വി. യാക്കോബ് ശ്ലീഹായോടുള്ള നൊവേന

Authored by : Liturgical Commission, Diocese Mananthavady On 10-Jul-2024

വി. യാക്കോബ് ശ്ലീഹായോടുള്ള നൊവേന

ഈശോയുടെ പന്ത്രണ്ടു ശിഷ്യന്മാരിൽ ഒരുവനായ വി. യാക്കോബ് സെബദി-സലോമി ദമ്പതികളുടെ പുത്രനാണ്. ഈശോയുടെ വളർത്തു പിതാവായ ജോസഫിന്റെ സഹോദരനാണ് സെബദി. ഇടിമുഴക്കത്തിന്റെ പുത്രന്മാരെന്ന് അറിയപ്പെട്ടിരുന്ന യാക്കോബും യോഹന്നാനും മത്സ്യ ബന്ധനത്തിലേർപ്പെട്ടിരിക്കെയാണ് മിശിഹായാൽ വിളിക്കപ്പെടുന്നത്. ശ്ലീഹന്മാരുടെ ഗണത്തിൽ ചെറിയ യാക്കോബ് ഉണ്ടായിരുന്നതിനാൽ ഈ ശ്ലീഹാ വലിയ യാക്കോബ് എന്നുകൂടി അറിയപ്പെടുന്നു. ശ്ലീഹന്മാരിൽ പ്രധാനരായി പത്രോസിനോടൊപ്പം യാക്കോബും സഹോദരൻ യോഹന്നാനും ഉണ്ടായിരുന്നു.

ലോകത്തിന്റെ നാനാഭാഗങ്ങളിലേക്ക് സുവിശേഷപ്രഘോഷണത്തിന് അപ്പസ്തോലന്മാർ പുറപ്പെട്ടു. യൂദായിലെ 12 ഗോത്രങ്ങളിലും സുവിശേഷം പ്രസംഗിച്ച ശേഷം വി. യാക്കോബ് സ്പെയിനിൽ മിശിഹായെ പ്രസംഗിച്ചു. ആ രാജ്യം മുഴുവൻ മിശിഹായെ രക്ഷകനായി സ്വീകരിച്ച് ക്രിസ്ത്യാനികളായി എന്ന് പാരമ്പര്യം സാക്ഷ്യപ്പെടുത്തുന്നു.

ഹേറോദ് അഗ്രിപ്പായുടെ കാലത്ത് മതപീഡനം പൊട്ടിപ്പുറപ്പെട്ടപ്പോൾ ഈശോയിലുള്ള വിശ്വാസം ഏറ്റുപറഞ്ഞ് ശ്ലീഹ സധൈര്യം മരണം വരിച്ചു. തലവെട്ടിക്കൊല്ലുവാനുണ്ടായ രാജകല്പനയുണ്ടായപ്പോൾ വാളിനുമുമ്പിൽ പതറാതെ നിന്നുകൊണ്ടാണ് അദ്ദേഹം രക്തസാക്ഷിമകുടം ചൂടിയത്. ശ്ലീഹന്മാരിലെ പ്രഥമരക്തസാക്ഷി യാക്കോബാണ്.

തിരുനാൾ ദിനം : ഏപ്രിൽ 30

പ്രാരംഭഗാനം

(അദ്ധ്വാനിക്കുന്നവർക്കും.. എന്ന രീതി)

സ്നേഹസ്വരൂപാ ദൈവമേ
ആരാധിച്ചേവം നിന്നെ
നന്ദിചൊല്ലി വാഴ്ത്തീടാം
സ്വർഗ്ഗീയ ദാനങ്ങൾക്കായ്

മാനവരക്ഷയ്ക്കായ് നിൻ
സൂനുവേ നല്കാൻ പോലും
ഇത്രയും ആഴമായ് നീ
ലോകത്തെ സ്നേഹിച്ചല്ലോ

യാക്കോബു ശ്ലീഹാ തൻ്റെ
ധന്യമാം മദ്ധ്യസ്ഥത്താൽ
നിൻ സുതൻ ഞങ്ങളിൽ നീ
കാരുണ്യം തൂകീടേണേ

കാർമ്മി: അനുഗ്രഹസമ്പന്നനും സ്നേഹനിധിയുമായ ദൈവമേ, വി. യാക്കോബ് ശ്ലീഹായുടെ മാദ്ധ്യസ്ഥം തേടി അവിടുത്തെ തിരുസന്നധിയിൽ ഞങ്ങൾ അണയുന്നു. ദുഃഖങ്ങളും ദുരിതങ്ങളും കഷ്ടങ്ങളും നഷ്ടങ്ങളും രോഗങ്ങളും ആകുലതകളും വഴി ഏറെ കഷ്ടപ്പെടുന്ന ഞങ്ങളെ കടാക്ഷിക്കണമേ. തിരുസുതനായ ഈശോയുടെ തിരുനാമത്തിലും വി. യാക്കോബ് ശ്ലീഹായുടെ മദ്ധ്യസ്ഥതയിലും ഞങ്ങളർപ്പിക്കുന്ന പ്രാർത്ഥനകൾ ശ്രവിച്ച് ഞങ്ങളെ അനുഗ്രഹിക്കണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ, എന്നേക്കും,

സമൂ: ആമ്മേൻ

കാർമ്മി: ശ്ലീഹന്മാരിലെ പ്രഥമരക്തസാക്ഷിയും ശത്രുസൈന്യങ്ങളിൽ നിന്ന് ഞങ്ങളെ രക്ഷിക്കുന്നവനുമായ വി. യാക്കോബ് ശ്ലീഹായേ,

സമൂ: എല്ലാ അപകടങ്ങളിലും ദൈവത്തിൽ ആശ്രയിക്കാൻ ഞങ്ങളെ പഠിപ്പിക്കണമേ.

കാർമ്മി: പിതാവായ ദൈവമേ (സമൂഹവും ചേർന്ന്)/ അങ്ങയുടെ മഹത്വത്തിനും/ ഞങ്ങളുടെ ആത്മീയവും ലൗകീകവുമായ അനുഗ്രഹസിദ്ധികൾക്കും വേണ്ടി/ ഞങ്ങളുടെ സ്വർഗ്ഗീയ മദ്ധ്യസ്ഥനായ വി. യാക്കോബിനോടു ചേർന്ന്/ ഞങ്ങൾ അങ്ങയെ സ്തുതിക്കുന്നു./ പിതാവേ, ഞങ്ങൾ അങ്ങയുടേതാകുന്നു./ അങ്ങേയ്ക്കുവേണ്ടി സൃഷ്ടിക്കപ്പെട്ടവരാകുന്നു./ നീതിയുടെയും കാരുണ്യത്തിന്റെയും ഉറവിടമായ അങ്ങ്/ ഞങ്ങളുടെ വിധികർത്താവാണെന്ന് ഞങ്ങൾ പ്രഖ്യാപിക്കുന്നു./ രക്ത സാക്ഷിമകുടം ചൂടിക്കൊണ്ട്/ തിരുക്കുമാരനോടുള്ള സ്നേഹവും വിശ്വസ്തതയും ധീരമായി പ്രഖ്യാപിച്ച/ യാക്കോബു ശ്ലീഹായുടെ വിശ്വാസ സ്ഥിരതയും/ സന്മാർഗ്ഗനിഷ്ഠയും പരിത്യാഗമനഃസ്ഥിതിയും/ ദൈവ സ്നേഹവും വിശ്വസ്തതയും ഞങ്ങൾക്കും നല്കണമേ/ ആമ്മേൻ.

സങ്കീർത്തനം (16,18,34)

കാർമ്മി: ദൈവമേ, ഞങ്ങൾ അങ്ങയിൽ ശരണപ്പെടുന്നു, അവിടുന്നാണ് ഞങ്ങളുടെ ഓഹരിയും പാനപാത്രവും.

സമൂ: കർത്താവേ, ഞങ്ങളങ്ങയിൽ ആശ്രയിക്കുന്നു. ഞങ്ങൾ ഒരിക്കലും ലജ്ജിതാരാകാതിരിക്കട്ടെ. ശത്രുക്കളുടെ മേൽ ഞങ്ങൾ വിജയം ആഘോഷിക്കട്ടെ

കാർമ്മി: ഹൃദയം നുറുങ്ങിയവർക്ക് കർത്താവ് സമീപസ്ഥനാകുന്നു. മനമുരുകിയവരെ അവിടുന്നു രക്ഷിക്കുന്നു.

സമൂ: അവിടുത്തെ നോക്കിയവരെല്ലാം പ്രകാശിതരായി. സർവ്വഭയങ്ങളിൽ നിന്നും അവിടുന്ന് നമ്മെ മോചിപ്പിച്ചു.

കാർമ്മി: ദൈവമേ, എനിക്ക് നീതി നടത്തിത്തരണമേ. അധർമ്മികളിൽ നിന്നും എന്നെ മോചിപ്പിക്കണമേ

സമൂ: കഷ്ടകാലത്തിൽ ഞാൻ കർത്താവിനെ വിളിച്ചപേക്ഷിച്ചു. ഇടിമുഴക്കത്തിന്റെ ശബ്ദത്തിൽ കർത്താവ് എനിക്കുത്തരം നല്കി.

കാർമ്മി: പിതാവിനും പുത്രനും പരിശുദ്ധാത്മാവിനും സ്തുതി

സമൂ: ആദിമുതൽ എന്നേക്കും ആമ്മേൻ

കാറോസൂസ

കാർമ്മി: നമുക്കെല്ലാവർക്കും വിശ്വാസത്തോടും പ്രതീക്ഷയോടും കൂടെ ദൈവകൃപയിൽ ആശ്രയിച്ചുകൊണ്ട് വി. യാക്കോബ് ശ്ലീഹായെ, ഈശോയോട് അപേക്ഷിക്കണമേ എന്ന് പ്രാർത്ഥിക്കാം