വി. യോഹന്നാന്‍റെ സുവിശേഷം, 20:1-31, ഈശോയുടെ ഉത്ഥാനം

Authored by : Rev. Msgr. Dr. Mathew Vellanickal On 09-Feb-2021

മരണത്തെ പരാജയപ്പെടുത്തി ഈശോ ഉത്ഥാനം ചെയ്തതിന്‍റെ വിവരണമാണ് ഈ അദ്ധ്യായത്തിന്‍റെ ഉള്ളടക്കം. മിശിഹായുടെ ഉത്ഥാനം ക്രിസ്തീയവിശ്വാസത്തിന്‍റെ അടിസ്ഥാനവും അന്തസ്സത്തയുമാണ്. വി. പൗലോസിന്‍റെ വാക്കുകള്‍ ശ്രദ്ധേയമാണ്: "മിശിഹാ ഉയിര്‍പ്പിക്കപ്പെട്ടില്ലെങ്കില്‍ ഞങ്ങളുടെ പ്രസംഗം വ്യര്‍ത്ഥമാണ്. നിങ്ങളുടെ വിശ്വാസവും വ്യര്‍ത്ഥം. മാത്രമല്ല, ഞങ്ങള്‍ ദൈവത്തിനുവേണ്ടി കപടസാക്ഷ്യം വഹിക്കുന്നവരായിത്തീരുന്നു" (1 കൊറി 15:14-15). സഭയുടെ അടിസ്ഥാനദൗത്യമായ സുവിശേഷപ്രഘോഷണത്തിന്‍റെ വിഷയവും മിശിഹായുടെ ഉത്ഥാനം തന്നെയാണ്. പത്രോസ്ശ്ലീഹാ മറ്റ് പതിനൊന്നു പേരോടുചേര്‍ന്നു നിന്നുകൊണ്ട് ആദ്യം നടത്തിയ സുവിശേഷപ്രഘോഷണത്തിന്‍റെ പ്രധാനവിഷയം മിശിഹായുടെ ഉത്ഥാനം തന്നെയായിരുന്നു (നട 2:14 മുതല്‍). ഈ പ്രസംഗത്തില്‍ മിശിഹായുടെ ഉത്ഥാനം പലവട്ടം പരാമര്‍ശിക്കപ്പെടുന്നുണ്ട് (നട 2:23-24,32-33,36). ആദിമസഭ മിശിഹായുടെ ഉത്ഥാനത്തിലുള്ള വിശ്വാസം രണ്ടുതരത്തിലാണ് പ്രകടമാക്കിയിരുന്നത്

1. 
   സഭയുടെ വിശ്വാസം പ്രകടമാക്കുന്ന ചെറിയ വിശ്വാസപ്രഖ്യാപനങ്ങള്‍: പൗലോസ്ശ്ലീഹാ കോറിന്തോസുകാര്‍ക്കെഴുതിയ ഒന്നാം ലേഖനത്തിലെ ഈ വാക്യങ്ങള്‍ ഇതിനുദാഹരണമാണ്: "വിശുദ്ധലിഖിതങ്ങള്‍ പറഞ്ഞിട്ടുള്ളതുപോലെ, മിശിഹാ നമ്മുടെ പാപങ്ങള്‍ക്കുവേണ്ടി മരിക്കുകയും സംസ്ക്കരിക്കപ്പെടുകയും എഴുതപ്പെട്ടിരുന്നതുപോലെ മൂന്നാംനാള്‍ ഉയിര്‍പ്പിക്കപ്പെടുകയും ചെയ്തു. അവന്‍ കേപ്പായ്ക്കും പിന്നീട് പന്ത്രണ്ടുപേര്‍ക്കും പ്രത്യക്ഷനായി" (15:3-5). ഈശോയുടെ പെസഹാരഹസ്യങ്ങളുടെ ചുരുങ്ങിയ വിവരണമാണിത്. അവിടുത്തെ മരണവും സംസ്ക്കാരവും ഉത്ഥാനവും പ്രത്യക്ഷീകരണവുമെല്ലാം ഈ വാക്കുകളില്‍ അവതരിപ്പിച്ചിരിക്കുന്നു. ഇത് ആദിമസഭയുടെ വിശ്വാസപ്രഘോഷണമായിരുന്നു.
2. 
   2. ദീര്‍ഘമായ ഉത്ഥാനവിവരണങ്ങള്‍: പ്രധാനമായും രണ്ടുവിധത്തിലുള്ള വിവരണങ്ങളാണുള്ളത്: ശൂന്യമായ കല്ലറയെ സംബന്ധിച്ച വിവരണങ്ങളും ഈശോയുടെ പ്രത്യക്ഷീകരണത്തെക്കുറിച്ചുള്ള വിവരണങ്ങളും. ഈ അദ്ധ്യായത്തില്‍ ശൂന്യമായ കല്ലറയുടെ ഒരു വിവരണവും പ്രത്യക്ഷീകരണത്തിന്‍റെ മൂന്നു വിവരണങ്ങളും കൊടുത്തിരിക്കുന്നു. ശൂന്യമായ കബറിടം മരിച്ചയാള്‍തന്നെയാണ് ഉയിര്‍ത്തെഴുന്നേറ്റതെന്ന് സാക്ഷ്യപ്പെടുത്തുമ്പോള്‍, പ്രത്യക്ഷീകരണം മരിച്ചയാള്‍ വ്യത്യസ്തനായിട്ടാണ് ഉയിര്‍ത്തെഴുന്നേറ്റതെന്ന് സാക്ഷ്യപ്പെടുത്തുന്നു.

Gospel of John 20: 1-31 Resurrection of Jesus catholic malayalam gospel of john Rev. Msgr. Dr. Mathew Vellanickal Bible Theology Church Teachings