിലും , നിയമാവർത്തനപുസ്തകത്തിലും പറയുന്ന കാര്യങ്ങൾ അക്ഷരാർത്ഥത്തിലാണ് സ്വീകരിച്ചിരുന്നതെങ്കിൽ ജറുസലെം ദേവാലയ നിർമ്മിതിയെക്കുറിച്ച് രാജാക്കന്മാരുടെ പുസ്തകത്തിൽ പറഞ്ഞിരിക്കുന്ന യാതൊരു അലങ്കാര പണികളും , കൊത്തുരൂപങ്ങളും ഉണ്ടാകുമായിരുന്നില്ല . 1 രാജാ 6:18 , 23 , 29 , 35 ; 7:25 , ഇവ വായിക്കുമ്പോൾ ഇക്കാര്യം വ്യക്തമാകുന്നതാണ് . സിംഹം , കാള , മരങ്ങൾ തുടങ്ങിയവയുടെ രൂപങ്ങൾ കൊത്തിയുണ്ടാക്കുന്നതിനെക്കുറിച്ചും വിവരണങ്ങൾ കാണുവാൻ കഴിയും ( 1 രാജാ , 7:29 , 42-44 , 2 ദിന 3 : 7 , 10 ; 5 : 7 ) . വിജ്ഞാനിയായിരുന്ന സോളമൻ രാജാവ് യഹൂദനിയമത്തെ മറികടന്ന് പ്രവർത്തിച്ചിട്ടുണ്ടെങ്കിലും ഇക്കാര്യത്തിൽ ദൈവഹിതത്തിനെതിരായി പ്രവർത്തിച്ചെന്നു പറയുവാൻ കഴിയുമോ ? മോശ നിർമ്മിച്ച മാലാഖമാരുടെ രൂപങ്ങളെയും , ദേവാലയത്തിൽ സോളമൻ നിർമ്മിച്ച പ്രതിമകളെയും വിഗ്രഹാരാധനയായി കാണാൻ കഴിയുമോ ? പഴയ നിയമത്തിൽ വാഗ്ദാന പേടകത്തിന്റെ കാര്യം പറയുന്നുണ്ട് അതും വിഗ്രഹമോ , പ്രതിമയോ ആയി ബന്ധം ഉണ്ടോ ? എന്ന ചോദ്യം ഇവിടെ ന്യായമായും ഉണ്ടാകാവുന്നതാണ് . വാഗ്ദാന പേടകം ദൈവ സാന്നിദ്ധ്യത്തിന്റെ അടയാളമായിരുന്നു . അഹറോൻ ജനങ്ങളെ നയിച്ചിരുന്ന വടി , മോശ നല്കിയ കല്പനകളുടെ പലക , മരുഭൂമിയിൽ ദൈവകാരുണ്യം ലഭിച്ചതിന്റെ ഓർമ്മയായ മന്ന , എന്നിവയാണ് അതിൽ സൂക്ഷിച്ചിരുന്നത് . അവയെല്ലാം അടക്കം ചെയ്തിരുന്ന പേടകം അവർ വളരെപൂജ്യമായി കരുതി . അതിനുമുമ്പിൽ ധൂപാർച്ചനയും , പ്രാർത്ഥനകളും , ഗീതങ്ങളും , നൃത്തങ്ങളും നടത്തി ആദരിച്ചിരുന്നു . ജോഷ്വായും അനുചരന്മാരും അതിനുമുന്നിൽ സാഷ്ടാംഗം വീണ് പ്രാർത്ഥിച്ചിരുന്നു . പ്രാർത്ഥനയും പരിഹാരപ്രവൃത്തികളും അതിനുമുന്നിൽ നടത്തുകയും ചെയ്തിരുന്നു ( ജോഷ്വ 7 : 6 ) . ഇസായേൽക്കാർ നടത്തിയതായി ബൈബിൾ പറയുന്ന ഇക്കാര്യങ്ങൾ വിഗ്രഹാരാധനയായിരുന്നെന്നു പറയുവാൻ കഴിയുമോ ? മേല്പറഞ്ഞവയിൽനിന്ന് പഴയനിയമത്തിൽ പ്രതിമാനിർമ്മാണത്തെക്കുറിച്ച് എഴുതിയിരിക്കുന്നവയുടെ അന്തരാർത്ഥം എന്താണെന്നു വ്യക്തമാണ് . പ്രതിമകൾ നിർമ്മിക്കുന്നതിനെയല്ല , അതിന്റെ നിയോഗം അഥവാ ഉൾപ്പൊരുളാണ് പ്രാധാന്യമർഹിക്കുന്നത് . കത്തോലിക്കാ സഭ പ്രതിമാവണക്കത്തെയും വിഗ്രഹാരാധനയെയും രണ്ടുകാര്യങ്ങളായാണ് കാണുന്നത് . മലയാള ഭാഷയിൽ " വിഗ്രഹം ' “ സ്വരൂപം ' " പ്രതിമ ' എന്നിങ്ങനെ മൂന്നു വാക്കുകൾ ഉണ്ട് . ശരീരം , ആകൃതി എന്നൊക്കെയാണ് വിഗ്രഹം എന്ന വാക്കിന്റെ സാമാന്യ അർത്ഥം . “ സുഖദുഃഖാദികളെ ഗ്രഹിക്കുന്നത് ' എന്നാണ് അതിന്റെ നിയതാർത്ഥം . ദേവന്റെ വിഗ്രഹമെന്നാൽ ദേവന്റെ ബിംബം , രൂപം എന്നൊക്കെ അനുമാനിക്കാം . എല്ലാ പുരാതന മതങ്ങളിലും തങ്ങൾ ഇഷ്ടദൈവങ്ങളായി കണക്കാക്കുന്നവരുടെ ബിംബങ്ങൾ ആരാധനാവിഷയമായിരുന്നു . അമൂർത്തങ്ങളെന്നു കരുതുന്നവരുടെ മൂർത്തീഭാവമാണ് വിഗ്രഹത്തിലൂടെ പ്രകടമാക്കിയിരുന്നത് . മറ്റൊരു വിധത്തിൽ പറഞ്ഞാൽ ദേവന്റെയോ ദേവിയുടെയോ സാന്നിദ്ധ്യം അവയിൽ ഉണ്ടെന്ന് അവർ വിശ്വസിക്കുന്നു .

യഹൂദമതം ഏകദൈവ വിശ്വാസം പ്രമാണമായി സ്വീകരിക്കുകയും , അനന്തനും അശരീരിയുമായ ദൈവത്തെ ചിത്രീകരിക്കുകയും ചെയ്തപ്പോൾ അരൂപിയായവന്റെ രൂപമോ , മറ്റു ദേവന്മാരുടെ രൂപങ്ങളോ നിർമ്മിക്കരുതെന്ന് നിയമംമൂലം നിഷ്ക്കർഷിച്ചു . ഇതിനാലാണ് ദൈവത്തെ പ്രതിനിധാനം ചെയ്യുന്ന യാതൊന്നിന്റെയും രൂപങ്ങൾ , ബിംബങ്ങൾ ഉണ്ടാക്കരുത് എന്നു പറഞ്ഞത് . ഇന്ദ്രിയഗോചരമായ ഒരു വസ്തുവിന്റെയോ വ്യക്തിയുടെയോ ബാഹ്യരൂപത്തിന്റെ മനുഷ്യനിർമ്മിതമായ അനുകരണമോ , ഛായയോആണ് പ്രതിമയും സ്വരൂപവും പ്രതിനിധാനം ചെയ്യുന്നത് . ജീവി ച്ചിരുന്നതോ , ജീവിച്ചിരിക്കുന്നതോ ആയ ഒരാളുടെ രൂപമാണ് അതിൽ ദൃശ്യമാകുന്നത് . മറ്റുവാക്കിൽ പറഞ്ഞാൽ മൂർത്തമായ ഒന്നിന്റെ മാത്യകയാണ് പ്രതിമ , അല്ലെങ്കിൽ സ്വരൂപം .കലാകാരൻ തന്റെ ഭാവനയനുസ്സരിച്ച് ഒരു വ്യക്തിയുടെ ജീവിതസാഹചര്യങ്ങളെ ഉൾക്കൊണ്ട് മെനഞ്ഞെടുക്കുന്ന മാതൃകയാണ് പ്രതിമ . ഈ പ്രതിമയിൽ ആ വ്യക്തിയുടെയോ , മറ്റേതെങ്കിലും വ്യക്തിയുടേയോ ആത്മാവോ ശരീരമോ സന്നിവേശിപ്പിക്കപ്പെടുന്നില്ല . ഈ വ്യക്തിയെ ഓർമ്മയിൽകൊണ്ടു വരുവാനുള്ള ഉപകരണം മാത്രമാണത് . ഉദാഹരണത്തിന് വിശുദ്ധ സെബസ്ത്യാനോസ് വിശ്വാസത്തിനുവേണ്ടി അമ്പുകൾ ഏറ്റവനായിരുന്നുവെന്ന് ചരിത്രം സാക്ഷ്യപ്പെടുത്തുന്നു . അതിനാൽ അത്തരത്തിലൊരു രൂപം മെനഞ്ഞെടുത്തു . ഇതുപോലെ അപ്പസ്തോലന്മാരിൽ ചിലർ , ചില രക്തസാക്ഷികൾ , വിശുദ്ധർ എന്നിവർ അവരുടെ ജീവിതവുമായി ബന്ധപ്പെട്ട ഓർമ്മപ്പെടുത്തലുകളുമായി കാണപ്പെടുന്നതും ഇതുകൊണ്ടാണ് . അതിനാൽ പരിശുദ്ധ കന്യാമറിയവും വിശുദ്ധരും പ്രതിമാരൂപത്തിൽ കാണപ്പെടുന്നു എന്നല്ല പറയേണ്ടത് അവരെയൊക്കെ ഓർമ്മിക്കാൻ അവരുടെ ഭാവനാത്മക രൂപസാദൃശ്യങ്ങൾ നിർമ്മിച്ചിരിക്കുന്നുവെന്നേയുള്ളു . വിശുദ്ധരുടെ പ്രതിമകളെ തിരുസ്വരൂപങ്ങൾ എന്നു മലയാളഭാഷയിൽ പറയുന്നത് പ്രതിമയോടുള്ള ഭക്ത്യാദരംകൊണ്ടല്ല പിന്നെയോ ആ വിശുദ്ധനോടോ വിശുദ്ധയോടോ ഉള്ള ബഹുമാനവും ആദരവും കൊണ്ടാണ് . ദൈവാലയങ്ങളിലെ തിരുസ്വരൂപവണക്കം വിഗ്രഹാരാ ധനയാകാത്തതെന്തുകൊണ്ടാണെന്നു നേരത്തെ പറഞ്ഞ കാര്യങ്ങളിൽനിന്നും വ്യക്തമാണ് . പ്രതിമ അതിൽ തന്നെ ഒന്നുമല്ല ... അത് വെറും ഓർമ്മപ്പെടുത്തൽ മാത്രമാണ് . ഇവിടെ സ്വാഭാവികമായും കടന്നുവരാവുന്ന ഒരു ചോദ്യമാണ് മേൽപറഞ്ഞ രീതിയിലാണെങ്കിൽ പ്രതിമകളിൽ പൂക്കൾ ചാർത്തുന്നതും അവയുടെ മുന്നിൽ തിരികൾ കത്തിച്ച് ആദരവു പ്രകടിപ്പിക്കുന്നതും പ്രതിമകളെ തൊട്ടുവണങ്ങുന്നതും ശരിയാണോ ? മൂർത്തമായതിന്റെ രൂപമാണെങ്കിൽ അവയെ ആദരിക്കുന്നതിൽ എന്താണ് തെറ്റ് ? ഇതെന്റെ മാതാപിതാക്കളുടെ രൂപങ്ങളാണ് , ഇതെന്റെ സഹോദരങ്ങളുടെ പ്രതിമകളാണ് , ഇതെന്റെ മക്കളുടെതാണ് എന്ന് ഒരു മകനോ , സഹോദരനോ , അപ്പനോ , അമ്മക്കോ പറയാൻ അവകാശമില്ലേ?  ഞാൻ ആദരിക്കുന്നവരുടെയും , സ്നേഹിക്കുന്നവരുടേയും ഓർമ്മകൾ സൂക്ഷിക്കുന്നതിനും അവർ കാണിച്ചുതന്ന നല്ല മാതൃകകൾ അനുസ്മരിക്കുന്നതിനും ലഭിക്കുന്ന അവസരങ്ങളെ ഉപ്പയോഗപ്പെടുത്തുന്നത് തെറ്റാണോ ? ഒരു വ്യക്തി തന്റെ നാടിന്റെ പതാകയെ ആദരിക്കുന്നതുപോലെയോ കുടുംബത്തിന്റെ നന്മകളെക്കുറിച്ച് ബോധവാനാകുന്നതുപോലെയോ മാത്രമാണിത് . തനിക്കുമുമ്പേ കടന്നുപോയ ധീരമാതൃകകളെ അനുസ്മരിക്കുകയും , അനുകരിക്കുകയും മാത്രമാണ് ഇതിലൂടെ സംഭവിക്കുന്നത് . പരിശുദ്ധകന്യാമറിയം , വിശുദ്ധർ , അപ്പസ്തോലന്മാർ തുടങ്ങിയ വരെ ബഹുമാനിക്കുകയും , വണങ്ങുകയും ആദരിക്കുകയും ചെയ്യുന്നു . കാരണം അവരെല്ലാം സൃഷ്ടിയുടെ തലത്തിൽ ഉള്ളവരാണ് . എന്നാൽ സൃഷ്ടികർത്താവും അപരിമേയനുമായ ദൈവത്തോട് സൃഷ്ടിയായ മനുഷ്യൻ വിധേയത്വവും , ആദരവും , സമർപ്പണമനോഭാവവുമൊക്കെ കാണിക്കുന്നത് ആരാധനയിലൂടെയാണ് . ആരാധന ദൈവത്തിനുമാത്രമുള്ളതാണ് . കത്തോലിക്കാസഭ വണങ്ങുന്നത് സ്വരു പത്തെയല്ല സ്വരൂപം ദ്യോതിപ്പിക്കുന്ന വ്യക്തിയേയാണ് . അദ്ദേഹത്തിന്റെ സന്മാതൃക എല്ലാവരെയും ആകർഷിക്കുകയും അദ്ദേഹം എല്ലാവർക്കും മാതൃകയായി ഗണിക്കപ്പെടുകയും ചെയ്യുന്നു . എന്നാൽ അതിഭക്തിയും , അമിത വണക്കവും , കാര്യസാധ്യത്തിനു കൂട്ടുപിടിക്കുന്ന രീതികളും , പ്രവണതയും ഏതുസമൂഹത്തിൽ കാണപ്പെടുന്നുവോ അതു മുളയിലെ നുള്ളിക്കളയേണ്ടതാണ് . കാരണം ഭക്തി അന്ധമായാൽ അത് കടുത്ത തീവ്രവാദത്തിലും അന്ധവിശ്വാസത്തിലും നിപതിക്കാൻ സാദ്ധ്യതയുണ്ട് . ചിലകാര്യങ്ങൾ ചിലയവസരങ്ങളിൽ വിവേകപൂർവ്വം മനസ്സിലാക്കുകയും നിയന്ത്രണ വിധേയമാക്കുകയും വേണം . യാഥാർത്ഥ്യങ്ങൾ യാഥാർത്ഥ്യങ്ങളായിത്തന്നെ നിലകൊള്ളണം . അമിതപ്രാധാന്യം ഒന്നിനും കൊടുക്കാൻ പാടില്ല . ഇവിടെ ഓരോ വ്യക്തിയുടെയും കാഴ്ചപ്പാടുകൾക്കാണ് മാറ്റം വരേണ്ടത്. കൊത്തുരൂപങ്ങൾ നിർമ്മിക്കരുതെന്ന് സത്താപരമായ അർത്ഥത്തിൽ ദൈവം പറഞ്ഞിട്ടില്ല . അവ വണങ്ങുന്നതും ഭക്തിയോടെ വീക്ഷിക്കുന്നതും തെറ്റാണെന്നും പറഞ്ഞിട്ടില്ല . എന്നാൽ ദൈവമായ കർത്താവു മാത്രമാണ് ആരാധനയ്ക്കുയോഗ്യനായ കർത്താവ് എന്ന് അവിടുന്നു പറഞ്ഞിട്ടുമുണ്ട് ( പുറ 25:18 ) . അതിനാൽ പ്രതിമകളെ തൊട്ടു വണങ്ങുന്നതെങ്ങനെയാണ് തെറ്റാകുന്നത് ? ദൈവാരാധനയെക്കുറിച്ച് കത്തോലിക്കാസഭയുടെ മതബോധന ഗ്രന്ഥം ഇപ്രകാരമാണ് സൂചിപ്പിക്കുന്നത് . വെളിപാടിന്റെ എല്ലാ വാക്കുകളിലുംവച്ച് ഒരെണ്ണം അനന്യമാണ് .

ദൈവത്തിന്റെ വെളിപ്പെടുത്തപ്പെട്ട നാമം . തന്നിൽ വിശ്വസിക്കുന്നവരെ ദൈവം തന്റെ നാമം വിശ്വ സിച്ച് ഏല്പിക്കുന്നു . അവിടുന്നു തന്നെതന്നെ തന്റെ വ്യക്തിപരമായ രഹസ്യത്തിൽ അവർക്കു വെളിപ്പെടുത്തുന്നു . നാമത്തിന്റെ ദാനം വിശ്വാസപൂർവ്വകമായ ഉറപ്പിന്റെയും ഉറ്റബന്ധത്തിന്റെയും ക്രമത്തിൽ പെട്ടതാണ് . കർത്താവിന്റെ നാമം പരിശുദ്ധമാണ് . ഇക്കാരണത്താൽ മനുഷ്യൻ അതു ദുരുപയോഗിക്കരുത് . അവൻ അതു തന്റെ മനസ്സിൽ നിശ്ശബ്ദമായ , സ്നേഹപൂർണ്ണമായ ആരാധനയായി സൂക്ഷിക്കണം . അതിനെ വാഴ്ത്താനും പുകഴ്ത്താനും മഹത്വപ്പെടുത്താനുമല്ലാതെ തന്റെ സംസാരത്തിലേക്ക് അതിനെ കൊണ്ടുവരരുത് ( സഖറി 2:13 ; സങ്കീ 29 : 2 ; 96 : 2 ; 113 : 1-2 ) . ദൈവനാമത്തോടുള്ള ബഹുമാനം ദൈവത്തിന്റെതന്നെ രഹസ്യത്തിനും അതുണർത്തുന്ന വിശുദ്ധ യാഥാർത്ഥ്യം മുഴുവനും നല്കപ്പെടേണ്ട ബഹുമാനത്തിന്റെ പ്രകാശനമാണ് . പരിശുദ്ധമായതിനെ സംബന്ധിച്ച ബോധം മതാത്മകതയെന്ന സുകൃതത്തിന്റെ ഒരു ഭാഗമാണ് .ഭയത്തിന് അടിപ്പെടാതെ വിശ്വാസം ഏറ്റുപറഞ്ഞുകൊണ്ട് വിശ്വാസി കർത്താവിന്റെ നാമത്തിനു സാക്ഷ്യം വഹിക്കണം . പ്രഘോഷണപ്രവൃത്തിയും വിശ്വാസ പരിശീലന പ്രവൃത്തിയും നമ്മുടെ കർത്താവായ യേശുക്രിസ്തുവിന്റെ നാമത്തോടുള്ള ആരാധനയും ബഹുമാനവും നിറഞ്ഞതായിരിക്കണം ( ccc 2144 - 2145 ) . ദൈവാരാധനയെന്നാൽ ദൈവനാമത്തോടുള്ള നിശബ്ദമായ സ്തുതിയും സാക്ഷ്യവുമാണ് .

(സീറോ മലബാർ മതബോധന കമ്മീഷൻ പുറത്തിറക്കിയ വിശ്വാസ വഴിയിലെ സംശയങ്ങൾ എന്ന പുസ്തകത്തിൽ നിന്നും)

church prayer saints idolatry Bible Theology Church Teachings