വി. മാർട്ടിൻ ഡി പോറസിനോടുള്ള നൊവേന

Authored by : Liturgical Commission, Diocese Mananthavady On 10-Jul-2024

വി. മാർട്ടിൻ ഡി പോറസിനോടുള്ള നൊവേന

ഒരു സ്പാനിഷ് പ്രഭുവായ ഡോ. ജുവാൻ ഡി പോറസിന്റെയും ഒരു പനാമ നീഗ്രോയായ അന്നാ വെലാസ്ക്വെസിന്റെയും സന്താനമായി 1579 ഡിസംബർ 9-ാം തിയതി മാർട്ടിൽ ലീമായിൽ ജനിച്ചു. ഇളയ സഹോദരിയായിരുന്ന ജയിനിന്റെ ജനനത്തെ തുടർന്ന് ഡോ. ജുവാൻ അമ്മയെയും കുട്ടികളെയും നിഷ്കരുണം ഉപേക്ഷിച്ച് മറ്റൊരു സ്ഥലത്തേക്കു പോയി.

മാർട്ടിന് എട്ടു വയസ്സായപ്പോൾ അദ്ദേഹത്തിന്റെ പിതാവ് ലീമായിലേക്ക് തിരിച്ചുവന്നു. ഒരു ദീനദയാലുവാണ് തന്റെ പുത്രനെന്നറിഞ്ഞ ജുവാൻ സന്തുഷ്ടനാവുകയും ആ ബാലന്റെ ഉപരിനന്മയ്ക്കായി എന്തെങ്കിലും ചെയ്യണമെന്ന് തീരുമാനിച്ച് ഗ്വയാക്വിലിലേക്ക് കൊണ്ടുപോവുകയും ചെയ്തു. അവിടെ രണ്ടു കൊല്ലക്കാലത്തെ വിദ്യാഭ്യാസത്തിനു ശേഷം 12-ാമത്തെ വയസ്സിൽ മാർട്ടിൻ, ക്ഷുരകനും ഡോക്ടറുമായി പ്രവർത്തിച്ചിരുന്ന ഒരാളുടെ കീഴിൽ ജോലിയാരംഭിച്ചു.

15-ാമത്തെ വയസ്സിൽ പ്രാർത്ഥനയ്ക്കും പ്രവർത്തനത്തിനും സമർപ്പിതജീവിതത്തിനുമായി തനിക്ക് ലഭിച്ച ആന്തരികപ്രേരണയനുസരിച്ച് ഡൊമിനിക്കൻ സന്യാസസഭയിൽ മൂന്നാം സഭാംഗമായി മാർട്ടിൻ ചേർന്നു. ഏറ്റവും താണ ജോലികൾ ചെയ്യുന്നതിൽ മാർട്ടിൻ അതീവതാത്പര്യം കാണിച്ചു. ഒരു തുണസഹോദരനായ അദ്ദേഹത്തിന്റെ പ്രാർത്ഥനാചൈതന്യം, ദീനസേവന സന്നദ്ധത, പ്രായ്ശ്ചിത്താരൂപി, പരസ്നേഹം തുടങ്ങിയ സുകൃതങ്ങൾ മറ്റുള്ളവരുടെ ശ്രദ്ധയെ ആകർഷിച്ചു. ധനവാന്മാരിൽ നിന്ന് യാചിച്ചു വാങ്ങിയിരുന്ന തുകകൊണ്ട് ശരാശരി ഇരുന്നൂറു പേർക്ക് മാർട്ടിൻ പ്രതിദിനം ഭക്ഷണം കൊടുത്തിരുന്നു. “സാധുക്കളുടെ പിതാവ്” എന്നാണ് മാർട്ടിൽ അറിയപ്പെട്ടിരുന്നത്.

1639 നവംബർ 3-ന് മാർട്ടിൻ നിര്യാതനായി. മൃതദേഹം കാണുവാനായി എത്തിയത് ആയിരങ്ങളാണ്. അദ്ദേഹത്തിന്റെ ശവകുടീരം അത്ഭുതങ്ങളുടെ കേന്ദ്രമായി മാറി. 1837-ൽ പതിനാറാം ഗ്രിഗോറിയോസ് മാർപാപ്പ മാർട്ടിനെ വാഴ്ത്തപ്പെട്ടവനായി പ്രഖ്യാപിച്ചു. 1962 മെയ് 6-ന് 23-ാം യോഹന്നാൻ മാർപാപ്പ വാഴ്ത്തപ്പെട്ട മാർട്ടിനെ വിശുദ്ധനായി പ്രഖ്യാപിച്ചു. നിരാലംബരുടെയും ക്ലേശമനുഭവിക്കുന്നവരുടെയും പ്രത്യേക മദ്ധ്യസ്ഥനാണ് വിശുദ്ധ മാർട്ടിൻ.

തിരുനാൾ ദിനം : നവംബർ 3

പ്രാരംഭഗാനം

(നിത്യസഹായമാതേ... എന്ന രീതി)

മാർട്ടിൻ ഡി പോറസ് താതാ
സ്നേഹത്തിൻ മാതൃകയേ
ത്യാഗത്തിൻ പര്യായമേ
ഞങ്ങൾക്കായ് പ്രാർത്ഥിക്കണേ

സേവനപാതകളിൽ
പ്രാർത്ഥനാദീപവുമായ്
കാരുണ്യം വർഷിച്ചു നീ
ഞങ്ങൾക്കു മാതൃകയായ്

സഹനത്തിൻ പാതകളിൽ
ഞങ്ങൾ അലഞ്ഞിടുമ്പോൾ
അവിടുത്തെ മദ്ധ്യസ്ഥത്താൽ
ഞങ്ങളെ കാത്തിടേണേ.

കാർമ്മി: പിതാവും പുത്രനും പരിശുദ്ധാത്മാവുമായ ദൈവമേ, ഞങ്ങളങ്ങയെ ആരാധിക്കുകയും സ്തുതിക്കുകയും ചെയ്യുന്നു. അങ്ങയെ ഞങ്ങൾ സ്നേഹിക്കുന്നു. അങ്ങേക്കെതിരായി ചെയ്തു പോയ പാപങ്ങളോർത്ത് ഞങ്ങൾ മനസ്തപിക്കുന്നു, അവയ്ക്കു ഞങ്ങൾ മാപ്പപേക്ഷിക്കുകയും ചെയ്യുന്നു. ഞങ്ങളെ അനുഗ്രഹിക്കണമേ. വി. മാർട്ടിൻ ഡി. പോറസിനെ അനുകരിച്ച്, അനാഥരിലും ക്ലേശിതരിലും അങ്ങയെ ദർശിക്കുവാനും അവർക്ക് സ്നേഹപൂർവ്വം സേവനം ചെയ്യുവാനുമുള്ള അനുഗ്രഹം ഞങ്ങൾക്കു പ്രദാനം ചെയ്യണമേ. അങ്ങേ പുത്രനായ ഈശോമിശിഹായുടെ നാമത്താലും സുകൃതസമ്പന്നമായ ജീവിതത്താൽ അങ്ങയെ പ്രസാദിപ്പിച്ച വിശുദ്ധന്റെ മദ്ധ്യസ്ഥതയാലും ഞങ്ങളുടെ പ്രാർത്ഥനകൾ കൈക്കൊള്ളണമേ. സകലത്തിന്റെയും നാഥാ എന്നേക്കും,

സമൂ: ആമ്മേൻ

കാർമ്മി: ഈ എളിയവരിൽ ഒരുവന് നിങ്ങൾ ചെയ്തു കൊടുത്തപ്പോഴെല്ലാം എനിക്കു തന്നെയാണ് ചെയ്തു തന്നത് എന്ന മിശിഹായുടെ വാക്കുകളനുസരിച്ച് അനാഥർക്കും ദുഃഖിതർക്കും വേണ്ടി ജീവിതം മുഴുവൻ മാറ്റിവച്ച വി. മാർട്ടിൻ ഡി പോറസേ

സമൂ: ജീവകാരുണ്യപ്രവൃത്തികൾ ചെയ്യുന്നതിനും അവിടുന്നു കാണിച്ചു തന്ന പ്രാർത്ഥനയുടെ പാതയിലൂടെ ചരിക്കുന്നതിനും ഞങ്ങളെ സഹായിക്കണമേ.

കാർമ്മി: ക്ലേശകരമായ അദ്ധ്വാനങ്ങൾക്കിടയിലും (സമൂഹവും ചേർന്ന്)/ ദൈവവുമായി ഐക്യം പുലർത്തുകയും/ ദിവ്യനാഥനുമായി നിരന്തരം സംഭാഷിക്കുകയും ചെയ്തുകൊണ്ട്/ ജീവിതം മുഴുവൻ ഒരു ത്യാഗബലിയായി മാറ്റിയ/ വി. മാർട്ടിൻ ഡി പോറസേ/ അനുദിനജീവിതത്തിൽ/ സ്വർഗ്ഗോന്മുഖരായി വർത്തിക്കുവാൻ/ ഞങ്ങളെ സഹായിക്കണമേ./ പ്രാർത്ഥനയും പ്രായശ്ചിത്തകൃത്യങ്ങളും വഴി /ജീവിതബലി പൂർത്തിയാക്കിയ അങ്ങേക്ക്/ അത്ഭുതങ്ങൾ പ്രവർത്തിക്കുവാനുള്ള വരം നല്കിയ/ സർവ്വശക്തനായ ദൈവത്തിൽ നിന്ന്/ പ്രാർത്ഥനയുടെയും പ്രായശ്ചിത്തത്തിന്റെയും ചൈതന്യം/ ഞങ്ങൾക്കു പ്രാപിച്ചുതരികയും/സുവിശേഷോപദേശങ്ങൾ അനുസരിച്ചു ജീവിക്കുവാൻ/ ഞങ്ങളെ സഹായിക്കുകയും ചെയ്യണമേ./ സകലത്തിന്റെയും നാഥാ, എന്നേക്കും ആമ്മേൻ./

സങ്കീർത്തനം (62,63)

കാർമ്മി: ദൈവത്തിൽ മാത്രമാണ് എന്റെ ആശ്വാസം, അവിടുന്നാണ് എനിക്ക് രക്ഷ നല്കുന്നത്. അവിടുന്ന് മാത്രമാണെന്റെ അഭയശിലയും കോട്ടയും. ഞാൻ കുലുങ്ങി വീഴുകയില്ല.

സമൂ: എന്റെ മോചനവും മഹിമയും ദൈവത്തിലാണ്. എന്റെ രക്ഷാശിലയും അഭയവും ദൈവമാണ്.

കാർമ്മി: ജനമേ, എന്നും ദൈവത്തിൽ ശരണം വയ്ക്കുവിൻ. അവിടുത്തെ മുമ്പിൽ നിങ്ങളുടെ ഹൃദയം തുറക്കുവിൻ. അവിടുന്നാണ് നമ്മുടെ സങ്കേതം.

സമൂ: ദൈവമേ, അവിടുന്നാണെന്റെ ദൈവം. ഞാനങ്ങയെ തേടുന്നു. എന്റെ ആത്മാവ് അങ്ങേയ്ക്കായ് ദാഹിക്കുന്നു.

കാർമ്മി: പിതാവിനും പുത്രനും പരിശുദ്ധാത്മാവിനും സ്തുതി

സമൂ: ആദിമുതൽ എന്നേക്കും, ആമ്മേൻ.

കാറോസൂസ

കാർമ്മി: നമുക്കെല്ലാവർക്കും സന്തോഷത്തോടും ഉത്സാഹത്തോടും കൂടെ ദൈവകൃപയിൽ ആശ്രയിച്ചുകൊണ്ട് വി. മാർട്ടിൻ ഡി പോറസേ ഈശോയോട് അപേക്ഷിക്കണമേ എന്ന് പ്രാർത്ഥിക്കാം.