മരണവീട്ടിലുളള പ്രാർത്ഥനാകർമ്മങ്ങൾ

Authored by : Liturgical commission, Diocese of Mananthavady On 19-Aug-2024

മരണവീട്ടിലുളള പ്രാർത്ഥനാകർമ്മങ്ങൾ

(അവൈദികരുടെ ഉപയോഗത്തിനായുള്ളത്)

(വലിയ ക്രമം)

നേതാവ്: പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ,

സമൂ: ആമ്മേൻ

നേതാ: സ്വർഗ്ഗസ്ഥനായ ഞങ്ങളുടെ പിതാവേ (സമൂഹവും ചേർന്ന് പൂർത്തിയാക്കുന്നു)

ശുശ്രൂ: നമുക്ക് പ്രാർത്ഥിക്കാം, സമാധാനം നമ്മോടു കൂടെ

നേതാ: കർത്താവായ ദൈവമേ, അങ്ങ് ലോകത്തേയും അതിലുള്ള സർവ്വചരാചരങ്ങളെയും സൃഷ്ടിക്കുകയും പരിപാലിക്കുകയും ചെയ്തുന്നുവല്ലോ. സർവ്വമഹത്വങ്ങൾക്കും അർഹനായ അങ്ങയെ ഞങ്ങൾ ആരാധിക്കുകയും സ്തുതിക്കുകയും ചെയ്യുന്നു. ഞങ്ങളുടെ ജീവന്റെ കാരണവും ആത്മാവിന്റെ പ്രത്യാശയും അങ്ങാണെന്ന് ഞങ്ങൾ ഏറ്റു പറയുന്നു. ജീവന്റെയും മരണത്തിന്റെയും നാഥനും നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ, എന്നേക്കും

സമൂ: ആമ്മേൻ

സങ്കീർത്തനം (16,17)

ദൈവമേ, എന്നെ കാത്തുകൊള്ളണമേ
ഞാൻ അങ്ങയിൽ ശരണം വച്ചിരിക്കുന്നു

അവിടുന്നാണ് എന്റെ കർത്താവ്
അങ്ങയിൽ നിന്നല്ലാതെ എനിക്ക് നന്മയില്ല

കർത്താവാണ് എന്റെ ഓഹരിയും പാനപാത്രവും
എന്റെ ഭാഗധേയം അവിടുത്തെ കരങ്ങളിലാണ്.

അഭികാമ്യമായ ദാനമാണ് എനിക്ക് കിട്ടിയിരിക്കുന്നത്.
വിശിഷ്ടമായ അവകാശം എനിക്ക് ലഭിച്ചിരിക്കുന്നു

എനിക്കുപദേശം നല്കുന്ന കർത്താവിനെ ഞാൻ വാഴ്ത്തുന്നു.
രാത്രിയിലും എന്റെ അന്തരംഗത്തിൽ പ്രബോധനം നിറയുന്നു.

കർത്താവ് എപ്പോഴും എന്റെ കൺമുമ്പിലുണ്ട്.
അവിടുന്ന് എന്റെ വലതുഭാഗത്തുള്ളതുകൊണ്ട്
ഞാൻ കുലുങ്ങുകയില്ല.

അതിനാൽ എന്റെ ഹൃദയം സന്തോഷിക്കുകയും
അന്തരംഗം ആനന്ദം കൊള്ളുകയും ചെയ്തു.
എന്റെ ശരീരം സുരക്ഷിതമായി വിശ്രമിക്കുന്നു
അവിടുന്ന് എന്നെ പാതാളത്തിൽ തള്ളുകയില്ല.

അങ്ങയുടെ പരിശുദ്ധൻ ജീർണ്ണിക്കാൻ അനുവദിക്കുകയുമില്ല
അങ്ങ് എനിക്ക് ജീവന്റെ മാർഗ്ഗം കാണിച്ചുതരുന്നു.
അങ്ങയുടെ സന്നിധിയിൽ ആനന്ദത്തിന്റെ പൂർണതയുണ്ട്.
വലതുകൈയിൽ ശാശ്വതമായ സന്തോഷവും
നീതി നിമിത്തം ഞാൻ അങ്ങയുടെ മുഖം ദർശിക്കും
ഉണരുമ്പോൾ ഞാൻ അങ്ങയുടെ രൂപം കണ്ട് സംതൃപ്തിയടയും
ഞാനങ്ങയെ പൂർണമായി സ്നേഹിക്കുന്നു
എന്റെ രക്ഷയും കോട്ടയും അങ്ങുതന്നെയാണല്ലോ
പിതാവിനും പുത്രനും പരിശുദ്ധാത്മാവിനും സ്തുതി
ആദിമുതൽ എന്നേക്കും ആമ്മേൻ.

ശുശ്രൂ: നമുക്ക് പ്രാർത്ഥിക്കാം, സമാധാനം നമ്മോടുകൂടെ

നേതാ: സ്രഷ്ടാവായ ദൈവമേ, അങ്ങയുടെ ഛായയിൽ സൃഷ്ടിക്കുകയും അനന്തമായ കാരുണ്യത്താൽ പരിപാലിക്കുകയും അങ്ങയുടെ കല്പനയാൽ ഈ ലോകത്തിൽ നിന്ന് യാത്രയാകുകയും ചെയ്തിരിക്കുന്ന ഞങ്ങളുടെ പ്രിയ സഹോദരനെ /സഹോദരിയെ ദയാപൂർവ്വം കടാക്ഷിക്കണമേ, ജീവിതകാലത്ത് സത്കൃത്യങ്ങളാൽ അങ്ങയെ പ്രസാദിപ്പിച്ച ഈ സഹോദരന്റെ /സഹോദരിയുടെ കടങ്ങളും പാപങ്ങളും മോചിച്ച് സ്വർഗ്ഗഭാഗ്യത്തിന് അർഹനാ(യാ)ക്കുകയും ചെയ്യണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ, എന്നേയ്ക്കും,

സമൂ: ആമ്മേൻ

(രീതി: കാഹളനാദം കേൾക്കുമ്പോൾ....)

എന്റെ പ്രാർത്ഥന കൈക്കൊള്ളണമേ

മഹിമയെഴുന്നൊരു രക്ഷകനേ
മർത്യകുലത്തിൻ പാലകനേ
മരണമടഞ്ഞൊരു സോദരനെ(രിയെ)
കരുണയൊടോർക്കണമനവരതം

കർത്താവേ എന്നെ കടാക്ഷിക്കണമേ

മൃതിയിൽ നിന്നുമുയിർപ്പേകി
നിത്യവെളിച്ചം തൂകണമേ
സത്യത്തിൻ പ്രഭയാലേ നീ
നിത്യത തന്നിലുണർത്തണമേ

ദൈവമേ ഞങ്ങളെ സഹായിക്കണമേ

നിൻ സ്തുതി പാടിയൊരധരങ്ങൾ
വിലപിക്കരുതേ വേദനയാൽ
മൃതിയെ ജയിച്ചൊരു മിശിഹായേ
മൃതനാമെന്നിൽ കനിയേണം

ദൈവമേ ഞങ്ങളെ രക്ഷിക്കേണമേ

ജ്ഞാനസ്നാന ജലത്താലേ
നിന്നെയണിഞ്ഞവരിൽ കനിയൂ
തിരുമെയ് ഭക്ഷിച്ചവരെയും
നാശത്തിന്നിരയാക്കരുതേ

പിതാവിനും പുത്രനും പരിശുദ്ധാത്മാവിനും സ്തുതി

മരണമടഞ്ഞോർത്ഥാനം
വാഗ്ദാനം നീ ചെയ്തതു പോൽ
നിൻ ശരണത്തിൽ നിദ്രിതരാം
ഭക്തർക്കരുളണമുത്ഥാനം

ആദിമുതൽ എന്നേക്കും ആമ്മേൻ

ചിന്മയരൂപാ സ്രഷ്ടാവേ
നന്മയെഴുന്നൊരു മിശിഹായേ
ആത്മസ്വരൂപാ റൂഹായേ
നിന്നെ വണങ്ങി നമിക്കുന്നേൻ

വചനവായന

1 പത്രോസ് 1, 3-9

(വായനയ്ക്കു ശേഷം)

സമൂ: നമ്മുടെ കർത്താവായ മിശിഹായ്ക്ക് സ്തുതി

നേതാ: പിതാവായ ദൈവമേ, അങ്ങയുടെ പുത്രന്റെ തിരുവുത്ഥാനം വഴി മനുഷ്യവംശത്തിന് നല്കാനിരിക്കുന്ന സമാശ്വാസത്തിൽ ഞങ്ങളെയും പങ്കുചേർക്കണമേ. ജീവിതകാലത്ത് ക്ലേശങ്ങളും വേദനകളും സഹിച്ച് ഈ ലോകം വിട്ടുപോയ ഞങ്ങളുടെ സഹോദരനെ/ സഹോദരിയെ അങ്ങ് കൃപയോടെ തൃക്കൺ പാർക്കണമേ. മിശിഹായുടെ മഹത്വപൂർണമായ രണ്ടാമത്തെ ആഗമനംവരെ പ്രതീക്ഷാനിർഭരമായ ഹൃദയത്തോടെ കാത്തിരിക്കുവാനുള്ള അനുഗ്രഹം നല്കണമേ, ജീവന്റെയും മരണത്തിന്റെയും നാഥനും, പിതാവും പുത്രനും പരിശുദ്ധാത്മാവുമായ സർവ്വേശ്വരാ, എന്നേക്കും,

സമൂ: ആമ്മേൻ.

സങ്കീർത്തനം (51,1-17)

ദൈവമേ, അങ്ങയുടെ കാരുണ്യത്തിനൊത്ത്
എന്നോടു ദയ തോന്നണമേ
അങ്ങയുടെ കാരുണ്യാധിരേകത്തിനൊത്ത്
എന്റെ അതിക്രമങ്ങൾ മായിച്ചുകളയണമേ
എന്റെ അകൃത്യം നിശ്ശേഷം കഴുകിക്കളയണമേ
എന്റെ പാപത്തിൽ നിന്ന് എന്നെ ശുദ്ധീകരിക്കണമേ
എന്റെ അതിക്രമങ്ങൾ ഞാനറിയുന്നു
എന്റെ പാപം എപ്പോഴും എന്റെ കൺമുമ്പിലുണ്ട്.
അങ്ങേയ്ക്കെതിരായി ഞാൻ പാപം ചെയ്തുപോയി
അങ്ങയുടെ മുമ്പിൽ ഞാൻ തിന്മ പ്രവർത്തിച്ചു
അങ്ങയുടെ വിധിനിർണയത്തിൽ അങ്ങ് കുറ്റമറ്റവനാണ്
അങ്ങയുടെ വിധിവാചകം കുറ്റമറ്റതാണ്
പാപത്തോടെയാണ് ഞാൻ പിറന്നത്
ഉത്ഭവം മുതലേ ഞാൻ പാപിയാണ്
ഹൃദയപരമാർത്ഥയാണ് അങ്ങ് ആഗ്രഹിക്കുന്നത്.
ആകയാൽ എന്റെ അന്തരംഗത്തിൽ ജ്ഞാനം പകരണമേ
ഹിസോപ്പുകൊണ്ട് എന്നെ പവിത്രീകരിക്കണമേ
ഞാൻ നിർമ്മലനാകും
എന്നെ കഴുകണമേ
ഞാൻ മഞ്ഞിനേക്കാൾ വെണ്മയുള്ളവനാകും
എന്നെ സന്തോഷഭരിതനാക്കണമേ
അവിടുന്ന് തകർത്ത എന്റെ അസ്ഥികൾ ആനന്ദിക്കട്ടെ.
എന്റെ പാപങ്ങളിൽ നിന്ന് മുഖം മറയ്ക്കണമേ
എന്റെ അകൃത്യങ്ങൾ മായിച്ചു കളയണമേ
ദൈവമേ നിർമ്മലമായ ഹൃദയം എന്നിൽ സൃഷ്ടിക്കണമേ
അചഞ്ചലമായ ഒരു നവചൈതന്യം എന്നിൽ നിക്ഷേപിക്കണമേ
അങ്ങയുടെ സന്നിധിയിൽ നിന്ന് എന്നെ തള്ളിക്കളയരുതേ
അങ്ങയുടെ പരിശുദ്ധാത്മാവിനെ എന്നിൽ നിന്ന്എടുത്തുകളയരുതേ
അങ്ങയുടെ രക്ഷയുടെ സന്തോഷം എനിക്ക് വീണ്ടും തരണമേ
ഒരുക്കമുള്ള ഹൃദയം നല്കി എന്നെ താങ്ങണമേ
അപ്പോൾ അതിക്രമികളെ ഞാൻ അങ്ങയുടെ വഴി പഠിപ്പിക്കും
പാപികൾ അങ്ങയിലേക്ക് തിരിച്ചുവരും
ദൈവമേ എന്റെ രക്ഷയുടെ ദൈവമേ
രക്തപാതകത്തിൽ നിന്ന് എന്നെ രക്ഷിക്കണമേ
ഞാൻ അങ്ങയുടെ രക്ഷയെ ഉച്ചത്തിൽ പ്രകീർത്തിക്കും
കർത്താവേ എന്റെ അധരങ്ങളെ തുറക്കണമേ
എന്റെ നാവ് അങ്ങയുടെ സ്തുതികൾ ആലപിക്കും
ബലികളിൽ അങ്ങ് പ്രസാദിക്കുന്നില്ല
ഞാൻ ദഹനബലിയർപ്പിച്ചാൽ അത് സന്തുഷ്ടനാവുകയുമില്ല.
ഉരുകിയ മനസ്സാണ് ദൈവത്തിന് സ്വീകാര്യമായ ബലി
ദൈവമേ, നുറുങ്ങിയ ഹൃദയത്തെ അങ്ങ് നിരസിക്കുകയില്ല
പിതാവിനും പുത്രനും പരിശുദ്ധാത്മാവിനും സ്തുതി
ആദിമുതൽ എന്നേക്കും ആമ്മേൻ

ശുശ്രൂ: നമുക്ക് പ്രാർത്ഥിക്കാം, സമാധാനം നമ്മോടുകൂടെ

നേതാ: വേദനിക്കുന്നവരെ സമാശ്വസിപ്പിക്കുന്ന കരുണാനിധിയായ കർത്താവേ, നിത്യാനന്ദത്തിലുള്ള പ്രതീക്ഷയോടെ ഞങ്ങളിൽ നിന്ന് വേർപെട്ടുപോയ ഈ സഹോദരന്റെ/ സഹോദരിയുടെ കുടുംബാംഗങ്ങളെ ആശ്വസിപ്പിക്കണമേ. കണ്ണുകണ്ടിട്ടില്ലാത്തതും കാതു കേട്ടിട്ടില്ലാത്തതും മനുഷ്യഹൃദയം ആസ്വദിച്ചിട്ടില്ലാത്തതുമായ നിത്യസൗഭാഗ്യത്തെ നോക്കിപ്പാർത്തിരിക്കാൻ ഞങ്ങളെ അവിടുന്ന് സഹായിക്കണമേ. സകലത്തിന്റെയും നാഥാ, എന്നേക്കും,

സമൂ: ആമ്മേൻ.

ശുശ്രൂ: മരണം മൂലം ഈ ലോകത്തിൽ നിന്ന് വേർപെട്ടവരും ഇപ്പോൾ ദൈവസന്നിധിയിൽ അവിടുത്തെ മുഖാഭിമുഖം ദർശിച്ചുകൊണ്ടിരിക്കുകയും ചെയ്യുന്നവരുമായ വിശുദ്ധരോട് ഈ സഹോദരനു/സഹോദരിക്കുവേണ്ടി നമുക്ക് മാധ്യസ്ഥം തേടാം.

കർത്താവേ അനുഗ്രഹിക്കണമേ
മിശിഹായേ അനുഗ്രഹിക്കണമേ
കർത്താവേ അനുഗ്രഹിക്കണമേ
ഏകദൈവമായ പരി. ത്രിത്വമേ, ഞങ്ങളെ അനുഗ്രഹിക്കണമേ
പരി, മറിയമേ, ഈ സഹോദരനു വേണ്ടി പ്രാർത്ഥിക്കണമേ

വി. യൗസേപ്പേ,
വി. മിഖായേലേ,
വി, സ്നാപകയോഹന്നാനേ
വി. പത്രോസേ
വി. തോമ്മായേ
വി. എസ്തപ്പാനോസേ
വി. സെബസ്ത്യാനോസേ
വി. വിൻസെന്റേ
വി. ഗീവർഗ്ഗീസേ
വി. ഫ്രാൻസിസ് സേവ്യറേ
വി. ജോൺ മരിയ വിയാനി
വി. അഗസ്തീനോസേ
വി. ഫ്രാൻസിസ് അസ്സീസ്സി
വി. മറിയം മഗ്ദലനായേ
വി. കൊച്ചുത്രേസ്യായേ
വി. റോസായേ
വി. ക്ലാരയേ
വി. മരിയ ഗൊരേത്തി
വി, അന്നായേ
വി. അൽഫോൻസായേ
വി. കുര്യാക്കോസ് ഏലിയാസേ
വി. എവുപ്രാസ്യാമ്മേ
വി. മദർ തെരേസായേ
വാ. മറിയം ത്രേസ്യായേ
വാ. കുഞ്ഞച്ചാ
സകലവിശുദ്ധരേ

ദയാപരനായിരിക്കുന്ന കർത്താവേ,
ഞങ്ങളുടെ പാപങ്ങൾ പൊറുക്കണമേ
ദയാപരനായിരിക്കുന്ന കർത്താവേ,
ഞങ്ങളുടെ പ്രാർത്ഥന കേൾക്കണമേ
ദയാപരനായിരിക്കുന്ന കർത്താവേ,
ഞങ്ങളെ അനുഗ്രഹിക്കണമേ

ശുശ്രൂ: നമുക്ക് പ്രാർത്ഥിക്കാം, സമാധാനം നമ്മോടുകൂടെ

നേതാ: ഞങ്ങളുടെ പിതാക്കന്മാരുടെ ദൈവമേ, മരണം മൂലം ഈ ലോകത്തിൽ നിന്ന് വേർപിരിഞ്ഞുപോയ എല്ലാ മക്കളോടും കരുണ കാണിക്കണമേ. അങ്ങയുടെ മുമ്പിൽ നീതിയിലും വിശുദ്ധിയിൽ വ്യാപരിച്ച് അവിടുത്തെ മഹനീയമായ നാമത്തെ മഹത്വപ്പെടുത്തുവാൻ ഞങ്ങൾക്കു കൃപ നല്കണമേ “ഈ ചെറിയവരിൽ ഒരുവന് നിങ്ങൾ ചെയ്തുകൊടുത്തപ്പോൾ എനിക്കുതന്നെയാണ് ചെയ്തുതന്നത്" എന്നരുൾ ചെയ്ത കർത്താവേ, മറ്റുള്ളവരിൽ അങ്ങയെ ദർശിച്ചുകൊണ്ട് അവർക്കു നന്മ ചെയ്യുവാനും വിധിദിവസം അങ്ങയുടെ വലതുഭാഗത്ത് അണിനിരക്കുവാനും ഞങ്ങളെ അനുഗ്രഹിക്കണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ, എന്നേക്കും,

സമൂ: ആമ്മേൻ.

(രീതി മങ്ങിയൊരന്തിവെളിച്ചത്തിൽ)

കദനം നിറയും കരളോടെ
കണ്ണീരൊഴുകും മിഴിയോടെ
സ്നേഹമിയന്നൊരു സോദരനായി
ത്യാഗമിയന്നവർ കേഴുന്നു.

നിത്യസനാതനമോക്ഷത്തിൽ
അക്ഷയമായൊരു രാജ്യത്തിൽ
സ്വഛതയാർന്നൊരു ഗേഹം നീ
നിശ്ചയമായും നല്കണമേ

കരുണയെഴുന്നൊരു കർത്താവേ
കാരുണ്യം നീ തൂകണമേ
അപരാധങ്ങൾ പൊറുക്കണമേ
പാപവിമോചനമേകണമേ

മാതാവിന്നുദരത്തിൽ നാം
ഉരുവാകുവതോ പാപികളായ്
ശുദ്ധിയെഴും നവ ഹൃത്താലേ
ജ്ഞാനമതെന്നിൽ വിതയ്ക്കണമേ

കർത്താവേ നീ കഴുകണമേ
ഹീസോപ്പാലെ കഴുകണമേ
വെണ്മയെഴുന്നൊരു മഞ്ഞായെൻ
ഉണ്മയെ നീ താൻ മാറ്റണമേ

തൂമുഖമിങ്ങു തിരിക്കു നീ
താപമിയന്നവർ കേഴുന്നു
ഉണരട്ടെ എന്നസ്ഥികളും
ആനന്ദത്തിൻ പ്രഭയാലെ

നിർമ്മലമായൊരു മാനസവും
നിർമ്മിച്ചീടുക സദയം നീ
സർവ്വേശാ നിൻ കൃപയാലെ
നിശ്ചയദാർഢ്യം തന്നരുളൂ

തിരുസന്നിധിയിലണഞ്ഞിടും
താപികളാമീ പാപികളെ
തിരുരക്തത്തിന്റെ കൃപയാലെ
പാപവിമോചിതരാക്കണമേ

എന്നധരങ്ങൾ തുറക്കൂ വിഭോ
നിന്നപദാനം കീർത്തിക്കാൻ
ഉരുകിത്തീരും ചിത്തമതോ
സ്വീകൃതമാമൊരു യാഗബലി

ഉൾത്താപത്താലുരുകുന്നോർ
ക്കുത്തരമരുളും കർത്താവേ
ഉത്തമനായൊരു സദ്ഗുരുവേ
അത്തലകറ്റി നയിക്കണമേ

ചിന്മയരൂപാ സ്രഷ്ടാവേ
നന്മയെഴുന്നൊരു മിശിഹായേ
ആത്മസ്വരൂപാ റൂഹായേ
ഹൃദയാനന്ദം നല്കണമേ

കാറോസൂസ

നേതാ: നമുക്കെല്ലാവർക്കും വിശ്വാസത്തോടും പ്രതീക്ഷയോടും കൂടെ നിന്ന് കർത്താവേ ഞങ്ങളുടെ പ്രാർത്ഥന കേൾക്കണമേ എന്ന് അപേക്ഷിക്കാം