വി. കൊച്ചുത്രേസ്യയോടുള്ള നൊവേന

Authored by : Liturgical commission, Diocese of Mananthavady On 10-Jul-2024

വി. കൊച്ചുത്രേസ്യയോടുള്ള നൊവേന

2015-ൽ ഫ്രാൻസിസ് മാർപാപ്പ വിശുദ്ധരായി പ്രഖ്യാപിച്ച ലൂയി മാർട്ടിന്റെയും സെലിഗ്വരിന്റെയും ഒമ്പതാമത്തെ സന്താനമായി 1873 ജനുവരി 2-ാം തിയതി ഫ്രാൻസിലെ അലൈൻസോണിൽ കൊച്ചുത്രേസ്യ ജനിച്ചു. സെലിഗ്വരിൻ സ്തനാർബുദം പിടിപെട്ട് 1877-ൽ മൃതിയടഞ്ഞ ശേഷം ലൂയി മാർട്ടിനും കുടുംബവും ലിസ്യൂവിലെ ലിബ്യുസോണ എന്ന ഭവനത്തിലേക്ക് താമസം മാറ്റി.

ലിസ്യുവിലെ ബനഡിക്ടൈൻ സന്ന്യാസിനികളുടെ വിദ്യാലയത്തിലായിരുന്നു ത്രേസ്യയുടെ സ്കൂൾ വിദ്യാഭ്യാസം. പ്രഥമ ദിവ്യകാരുണ്യ സ്വീകരണമായിരുന്നു അവളുടെ സ്കൂൾ ജീവിതത്തിലെ ഏറ്റവും അവിസ്മരണീയ സംഭവമെന്ന് ആത്മകഥയിൽ അവൾ വിവരിക്കുന്നുണ്ട്. പഠനകാലത്ത് രോഗബാധിതയായ ത്രേസ്യയ്ക്ക് പരിശുദ്ധ കന്യകാമറിയത്തിന്റെ മാദ്ധ്യസ്ഥതയിൽ ലഭിച്ച രോഗശാന്തി അവളുടെ ജീവിതത്തിലെ വഴിത്തിരിവായിത്തീർന്നു. പിതാവിന്റെയും സഹോദരിമാരുടെയും ശിക്ഷണത്തിൽ പുണ്യാഭ്യസനത്തിൽ അഭിവൃദ്ധി പ്രാപിച്ച അവൾ, കർമ്മല മഠത്തിൽ ചേർന്ന് ദൈവമഹത്വത്തിനായി ജീവിക്കുവാൻ ചെറുപ്പം മുതലേ ആഗ്രഹിച്ചു. പതിനഞ്ചാം വയസ്സിൽ കർമ്മല മഠത്തിൽ ചേരാൻ സഭാ നിയമങ്ങൾ അനുകൂലമല്ലായിരുന്നെങ്കിലും അവളുടെ അത്യുൽകടമായ അഭിവാഞ്ഛ തിരിച്ചറിഞ്ഞ സഭാധികാരികൾ അവളെ അതിനനുവദിച്ചു. 1890-ൽ ആദ്യവ്രതാനുഷ്ഠാനം നടത്തിയ അവൾ ഉണ്ണീശോയുടെയും തിരുമുഖത്തിന്റെയും ത്രേസ്യ എന്ന പേരും സ്വീകരിച്ചു. ഈശോയുടെ സ്നേഹത്തിനു മാത്രമായി സമർപ്പിക്കപ്പെട്ട സന്യാസ ജീവിതം കൊച്ചുത്രേസ്യയ്ക്ക് സ്നേഹത്തിന്റെ ഒരു പ്രയാണം തന്നെയായിരുന്നു.

അമ്മത്രേസ്യ, കുരിശിന്റെ യോഹന്നാൻ തുടങ്ങിയ വലിയ വിശുദ്ധരുടെ പാത തനിക്ക് അഗമ്യമാണെന്നു പറഞ്ഞ കൊച്ചുത്രേസ്യ ഏവർക്കും പിന്തുടരാവുന്ന ആത്മീയശിശുത്വത്തിന്റെ പാത കണ്ടെത്തി. ജീവിതത്തിലെ ഓരോ നിമിഷവും ഓരോ പ്രവൃത്തിയും സ്നേഹത്താൽ പൊതിയുകയായിരുന്നു അവൾ കണ്ടെത്തിയ ഏകമാർഗ്ഗം. പിതാവായ ദൈവത്തിലുള്ള നിസ്സീമമായ ആശ്രയമായിരുന്നു ഈ ആത്മീയതയുടെ കാതൽ. സ്വർഗ്ഗത്തിലേക്കുള്ള കുറുക്കുവഴിയെന്നാണ് കൊച്ചുത്രേസ്യ ഇതിനെ വിശേഷിപ്പിച്ചത്.

പാപികളുടെ മാനസാന്തരത്തിനും വൈദികരുടെ വിശുദ്ധിക്കുമായി കൊച്ചുത്രേസ്യ തീക്ഷ്ണതയോടെ പ്രാർത്ഥിച്ചു. പഞ്ചഭൂഖണ്ഡങ്ങളിലും പ്രേഷിതവേല ചെയ്യാൻ ആഗ്രഹിച്ച ചെറുപുഷ്പം തന്റെ ജീവിതവും പ്രത്യേകിച്ച് സഹനവും പ്രേഷിതർക്കെല്ലാമായി സമർപ്പിച്ചു. ക്ഷയ രോഗം ബാധിച്ച കൊച്ചുത്രേസ്യ അതീവസഹനത്തിലൂടെയാണ് കടന്നുപോയിരുന്നത്. ശാരീരികവേദനകൾ കൂടാതെ ആത്മീയരാത്രിയുടെ സംഘർഷങ്ങളും അവളെ തേടിയെത്തി. എല്ലാ വേദനകളും ദൈവസ്നേഹത്തെ പ്രതി അവൾ പുഞ്ചിരിയോടെ ഏറ്റെടുത്തു. “ഞാൻ മരിക്കുകയല്ല. ജീവനിലേക്ക് പ്രവേശിക്കുകയാണ്..... ദൈവമേ ഞാൻ അങ്ങയെ സ്നേഹിക്കുന്നു” എന്നു പറഞ്ഞ് 1897 സെപ്റ്റംബർ 30-ാം തിയതി തന്റെ പ്രിയനാഥന്റെ പക്കലേക്ക് അവൾ പറന്നുയർന്നു.

1908-ൽ കൊച്ചുത്രേസ്യായുടെ നാമകരണ നടപടികൾ ആരംഭിക്കുകയും 1925 മെയ് 17-ാം തിയതി പതിനൊന്നാം പിയൂസ് മാർപാപ്പ കൊച്ചു ത്രേസ്യ വിശുദ്ധയെന്ന് പ്രഖ്യാപിക്കുകയും ചെയ്തു. 1927-ൽ വിശുദ്ധ ഫ്രാൻസിസ് സേവ്യറിനൊപ്പം അഖിലലോക മിഷൻ മദ്ധ്യസ്ഥയായും 1997-ൽ വേദപാരംഗതയായും തിരുസഭ പ്രഖ്യാപിച്ചു.

തിരുനാൾ ദിനം : ഒക്ടോബർ 1

പ്രാരംഭഗാനം

കൊച്ചുത്രേസ്യായേ ധനേൃ
പ്രാർത്ഥിക്ക ഞങ്ങൾക്കായി നീ
സോദരർ ഞങ്ങൾക്കായി നീ
പ്രാർത്ഥിക്ക സ്നേഹറാണീ (3 പ്രാവശ്യം)

കാർമ്മി: നിങ്ങൾ മാനസാന്തരപ്പെട്ട് ശിശുക്കളെപ്പോലെ ആകുന്നില്ലെങ്കിൽ സ്വർഗ്ഗരാജ്യത്തിൽ പ്രവേശിക്കുകയില്ലെന്ന് ഞങ്ങളെ പഠിപ്പിച്ച ഈശോയെ, കന്യകയും വേദപാരംഗതയുമായ വി. കൊച്ചുത്രേസ്യായുടെ ധന്യമായ ജീവിതത്തിലൂടെ ശിശുതുല്യമായ എളിമയുടെയും ദൈവസ്നേഹത്തിന്റെയും പരസ്നേഹത്തിന്റെയും മഹനീയ മാതൃക ഞങ്ങൾക്കു നല്കിയല്ലോ. ഈ വിശുദ്ധയെ അനുകരിച്ച് അങ്ങയോടുള്ള സ്നേഹത്താൽ പൂരിതരായി ജീവിക്കുവാനും സഹോദരങ്ങളുടെ ആത്മരക്ഷയ്ക്കായി യത്നിക്കുവാനും ഞങ്ങളെ അനുഗ്രഹിക്കണമേ. സകലത്തിന്റെയും നാഥാ, എന്നന്നേക്കും,

സമൂ: ആമ്മേൻ,

കാർമ്മി: സഹനത്തിന്റെ പാതയിലൂടെ നടന്ന മിശിഹായുമായി താദാത്മ്യം പ്രാപിക്കുകയും, സ്വർഗ്ഗവാസം ഭൂമിയിൽ നന്മ ചെയ്യാൻ ചെലവഴിക്കുമെന്ന് വാഗ്ദാനം നല്കുകയും ചെയ്ത ലിസ്യൂവിലെ വി. കൊച്ചുത്രേസ്യായേ,

സമൂ: അനുദിനജീവിതക്ലേശങ്ങളിലൂടെ വിശുദ്ധി പ്രാപിക്കാൻ ഞങ്ങളെ സഹായിക്കണമേ.

കാർമ്മി: ഈശോയുടെ വാത്സല്യഭാജനവും(സമൂഹവും ചേർന്ന്)/ വോദപാരംഗതയുമായ വി. കൊച്ചുത്രേസ്യായേ നിന്റെ മാതൃകയനുസരിച്ച്/ നിർമ്മലമായി ജീവിക്കുവാനും/ സ്വർഗ്ഗസ്ഥനായ പിതാവ് നല്കുന്ന/ സന്തോഷങ്ങളും ദുഃഖങ്ങളും നല്ല മനസ്സോടെ സ്വീകരിക്കാനും/ എന്റെ വിചാരങ്ങളും വചനങ്ങളും പ്രവൃത്തികളും/ ദൈവസ്തുതിക്കായി സമർപ്പിക്കാനും/ എന്നെ സഹായിക്കണമേ./ എന്റെ എല്ലാ പ്രാർത്ഥനകളിലും/ നിന്റെ സഹായം ഉണ്ടാകണമേ./ എന്റെ കുടുംബാംഗങ്ങളെയും സ്നേഹിതരെയും/ അയല്ക്കാരെയും കൈവിടല്ലേ./ വൈദികരെയും സന്യസ്തരെയും മിഷണറിമാരെയും/ അവരുടെ സമർപ്പണജീവിതത്തിന്റെ തീക്ഷണതയിൽ സംരക്ഷിക്കണമേ./ ദൈവമേ, ഞാൻ നിന്നെ സ്നേഹിക്കുന്നു എന്നു പറഞ്ഞ്/ നീ ഭാഗ്യമരണം പ്രാപിച്ച പോലെ/ കർത്താവ് എന്നെ വിളിക്കാൻ തിരുമനസ്സാകുന്ന സമയത്ത്/ ദൈവസ്നേഹത്തിലും പ്രസാദവരത്തിലും/ ഇഹലോകവാസം വെടിഞ്ഞ്/ നിത്യസൗഭാഗ്യത്തിൽ പ്രവേശിക്കുവാൻ എന്നെ സഹായിക്കണമേ./ ആമ്മേൻ

സങ്കീർത്തനം (27)

കാർമ്മി: കർത്താവ് എന്റെ പ്രകാശവും രക്ഷയുമാകുന്നു./ ഞാൻ ആരെ ഭയപ്പെടണം.

സമൂ: ഒരു സൈന്യം തന്നെ എനിക്കെതിരായി പാളയമടിച്ചാലും/ എന്റെ ഹൃദയം ഭയം അറിയുകയില്ല.

കാർമ്മി: കർത്താവ് എന്റെ കോട്ടയാണ്/ ഞാൻ ആരെ പേടിക്കണം.

സമൂ: എനിക്കെതിരായി യുദ്ധമുണ്ടായാലും/ ഞാൻ ആത്മധൈര്യം വെടിയുകയില്ല

കാർമ്മി: എന്നെ വലയം ചെയ്യുന്ന ശത്രുക്കളുടെ മുകളിൽ/ എന്റെ ശിരസ്സ് ഉയർന്നു നിൽക്കും

സമൂ: കർത്താവേ ഞാൻ ഉച്ചത്തിൽ വിളിച്ചപേക്ഷിക്കുമ്പോൾ/ കാരുണ്യപൂർവ്വം എനിക്കുത്തരമരുളണമേ.

കാർമ്മി: അങ്ങയുടെ മുഖം എന്നിൽ നിന്നു മറച്ചുവയ്ക്കരുതേ/ അങ്ങയുടെ ദാസനെ കോപത്തോടെ തള്ളിക്കളയരുതേ,

സമൂ: രക്ഷകനായ ദൈവമേ എന്നെ തിരസ്കരിക്കരുതേ/ അങ്ങയുടെ വഴി എനിക്കു കാണിച്ചു തരണമേ,

കാർമ്മി: പിതാവിനും പുത്രനും പരിശുദ്ധാത്മാവിനും സ്തുതി

സമൂ: ആദിമുതൽ എന്നേക്കും, ആമ്മേൻ.

കാറോസൂസ

കാർമ്മി: നമുക്കെല്ലാവർക്കും സന്തോഷത്തോടും ഉത്സാഹത്തോടും കൂടെ ദൈവകൃപയിൽ ആശ്രയിച്ചുകൊണ്ട് വി. കൊച്ചുത്രേസ്യായേ, ഈശോയോട് അപേക്ഷിക്കണമേ എന്ന് പ്രാർത്ഥിക്കാം.