വി. മര്‍ക്കോസിന്‍റെ സുവിശേഷം, ഏലിയായുടെ ആഗമനം (9:9-13)

Authored by : Dr. Jacob Chanikuzhi On 04-Feb-2021

മലമുകളിലുണ്ടായിരുന്ന ഏലിയായുടെ സാന്നിദ്ധ്യം, മിശിഹായുടെ മുന്നോടിയെന്ന നിലയിലുള്ള ഏലിയായുടെ പങ്കിനെക്കുറിച്ചുള്ള ഒരു ചര്‍ച്ചയ്ക്കു വഴിയൊരുക്കി. യേശുവും ശിഷ്യരും മലയില്‍ നിന്നിറങ്ങിപ്പോരുമ്പോഴാണ് ഈ ചര്‍ച്ച നടക്കുന്നത്.

9:9, മലയില്‍വച്ചുണ്ടായ ദൃശ്യം രഹസ്യമായി സൂക്ഷിക്കാന്‍ യേശു ആവശ്യപ്പെടുന്നത് ഇതുവരെ അവിടുന്ന് നല്കിയ ഇത്തരം നിര്‍ദ്ദേശങ്ങളുടെ തുടര്‍ച്ചയാണ് (1:34-43,44; 3:11-12; 5:43; 7:36; 8:30). ജനം ഈ വിവരം അറിഞ്ഞാല്‍ അത് യേശുവില്‍ അവര്‍ക്കുള്ള രാഷ്ട്രീയ മെസയാനിക പ്രതീക്ഷകളെ ആളിക്കത്തിക്കുകയും അത്, ദൈവഹിതത്തില്‍നിന്ന് പിന്മാറുന്നതിനുള്ള കടുത്ത സമ്മര്‍ദ്ദത്തിനിടയാക്കുകയും ചെയ്യും. ആരോടും പറയരുതെന്ന്  ഈശോ ആവശ്യപ്പെടുന്ന അവസാന സന്ദര്‍ഭമാണിത്. രഹസ്യപാലനത്തിന് ഒരു പ്രത്യേക സമയപരിധിവയ്ക്കുന്ന ഏക അവസരവുമാണിത്.

9:10, മരിച്ചവരുടെ ഉത്ഥാനത്തെപ്പറ്റി പഴയനിയമം പഠിപ്പിക്കുന്നുണ്ട് (ദാനി 12:2). എന്നാല്‍ മൂന്ന് ദിവസങ്ങള്‍ക്കുശേഷം താന്‍ ഉയര്‍ത്തെഴുന്നേല്ക്കുമെന്ന യേശുവിന്‍റെ പ്രസ്താവം ശിഷ്യര്‍ക്ക് മനസ്സിലായില്ല. കാരണം മിശിഹാ മരിക്കുമെന്ന സങ്കല്പം അവര്‍ക്ക് അപരിചിതമായിരുന്നു.

9:11, മിശിഹായ്ക്കു മുമ്പ് ഏലിയാവരുമെന്നത് യഹൂദമതത്തിന്‍റെ വിശ്വാസമായിരുന്നു (മലാ 3:1-4; 4:5-6). നിയമജ്ഞരുടെ പ്രബോധനമനുസരിച്ച് ഏലിയാ അനേകരുടെ ഹൃദയങ്ങളെ ദൈവത്തിലേയ്ക്കു തിരിക്കും. യേശു വരാനിരിക്കുന്ന മിശിഹായാണെങ്കില്‍ ഏലിയാ വന്നു കഴിഞ്ഞുകാണണമല്ലോ. എന്നാല്‍ അങ്ങനെയൊരു ഏലിയാ വന്നതായി ശിഷ്യര്‍ക്കറിയില്ല. മാത്രമല്ല, ജനഹൃദയങ്ങള്‍ യേശുവിനെതിരേ തിരിഞ്ഞിരിക്കുകയും ചെയ്തിരിക്കുന്നു. അപ്പോള്‍ യേശു മിശിഹാതന്നെയാണെന്നത് എങ്ങനെ വിശ്വസിക്കും ? മാത്രവുമല്ല, മിശിഹായുടെ മരണവും ഉള്‍ക്കൊള്ളാനാവാത്ത കാര്യമാണ്. ഇതൊക്കെയാണ് തങ്ങളുടെ ചോദ്യത്തിലൂടെ ശിഷ്യര്‍ ഉന്നയിക്കുന്ന പ്രശ്നങ്ങള്‍.

9:12, മിശിഹായ്ക്കുമുമ്പേ ഏലിയാ വരണമെന്ന നിയമജ്ഞരുടെ പ്രബോധനം യേശു ശരിവയ്ക്കുന്നു. അതോടൊപ്പം തന്നെ മിശിഹായുടെ മാനങ്ങളും സഹനങ്ങളുമെല്ലാം പഴയനിയമത്തില്‍ത്തന്നെ എഴുതപ്പെട്ടിരിക്കുന്ന കാര്യങ്ങളാണെന്നും (സങ്കീ 22; ഏശ 52:13; 53:12) യേശു ചൂണ്ടിക്കാണിക്കുന്നു.

9:13, യേശുവിന്‍റെ ഉത്തരം കേട്ടപ്പോള്‍, ഏലിയാ ഇനിയും വരാനിരിക്കുന്നതേയുള്ളൂവെന്ന് ഒരുപക്ഷേ ശിഷ്യര്‍ കരുതിയിട്ടുണ്ടാകും. എന്നാല്‍ ഏലിയാ വന്നുകഴിഞ്ഞുവെന്ന് യേശു പ്രഖ്യാപിക്കുന്നു. പഴയനിയമത്തില്‍ എഴുതപ്പെട്ടിരിക്കുന്നതുപോലെ അവന്‍റെ ശത്രുക്കള്‍ അവര്‍ക്കിഷ്ടമുള്ളതുപോലെ അവനോടു പ്രവര്‍ത്തിച്ചുവെന്നും യേശു വിശദീകരിക്കുന്നു. യേശു ഇവിടെ ഉദ്ദേശിക്കുന്നത് സ്നാപക യോഹന്നാനെക്കുറിച്ചാണെന്ന് മത്താ 17:13 വ്യക്തമാക്കുന്നുണ്ട്. യേശുവിന്‍റെ മനസ്സിലുള്ള പഴയനിയമഭാഗം 1 രാജാ 19:1-3:10 ആയിരിക്കണം. അവിടെ ആഹാബ് രാജാവും, പ്രത്യേകമായി ജസബെല്‍ രാജ്ഞിയും ഏലിയായെ കൊല്ലുമെന്ന് ശപഥം ചെയ്യുകയും അവനെ കൊല്ലാന്‍ ആഗ്രഹിക്കുകയും ചെയ്തു. ഏലിയായോട് ആഹാബ് രാജാവും ജസബെല്‍ രാജ്ഞിയും ചെയ്യാനാഗ്രഹിച്ചതാണ് ഹെറോദേസ് അന്തിപ്പാസും, ഹോറോദിയായും സ്നാപകയോഹന്നാനോട് ചെയ്തത്. സ്നാപകയോഹന്നാന്‍റെ പഴയനിയമപ്രതിരൂപമാണ് ഏലിയാ. ഈ വിശദീകരണം ഈശോയുടെ മിശിഹാത്വം എങ്ങനെ പഴയനിയമപ്രവചനങ്ങളുമായി പൊരുത്തപ്പെടുന്നുവെന്ന് വ്യക്തമായി മനസ്സിലാക്കാന്‍ ശിഷ്യരെയും മര്‍ക്കോസിന്‍റെ വായനക്കാരെയും സഹായിക്കുന്നു.

Gospel of Mark and the Arrival of Elijah (9: 9-13) Dr. Jacob Chanikuzhi catholic malayalam the gospel of mark Bible Theology Church Teachings