1 പത്രോസ് 2:11-4:11, പ്രവാസ ജീവിതം

Authored by : Mar. Joseph Pamplany On 03-Feb-2021

1 പത്രോസ് 2:11-4:11, പ്രവാസ ജീവിതം

തങ്ങള്‍ ദൈവത്തിന്‍റെ സ്വന്തം ജനമാണ് എന്ന അവബോധം വിശ്വാസികള്‍ക്കു പകര്‍ന്നു നല്‍കിയതിനുശേഷം അവര്‍ എപ്രകാരമാണ് പ്രതികൂല സാഹചര്യങ്ങളില്‍ ജീവിക്കേണ്ടത് എന്ന സന്ദേശമാണ് ഗ്രന്ഥകാരന്‍ തുടര്‍ന്നു നല്‍കുന്നത്. ഈ ലേഖനത്തിന്‍റെ അനുവാചകരുടെ സാമൂഹികവും സാമ്പത്തികവുമായ പശ്ചാത്തലം ഈ ഭാഗത്തെ വിവരണങ്ങളില്‍നിന്നു ഗ്രഹിക്കാനാവും. ഇതേക്കുറിച്ച് വിവിധ പണ്ഡിതന്മാരുടെ നിഗമനങ്ങള്‍ ചുവടെ ചേര്‍ക്കുന്നു.

(1) പത്രോസിന്‍റെ ഒന്നാംലേഖനം ലക്ഷ്യമാക്കുന്ന അനുവാചകര്‍ സമൂഹികമായി പ്രവാചകരും അടിച്ചമര്‍ത്തപ്പെട്ടവരുമായിരുന്നു. ക്രിസ്തീയ വിശ്വാസം സ്വീകരിച്ചു എന്ന കാരണത്താല്‍ സമൂഹ ഭ്രഷ്ടരാക്കപ്പെട്ടവരുമായിരുന്നു. ഇപ്രകാരം പാര്‍ശ്വവത്കരിക്കപ്പെട്ട ഈ അടിയാള വര്‍ഗ്ഗത്തിന്‍റെ സ്വത്വബോധം ഉണര്‍ത്താനാണ് 2:11-4:11 ല്‍ ഗ്രന്ഥകര്‍ത്താവു ശ്രമിക്കുന്നത് എന്ന നിഗമനമാണ് ജെ.എച്ച്. എലിയട്ട് എന്ന പണ്ഡിതനുള്ളത് (Home for the Homeless,Fortress, 1981, pp. 2326).

(2) ബഹുഭൂരിപക്ഷമായ വിജാതീയ സമൂഹത്തില്‍നിന്നും ബഹി ഷ്കരിക്കപ്പെട്ടതിനാല്‍ ഒറ്റപ്പെട്ടുപോയ ഒരു സമൂഹമാണ് ഈ ലേഖനത്തിന്‍റെ പ്രഥമവായനക്കാര്‍ എന്ന അഭിപ്രായം ഡി.എല്‍. ബാഹ് എന്ന പണ്ഡിതന്‍ രേഖപ്പെടുത്തുന്നുണ്ട് (Let Wives be submissive, pp. 8788). എന്നാല്‍ തങ്ങളെ ഒറ്റപ്പെടുത്താനുള്ള ശ്രമങ്ങളെ മാതൃകാപരമായ ജീവിതശൈലികൊണ്ട് അതിജീവിക്കുക എന്ന ആശയമാണ് ഗ്രന്ഥകാരന്‍ ഊന്നല്‍ നല്‍കി അവതരിപ്പിക്കുന്നത്.

ഈ അഭിപ്രായാന്തരങ്ങളെ വിരുദ്ധമായ ആശയങ്ങളായി കരുതേണ്ടതില്ല. ലേഖനത്തിന്‍റെ അനുവാചക സമൂഹം പാര്‍ശ്വവല്‍ക്കരിക്കപ്പെട്ടവരും പീഡിതരുമായിരുന്നു എന്ന് പൊതുവായി അനുമാനിക്കാനാകും. ഈ വചനഭാഗത്തിന്‍റെ ഘടനയെ ചുവടെചേര്‍ക്കും വിധം മനസ്സിലാക്കാം.

1. എപ്രകാരമാണ് അവിശ്വാസികളും വിജാതീയരുമായ അധികാരികളോട് വര്‍ത്തിക്കേണ്ടത് (2:11-17)
2. അക്രൈസ്തവരോട് എപ്രകാരം പെരുമാറണം (2:18-3:7)
3. സഹനം എന്ന പ്രതിസന്ധിയെ എപ്രകാരം അഭിമുഖീകരിക്കാനാകും(3:8-22)
4. വിശ്വാസിയുടെ പെരുമാറ്റരീതി എപ്രകാരമായിരിക്കണം (4:1-11)

1 Peter 2: 11-4: 11 Life in exile Mar. Joseph Pamplani articles of peter catholic malayalam peter bible Bible Theology Church Teachings